2/26/2017
Today from Hiiraan Online:  _
Wararka Maanta- Talaado, Sept 20, 2016
SAWIRRO: Jubbaland iyo QM oo dhisay Guddi ka Shaqeeya Baahida Qoxootiga soo laabanaya


Talaado, September 20, 2016 (HOL) — Maamulka Jubbaland, QM iyo Wakiillo ka Socday Beesha Caalamka ayaa ku heshiiyay in la dhiso Guddi Wadajir ah oo ka shaqeeya sidii Wax looga qaban lahaa baahiyaha ay Qabaan Qoxootiga Dhadhaab ku Nool ee doonaya inay dib ugu soo laabtaan Soomaaliya.

Wakiillo uu Hoggaaminayo ku xigeenka ergayga QM ee Somalia, Peter de Clercq oo ay ka mid yihiin Wakiillo ka Tirsan hay’adaha QM, Bangiga Adduunka iyo Hay’adaha Islaamiga, ayaa kulan kula qaatay Kismaayo madaxweyne ku xigeenka maamulka Jubbaland, C/qaadir Xaaji Maxamed (Luga-dheere) ayaa kala hadlay qorshaha soo laabashada qoxootiga Dhadhaab ku nool iyo barakacayaasha ku nool Kismaayo.

“Kulanku wuxuu ahaa mid muhiim ah, waxaana mas’uuliyiinta Jubbaland si aad ah ugala hadalnay dib u dajinta Qoxootiga kasoo laabanaya Xeryaha Dhadhaab ee Kenya. Waxaan dhinaca kale kala hadalnay baahiyaha ay qabaan barakacayaasha ku dhaqan Jubbooyinka,” ayuu yiri de Clercq oo intaas ku daray inay ku heshiiyeen dhismaha guddi wadajir ah oo ka shaqeeya dib u dajinta qoxootiga soo laabanaya.

Sidoo kale, Madaxweyne ku xigeenka Jubbaland, ayaa isagana sheegay in kulanka ay kaga hadleen arrimo badan oo ay qayb ka yihiin barnaamijyada horumarineed ee Jubbaland laga fulinayo.

“Waxaanu ku faraxsan-nahay kulanka aan la yeelannay mas’uuliyiinta isku-dhafka ah ee ka socda Beesha Calaamka, Haya’daha Qaramada Midoobay iyo kuwa Islaamka. Waxaana si aad ah uga doodnay sidii loo caawin lahaa shacabka Jubbooyinka, xoojinta ammaanka iyo qodobbo kale oo ku saabsan wax u qabashada bulshada Soomaaliyeed,” ayuu yiri C/qaadir Luga-dheere.

Dhanka kale, Peter de Clercq ayaa ku wareejiyay Wasiirka Cadaaladda Jubbaland, Aadan Ibraahim Aw-xirsi laba baabuur, kuwaasoo ay ku Deeqday Hay’adda UNDP ee Qaarmada Midoobay.

Ugu dambeyntii, Kulankaan guddiga wadajir ah lagu dhisay ayaa waxay imaanayaan xilli Maamulka Jubbaland uu dhawaan Diiday in Deegaannadiisa la keeno Qoxootiga ka soo laabanaya Dhadhaab, kaddib markii ay Hay’adda Qoxootiga ee UNHCR ku eedeeyeen in ay ka baxday heshiis ay wada-galeen.

Maxamed X. Xuseen, Hiiraan Online
Maxuseen@hiiraan.com
Muqdisho, Soomaaliya





Post your comments

9/20/2016 4:51 PM EST
Talaado, September 20, 2016 (HOL) — Labada Gobol ee Hiiraan iyo Shabeellada Dhexe oo markii hore Qorshuhu ahaa in Hal maamul ay ku Midoobaan, ayaa hadda u Muuqda kuwo arintaa ku kala weydaaranaya, kaddib markii xarunta gobolka Hiiraan ee Beledweyne looga dhawaaqay maanta dhismaha maamul u yeelanayo Gobolka Hiiraan.

9/20/2016 2:14 PM EST
Talaado, Sitember 20, 2016 (HOL)-Hoggaamiyeyaasha caalamka ayaa isku raacay in waxqabad intii hore ka wacan lala yimaado si wax looga qabto qaxootiga badan ee caalamka.

9/20/2016 1:27 PM EST
Talaado, September 20, 2016 (HOL) — Wafdi u Hoggaaminayo RW Soomaaliya, Cumar C/rashiid Cali Sharma’arke, ayaa maanta gaaray Magaalada Garowe ee Xarunta Puntland, halkaasoo si weyn loogu soo dhaweeyay.

