3/19/2024
Today from Hiiraan Online:  _
Wararka Maanta- Jimco, Jun 7 , 2013
Dowladda Ingiriiska oo Safiir Cusub u soo Magacowday Soomaaliya, kaasoo bedeli doona danjirihii ka horreeyay


Jimce, Juun 07, 2013 (HOL) — Dowladda Britain ayaa maanta danjire cusub u soo magacowday arrimaha dalka Soomaaliya, kasoo bedeli doona danjirihii hore ee dalka Britain ay u magacowday, Matt Baugh.

Danjiraha cusub oo lagu magacaabo, Neil Wigan, kaasoo xilka la wareegaya inta lagu jiro bishan Juune 2013-ka. Waxaana uu horay uga soo shaqeeyay dalal Afrikaan ah oo ay ka mid tahay Jamhuuriyadda Dimuqraadiga Congo.

“Aad ayaan ugu faraxsanahay in la ii magacaabo inaan erayga Soomaaliya ee dalka Britain xilligan taariikhiga ah,” ayuu yiri Wigan oo hadlay markii la magacabaay kaddib isagoo hadalkiisa ku daray. “Soomaaliya xilligan waxay sameysay horumar weyn oo dhinaca siyaasadda iyo ammaanka ah, waxayna Al-shabaab laga saaray deegaanno badan oo ay ka talin jireen, dowladda ka jirta xilliganna waa mid rasmi ah.”

Danjiraha cusub ee Britain ay u soo magacowday arrimaha Soomaaliya ayaa howsha siyaasadda wuxuu kusoo biiray sannadkii 2000 wuxuuna saddexdii sano ee ugu dambeysay ka shaqeynayay dalka DR Congo.

“Britain waxay door muhiim ah ka ciyaartay horumarrada ay ku tallaabsatay dowladda cusub ee Soomaaliya, waxaana tusaale cad u ah shirkii dhawaan lagu qabtay London oo ay wadajir u guddoominayeen madaxweyne Xasan Sheekh Maxamuud iyo ra’iisul wasaaraha Britain, David Cameron, howlo kale oo fara badan ayaana dhiman,” ayuu yiri danjiruhu.

Ugu dambeyn, danjire Wigan wuxuu ballanqaado inuu ka shaqeyn doono sidii loo xoojin lahaa taageerada Britain ay siinayso Soomaaliya iyo howlaha safaaradda Britain ay dib uga furtay Muqdisho bishii Abriil ee sannadkan, kaddib 22-sano oo ay xirnayd.

Dalka Britain ayaa labadii sano ee lasoo dhaafay indhaha u soo jeediyay dalka Soomaaliya, waxaana lagu qabtay shirar taageero loogu raadinayo dib u dhiska iyo horumarinta Soomaaliya, kaddib sannado badan oo colaado ah.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/7/2013 4:18 PM EST
Jimce, Juun 07, 2013 (HOL) — Ra'iisal wasaaraha xukuumadda Soomaaliya, Cabdi Faarax Shirdoon (Saacid) ayaa dhinacyada ku dagaalamaya Kismaayo ugu baaqay inay si dag-dag ah u joojiyaan dagaalka, ayna xal iyo nabad ku dhameeyaan khilaafka u dhexeeya.

6/7/2013 3:22 PM EST
Jimce, Juun 07, 2013 (HOL) — Waxgarad iyo siyaasiyiin maanta ku shiray magaalada Muqdisho ee xarunta Soomaaliya ayaa sheegay in reer Hiiraan ay taageersan yihiin dowladda, iyagoo xusay inay raalli-gelin ka bixinayaan hadalkii dhawaan kasoo yeeshay xubno ka tirsan reer Hiiraan oo ku shiray magaalada Baladweyne.

6/7/2013 12:37 PM EST
Jimce, Juun 07, 2013 (HOL) — Madaxweynaha Soomaaliya, Xasan Sheekh Maxamuuda ayaa kulan kula yeeshay magaalada Nairobi ee xarunta dalka Kenya kulan kula yeeshay madaxweynaha maamulka Puntland, C/raxmaan Sheekh Maxamed Faroole.

