Jaamacadda Bariga Afrika oo Heshiis Waxbarasho la saxiixatay Jamaacadda KU ee dalka Uganda
Arbaco, Oktober 26, 2016 (HOL)-Jaamacadda Bariga ayaa maanta heshiis isugu jiray
is-afgarad iyo iskaashi la saxiixatay jaamacadda Kampala University ee dalka
Uganda ka dib kulan maanta lagu qabtay xarunta East Africa ee magaalada
Bosaaso.
Madax ka tirsan Jaamacadda Bariga Afrika iyo wakiilo
matalayay KU ayaa ka soo qayb-galay shirkii heshiiskan lagu kala saxiixanayay,
waxaana qabsoomid-da heshiiskan laga soo shaqaynayay muddo gaaraysa laba sano.
Gudoomiyaha Jaamacadda bariga Afrika Aadan Shekh
Doon oo goobta ka hadlay ayaa sheegay in heshiiskiisan intiisa badan uu la
xiriiro dhanka waxbarashada iyo sidii labada dhinac ay u yeelan lahaayeen
xiriiiro joogto ah.
“Waxaa farxad weyn inoo ah inaan halkan ku kala
saxiixano iskaashi ka dhaxeyn doona labada jaamacadood ee Bariga Afrika iyo Kampala University,
dhinacyada aan iska kaashan doono waxaa kamid ah is-dhaafsiga xogaha iyo
ardayda " ayuu yiri gudoomiyaha Jaamacadda.
“Barnaamijyada aan isla garanay waxaa kaloo kamid ah in
cidii danaynsa ay labada jaamacadood ka baran karaan kuliyadaha kala ah cilmiga
kompuyuutarka iyo barashada Aqoonta saxaafadda “ ayuu mar kale yiri Sheekh Doon oo
tilmaamay in samaynta cilmi-baaris-yada ay kamid tahay waxyaabaha ay labada
jaamacadood iska kaashan doonaan.
Prof. Hamsa oo ka socday dhanka KU ayaa ka hadlay
muhiimadda ay leedahay in labada Jaamacadood ay xiriir yeeshaan ,isaga oo
tilmaamay in xog badan oo dheeraad oo jaamacadda ku saabsan ay heleen markii ay yimaadeen Bosaaso.
“Waxaan
ogaanay in ay wax weyn tahay in xiriir aan la samaysano jaamacadda Bariga
Afrika ,waxaana aqoonsanay in ay jiraan meelo badan oo labada jaamacadood ay ka
wada shaqayn karaan “ ayuu mar kale Hamza.
Ugu danbayn , Heshiiskan ayaa la filayaa in ay si
wada jir ah uga faa’idaystaan labada Jaamacadood , waxaana maamulka Jaamacadda
uu tilmaamay in muhiimadda ay saarayaan sidii loo hormarin lahaa waxbarashada
gobolka.
Faysal Mohamed Hassan
[email protected]