Al-shabaab oo sheegtay in Tiro Askarta Kenya ah ay ku dishay Weerar ay ku Qaaday Xero Booliis
Khamiis, September
22, 2016 (HOL) — Al-shabaab ayaa sheegtay inay lix ka tirsan askarta Kenya ay ku Weerar ay maanta ku Qaadday saldhig booliis oo ku yaalla deegaanka
Haamey oo ka tirsan Magaalada Gaarisa ee Gobolka Waqooyi-bari ee Dalka Kenya,
ayna weerarkaas ku soo furteen gaari dagaal oo ay lahaayeen booliiska Kenya.
Saraakiisha Al-shabaab oo la
hadlay Warbaahintooda ayaa sheegay in xoogagooda weerarka qaaday ay la
wareegeen saldhigga booliiska Hoomey, mana sheegin khasaare dhankooda ka soo gaaray weerarkan.
Balse, War ay soo saareen booliiska
Kenya ayay ku sheegeen in saddex askartooda ka mid ah ay ku dhaawacmeen Weerarkaas,
kuwaasoo laba ka mid ah lagu Daweynayo Isbitaal ku yaalla deegaanka
Dhadhaab, halka askari kale oo xaaladiisu liidatana loo qaaday magaalada
Nairobi.
Ciidamada Booliiska Kenya
ayaa intaas ku daray in laba ka mid ah askartooda lagu waayay weerarka meel ay
jiraanna aan la ogeyn, iyagoo aan bixin faahfaahinno ku saabsan gaariga ay
Al-shabaab qabsatay iyo hub la sheegay inay saldhiggaas kala baxeen.
Dhanka kale, Goob-joogayaal
ku sugan deegaanka Haamey oo weerarka lagu qaaday, ayaa sheegay in xoogagga
Al-shabaab ay saldhigga gubeen, ayna halkaa kala baxeen gaari kuwa ciidamada ah
iyo hub aan cadadkiisa la ogeyn.
Ugu dambeyn, Saldhiggaan
la Weeraray ayaa la sheegay in xilliga xooagga Al-shabaab ay Weerarkaan
ku qaadayeen ay ku sugnaayeen 14-askari oo ka tirsanaa Booliiska
Kenya.
Maxamed X. Xuseen, Hiiraan Online
[email protected]
Muqdisho, Soomaaliya