Khamiis, Sitember 22, 2016 (HOL)-Afar booliska Kenya ka tirsan ayaa la la' yahay kadib markii dabley ka tirsan Al-Shabaab ay weerareen saldhig boolis, degmada Wajeer ee gobolka Waqooyi-bari Kenya.
Kadib is rasaaseyn dhex martay dableyda iyo biliiska ayaa waxaa la sheegay in 2 booliska ka tirsan ay dhaawacmeen, afarta kalena la waayay, nolol iyo geerina aan toona lagu heyn iminka oo aanu warbixintaan qoreyno.
Dableyda ayaa la sheegay in ay saldhiga hub ka qaateen iyo gaari nooca Land Cruiser-ka ah. Weerarka ayaa ka dhacay saldhigga booliska ee Amei.
Labada askari ee biliiska ah ee dhaawacmay ayaa la sheegay in dhaawacyo halis ah ay soo gaareen deedna loo soo duuliyay Nairobi Kenya si loogu dabiibo.
Askarta booliska ee GSU ayaa lagu soo waramayaa in halka weerarku ka dhacay la geeyay si weeraro dheeraad ah looga digtoonaado.
Aaden M WarsameHiiraan OnlineNairobi, Kenya[email protected]