3/28/2024
Today from Hiiraan Online:  _
Wararka Maanta- Arbaco, Mar 20, 2013
Ciidamada AMISOM oo Muddo kooban Xabsiga dhigay Jen. Yuusuf Indhacadde kaddib markii uu muran soo dhexgalay

Arbaco, Maarso 20, 2013 (HOL) — Jen. Yuusuf Maxamed Siyaad (Indho-cadde) oo horay u soo noqday wasiir u dowlihii wasaaradda gaashaandhigga dowladdii KMG ahayd ayay ciidamada AMISOM ku xireen saakay muddo kooban garoonka diyaaradaha ee Muqdisho, kaddib markii uu muran soo dhexgalay.

Goobjoogayaal ayaa HOL u sheegay in Jen. Indhacadde u diiday in baaris lagu sameeyo haween la socday oo doonayay inay garoonka ka dhoofaan, taasoo ay ciidamada AMISOM diideen, iyadoo markii dambe xaaladdu ay isku bedeshay fowdo.

“Indha-cadde wuxuu isku dayay inuu joojiyo gelitaanka iyo ka bixitaanka garoonka diyaaradaha ee Muqdisho, isagoo adeegsanaya ilaaladiisa gaarka ah oo la socday, laakiin taasi waxay ka careysiisay ciidamada AMISOM oo xiray Jen. Indhacadde,” ayuu yiri sarkaal sare oo ka tirsan howlwadeennada garoonka diyaaradaha ee Muqdisho.

Howlaha garoonka ayaa dib u billowday markii la xiray Jen.Indha-cadde, iyadoo ugu dambeyn lasii daayay, lamana oga in sii dayntiisa ay tahay mid ay amar ku bixiyeen madaxda dowladda iyo in kale.

Gaadiidka gaashaaman ee ciidamada AMISOM ayaa tan iyo saakay ku sugnaa afaafka hore ee garoonka diyaaradaha Muqdisho, waxaana tani ay noqonaysaa markii ugu horreysay oo mas’uul horay xil uga soo qabtay dalka uu isku-dayo inuu is-hortaag ku sameeyo howlaha garoonka Muqdisho.

Taliska AMISOM iyo madaxda dowladda ayaan weli ka hadlin arrintan, iyadoo sidoo kale, Jen. Indhacadde uusan isaguna wax hadal ah kasoo saarin xariga ay u geysteen ciidamada Midowga Afrika ee Muqdisho ku sugan.

Garoonka caalamiga ah ee diyaaradaha Muqdisho ee Aadan Cadde ayaa waxaa ilaalo ka haya ciidammo ka tirsan kuwa Midowga Afrika, kuwaasoo baaritaanno ku sameeya dadka iyo gaadiidka galaya garoonka diyaaradaha.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/20/2013 2:19 PM EST
Arbaco, Maarso 20, 2013 (HOL) — Madaxweynaha Mareykanka, Barack Obama ayaa safarkiisii ugu horreeyay ku tagay dalka Israa’iil tan iyo markii xilka madaxweynimo ee dalkaas loo doortay, isagoo mar labaad ku guuleystay xilkan, waxaana garoonka diyaaradaha Tel Aviv ku soo dhaweeyay ra’iisul wasaaraha Israa’iil Benjamin Netanyahu iyo weliba madaxweynaha dalkaas, Shimon Peres.

3/20/2013 9:34 AM EST
Arbaco, Maarso 20, 2013 (HOL) — Kulan ballaaran oo ay ka qayb-galeen, waxgarad, salaaddiin, culumaa’uddiin, aqoonyahanno iyo saraakiil kasoo jeeda gobolka Hiiraan ayaa maanta lagu qabtay Magaalada Muqdisho, kaas oo looga hadlayay arrimo ku saabsan maamul u sameynta gobolka Hiiraan.

3/20/2013 8:28 AM EST
Arbaco, Maarso 20, 2013 (HOL) — In ka badan 20 ruux ayaa u geeriyootay cudurka shuban biyoodka halka in ka badan 60 oo isugu jira caruur iyo dad waaweyn u jiifaan xeryo gaar ah oo ay dulleedka magaalada ka hergaliyeen saraakiisha ciidamada Jabuuti si looga daweeyo dadka uu cudurka soo ridanayo.

3/20/2013 8:02 AM EST
Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa maanta kulan ku yeeshay Muqdisho wafdi ka socday Qarammada Midoobay oo uu hoggaaminayay Shamsul Baari oo ah madaxa arrimaha xuquuqul insaanka ee Qaramada, iyadoo kulankaas looga hadlay ilaalinta xuquuqul insaanka Soomaaliya.

3/20/2013 7:33 AM EST
Arbaco, Maarso 20, 2013 (HOL) — Maxkamadda Hargeysa ayaa maanta xukun laba sano ah ku ridday boqor Raabbi Yuusuf Cabdullaahi laba sano oo xarig ah, kaddib markii lagu eedeeyay inuu ka qaybgalay shir loo horjeedo madaxbannaanida Somaliland oo ka dhacay Muqdisho, uuna wax kasoo xulay baarlamaanka Soomaaliya.

3/20/2013 2:38 AM EST
Arbaco, Maarso 20, 2013 (HOL) — Ugu yaraan sagaal xubnood oo isugu jira saraakiil iyo dagaalyahanno ka tirsan Xarakada Al-shabaab ayaa ku dhintay qarax weyn oo xalay ka dhacay degmada Diinsoor ee gobolka Bay, iyadoo in ka badan 10 qof oo ku dhaawacmayna la dhigay isbitaalka Diinsoor.

3/20/2013 2:16 AM EST
Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in xukuumaddiisa ay ka go’an tahay inay dib ula wareegto degmada Xudur ee gobolka Bakool, halkaasoo ay la wareegeen xoogagga Al-shabaab Axaddii lasoo dhaafay markii ay ciidamadii Itoobiya iyo kuwii dowladda ay isaga baxeen.