3/18/2024
Today from Hiiraan Online:  _
Wararka Maanta- Jimco, Mar 1 , 2013
Ciidamada Ammaanka Somaliland oo Saqda Dhexe Habeenkii Baaritaanno ka sameeya Magaalada Hargeysa (SAWIRRO)


Jimco, Maarso 01, 2013 (HOL) — Ciidamadda sida gaar ah u tobabaran ee loo yaqaan RRU-da oo ay wehelinayaan ciidamadda sirdoonka Somaliland,  ayaa habeen hore xilli dambe baadhitaan xoogan ku sameeyey guryo shacab ah oo ku yaala degmadda 26 june ee magaaladda Hargeysa.

Qoysaska ku nool labaddaasi guri ee la baadhay, ayaa sheegay in xilli dambe goor ay hurdeen ay ciidamadda RRU-da usoo daateen, kuwaas oo argagax galiyey haweenkii iyo caruurtii ku noollaa guriga, isla markaana aanu ciidanku  sidan oggolaansho maxkamadeed oo u fasaxaya inay galaan guryo shacab oo la hurdo wakhti habeennimo ah.

Nimco Ibraahim Axmed oo ka mid ah qoyska gurigan la baadhayey ayaa sheegtay inay khaati ka taagan yihiin ciidamadan amaanka oo dhawr jeer oo hore goor habeen usoo daateen gurigeeda, isla markaana uu wali xidhan yahay walaalkeed oo dhowaan la xidhay, ilaa hadana aan maxkamad la hor keenin,  waxa kale oo ay sheegtay in dhibaato badan soo gaadhsiiyeen agabkii guriga dhexyaalay iyo albaabkii guriga oo ay jajabiyeen marka ay soo dhacayeen, isla markaana waxay sheegtay inay baadheen ilaa silliga sare guriga.

Sidoo kale, waxay Nimco sheegtay in markii ay guriga guud ahaan ay baadheen ay qaateen saddex mobil oo guriga yaallay, wax kale oo ay guriga ka kaxaysteen nin oday ah oo la yidhaa Aadan Yuusuf Dhego cadde oo xanuunsanayey, isla markaana uu ciidanku garaaceen ka dibna xabsiga u taxaabeen.

Sidoo kale, ciidankan waxa kale oo uu u daatay guri kale oo gurigaasi la jaar ah, isla markaana si weyn u galalafeen, waxaanay gurigaasi kale ka kaxaysteen wiil yar oo 19 jir ah oo magaciisa la yidhaa  Khadar Aw Cali.

Qoysaskan jaarka ah ee habeen hore baadheen ciidanka gaarka u tobabarani ayaa sheegay in dhibaato ka soo gaadhay guriga, isla markaana haweenkii iyo caruurtii huruday ay sas ka qaadeen awooda loo adeegsaday hawlgalkaasi ay ku baadhayeen, kuwaas oo dadkii guriga joogay aanay u sheegin waxay ka baadhayaan iyo ujeedada ka dambaysa badhitaankooda.

Si kastaba ha ahaatee, ciidankan loo yaqaan RRU-da iyo ciidanka sirdoonka ayaa si wada jir ah xilliyada dambe xoog ku galla guryaha shacabka wakhtiyadda dambe, iyadoo muddooyinkan dambe magaladda Hargeysa ka jireen hawlgalo balaadhan oo lagu baadhayo guryaha iyo gaadiidkaba, isla markaana dad aad u faro badan laga soo xidhay, iyadoo qaarna markii wax lagu waayey la iska siidaayey, halka qaar kalana wali xabsiyada lagu hayo oo la baadhayo. Haseyeeshee wakhtiyadan ay ciidankaasi guryuhu soo dhacayaan ayaa ah wakhti la hurdo, kuwaas oo si argagax ah  u baadhaya guryaha, isla markaana jajabinay agabka yaal iyo albaabadda guryaha, waxaanay inta badan dadweynaha hawlgalkaasi lagu fuliyey ay si weyn uga cabanayey dhibaatadda ay ciidankaasi ku hayaan guryahoodda.


Barkhad-Ladiif  M. Cumar, Hiiraan Online 
[email protected]
Hargeysa, Somaliland













Click here
3/1/2013 12:08 PM EST
Jimco, Maarso 01, 2013 (HOL) — Xoogag taabacsan ururka Al-shabaab ayaa maanta ku dilay deegaanka Awdiinle ee gobolka Bay ganacsade lagu magacaabi jiray, Aadan Shariif, kaddib markii ay kala dageen gaari uu la socday.