9/20/2016 11:23 AM EST
Talaado, September 20, 2016 (HOL) — Mudaharaad aad u balaadhan oo lagu taageerayo go’aankii madaxweynuhu ku kala qaaday labada doorasho ayaa ka dhacay magaaladda Hargeysa, waxaana dadweynuhu beesha caalamka u sheegayeen in danta Somaliland ay ku jirto in doorashadda la kala qaado.

9/20/2016 11:22 AM EST
Talaado, Sitember 20, 2016 (HOL)-Waxaa caasimada Muqdisho lagu qabtay kulan looga hadlaayay amuuraha kusaabsan sidii loo adkeyn lahaa ammaanka waqtiga doorashooyinka soo socda.

9/20/2016 8:28 AM EST
Talaado, September 20, 2016 (HOL) — Waxaa Maalintii labaad galay dhagaysiga Dacwada ka socota Maxkamadda Caalamiga ah ee Cadaaladda ee QM ee la xiriirta Muranka Soohdin badeedda ee u dhaxeeya Kenya iyo Soomaaliya.

9/20/2016 8:10 AM EST
Talaado, September 20, 2016 (HOL) — Kaddib kulan ballaaran oo ay maanta ku yeesheen magaalada Beledweye, mas'uuliyiinta maamulka gobolka Hiiraan, siyaasiyiin, qeybaha kala duwan ee bulshada iyo duubabka dhaqanka gobolka oo uu horkacayo Ugaas Xasan Ugaas Khaliif, ayaa looga dhawaaqay dhismaha maamul-gobolleed uu yeellanayo gobolka Hiiraan.

9/20/2016 8:05 AM EST
Talaado, September 20, 2016 (HOL) — Al-shabaab ayaa markii u horreysay ka hadashay Doorashooyinka dadban ee lagu sannadkan daba-yaaqadiisa lagu wado inay ka dhacaan dalka, laguna soo doorto madaxweynaha iyo Baarlamaanka.

9/20/2016 4:26 AM EST
Talaado, Sitember 20, 2016 (HOL)-Cabsi xoggan ayaa Soomaalida gobolka Minnesota Mareykanka lasoo daristay kadib dhacdadii maalin dhaweyd nin Soomaali ah uu ku tooriyeeyay dad meel ka dukaamaysanaayay magaalada St. Cloud.

9/20/2016 4:18 AM EST
Talaado, September 20, 2016 (HOL) — Kaddib markii habeenkii Sabtidii uu Wiil Soomaali ah oo aysan Hay'adaha Nabadgalyada ee Minnesota aysan magaciisa shaacinin hasayeeshee Soomaalida St Cloud ay ku sheegeen Daahir Aadan uu fal Mindiyeena ku dhaawacay sagaal qof meel laga Dukaamaysto laguna Magaacabo CrossRoads Center ,Dhacdadaa kadib ayaa madaxda Gobolka iyo tan magaaladda St Cloud ay wada qabteenwaxaana shirkaa jaraaid oo ay ku sugnaayeen guddoomiyaha gobolka Minnesota Mark Dayton, Duqa Magaalada St Cloud Dave Kleis ,Taliyaha Booliiska ee Magaaladaa Chief Blair Anderson iyo xubno kale oo dagan magaaladaa.

9/20/2016 3:57 AM EST
Talaado, September 20, 2016 (HOL) — Jabriiil Ibraahim Cabdulle oo ahaa madaxa hay’ada Cilmi-baarista ee CRD, kana mid ahaa Hoggaanka Ururradda Bulshada Rayidka ah ee dalka ayaa Muqdisho uga dhawaaqay inuu u taagan yahay xilka madaxweynenimada Soomaaliya, taasoo la filayo in ay dhacdo tartankeedu dhamaadka bisha Oktoobar ee sannadkan 2016-ka.

9/20/2016 3:42 AM EST
Talaado, Sitember 20, 2016 (HOL)-Madaxweyne ku xigeenka Kenya, William Samoi Ruto ayaa mar kale difaacay go'aanka dawlada Kenya ku xireyso xeryaha Dhadhaab sanadkaan dabayaaqadiisa.

9/20/2016 2:35 AM EST
Talaado, Sitember 20, 2016 (HOL)-Culeys iyo cabsi ayaa lasoo darsay Soomaalida ku dhaqan magaalada Mombasa ee dalka Kenya.

9/20/2016 12:55 AM EST
Talaado, Sitember 20, 2016 (HOL)-Sharci yaqaano Kenyan ah oo uu hoggaaminaayo xeer ilaaliyaha guud ee Kenya, Githu Muigai ayaa shalay codsaday in la joojiyo dhageysiga dacwadaa.