3/1/2013 11:57 AM EST
Jimco, Maarso 01, 2013 (HOL) — Maxkamadda ciidammada qalabka sida ee dowladda Soomaaliya ayaa xukunno dil ah ku ridday askar ka tirsan ciidamada dowladda, kuwaasoo horay u geystay dambiyo kala duwan oo ay ku jiraan dilal.

3/1/2013 11:10 AM EST
Jimco, Maarso 01, 2013 (HOL) — Qaar ka mid ah 135-tii oday dhaqameed ee soo xulay xildhibaannada baarlamanka Soomaaliya oo maanta kulan ku yeeshay magaalada Muqdisho ayaa kulankooda kaga hadlay xaaladda uu dalku marayo, dagaalladii Jubbooyinka xildhibaanno la sheegay inay wadaan mooshin ka dhan ah xukuumadda iyo waxqabadka dowladda Soomaliya inta ay jirtay.

3/1/2013 9:45 AM EST
Jimco, Maarso 01, 2013 (HOL) — Laba qarax oo waaweyn ayaa ka dhacay maqaayad ku taal xeebta Liido oo lagu magacaabo Indian Ocean iyadoona qaraxyadaasi ay sababeen khasaarooyin isugu jira dhimasho iyo dhaawac.

3/1/2013 9:09 AM EST
Jimco, March 01, 2013(HOL) - Ra’iisul wasaare ku xigeenka ahna wasiirka arrimaha dibadda ee Soomaaliya marwo Fawziya Yuusuf Xaaji Aadan ayaa ka qaybgashay shir ay yeesheen qaar kamid ah wasiirrada arrimaha dibadda ee wadamada ku bahoobay urur goboleedka IGAD.

3/1/2013 8:58 AM EST
Jimco, Maarso 01, 2013 (HOL) — Ra’isul wasaaraha xukuumadda Federaalka Soomaaliya Cabdi Faarax Shirdoon (Saacid) ayaa markii ugu horeeysay sheegay in xukuumadiisu ay kasoo horjeedo habka uu u socdo shirka maamul u sameynta gobollada Jubooyinka ee maalinimadii shalay ka furmay magaalada Kismaayo ee xarunta gobolka J/hoose.

3/1/2013 2:50 AM EST
Jimco, Maarso 01, 2013 (HOL) — Ururka Midowga Yurub ayaa sheegay inay si dhaqso badan ugu rarayaan howsha tababaridda ciidamada Soomaaliya gudaha magalada Muqdisho ee xarunta Soomaaliya, halkaasoo lagu tababari doono ciidamada Soomaaliya.

3/1/2013 2:36 AM EST
Jimco, Maarso 01, 2013 (HOL) — Qiimaha Shiidaalka, gaar ahaan Naaftadda ayaa qiimahoodii kor u kacay Somaliland, taas oo keentay in gaadiidleydii magaaladda u kala gooshta iyo shirkadihii Laydhka ku hanjabaan inay qiimaha ay dadka ka qaadi jireen ku kordhin doonaan shacabka haddii aan wax laga qaban.

3/1/2013 2:33 AM EST
Jimco, Maarso 01, 2013 (HOL) — Bannaabax looga soo horjeedo doorashadii ka dhacday dalka Jabuuti iyo siyaasiyiinta lagu xir-xiray dalkaas ayaa lagu qabtay magaalada Ottawa. Bannaanbaxaas ayaa waxaa soo qaban-qaabiyay jaaliyadda reer Jabuuti ee ku nool magaalada Ottawa ee dalka Kanada.

3/1/2013 2:16 AM EST
Jimco, Maarso 01, 2013 (HOL) — Bandhig faneed ay ka qaybgaleen boqolaal qof oo loogu talo-galay in dhaqaalaha kasoo baxa lagu caawiyo caruurta darbiyo jiifka ah ayaa xalay lagu qabtay magaalada Muqdisho ee xarunta Soomaaliya.

3/1/2013 1:57 AM EST
Jimco, Maarso 01, 2013 (HOL) — Gabdho Soomaliyeed oo wax ka barta dlaka Suudaan ayaa soo bandhigay hiddaha iyo dhaqanka Soomaalida oo ay ku jiran habka cunno-karinta, fanka iyo sidoo kale dharka ay Soomaalidu xirntaan.