6/7/2013 12:03 PM EST
Jimce, Juun 07, 2013 (HOL) — Xarakada Al-shabaab ayaa laba wiil oo da’yar ah ku toogtay degmada Baraawe ee gobolka Shabeellada Hoose khamiistii shalay ahayd, kuwaasoo ay ku eedeeyeen inay basaasiin u ahaayeen dowladda Soomaaliya iyo ciidamada AMISOM.

6/7/2013 11:31 AM EST
Jimce, Juun 07, 2013 (HOL) — Madaxweynaha Soomaaliya, Xasan Sheekh Maxamud ayaa sheegay inuu aad iyo aad uga xumaaday dagaal maanta ka dhacay gudaha magaalada Kismaayo, isagoo baaqay in si deg-deg ah lagu joojiyo colaaddaas, sida lagu sheegay warsaxaafadeed kasoo baxay xafiiska madaxweynaha Soomaaliya.

6/7/2013 11:01 AM EST
Jimce, Juun 07, 2013 (HOL) — Olole nadaafadeed oo ay iska kaashadeen qaar ka mid ah ardayda wax-ka-barta magaalada Laascaanood, dowladda hoose iyo ganacsatda ayaa lagu nadiifiyay deegaanno muhiim u ah bulshada ku dhaqan magaalada Laascaanood ee xarunta gobolka Sool.

6/7/2013 10:29 AM EST
Jimce, Juun 07, 2013 (HOL) — Faahfaahinno dheeraad ah ayaa kasoo baxa dagaal maanta ku dhexmaray bartamaha magaalada Kismaayo maamulka uu hoggaamiyo Sheekh Axmed Madoobe iyo ciidammo taageersanaa mid ka mid ah raggii ku dhawaaqay inay madaxweynaha ka yihiin maamulkii looga dhawaaqay Kismaayo ee Jubaland.

6/7/2013 8:40 AM EST
Jimce, Juun 07, 2013 (HOL) — Dowladda Shiinaha ayaa ugu baaqday beesha calaamka iyo Qaramada Midoobay inay xoojiyaan hanaanka nabadda dalka Soomaaliya iyo dib u dhiskiisa, si ay uga baxdo mashaakilaadkii ay ku jirtay 22-kii sano ee lasoo dhaafay.

6/7/2013 8:01 AM EST
Jimco, June 07, 2013(HOL) :- Dagaal xooggan oo la isku adeegsaday hubka noocyadiisa kala duwan ayaa ka dhacay magaalada Kismaayo, iyadoona dagaalkani uu u dhexeeyay ciidamo beeleed taageersan dowladda Soomaaliya iyo ciidamada maamulka Kismaayo garabka uu hogaamiyo Sheekh Axmed Madoobe.

6/7/2013 7:05 AM EST
Jimce, Juun 07, 2013 (HOL) — Taliyaha ciidamada gobolka Bay ee gobolka Bay, Mahad C/raxmaan ayaa ku dhaawacmay weerar maanta ka dhacay deegaanka Leego ee gobolka Shabeellada Hoose, iyadoo weerarkaas lagu dilay darawalkiisii.

6/7/2013 6:54 AM EST
Jimce, Juun 07, 2013 (HOL) — Kooxo hubeysan oo Koonfur Afrikaan ah ayaa xalay laba wiiil oo Soomaali ah oo isla dhashay ku dilay baangado iyo midiyo kaddib markii ay ku weerareen dukaankooda oo ku yaalla deegaanka Balamalango oo ka tirsan gobolka Limbombo oo ku yaalla soohdinta dalalka Koonfur Afrika iyo Mozambique.

6/7/2013 6:18 AM EST
Jimce, Juun 07, 2013 (HOL) — Madaxweynaha Somaliland mudane, Axmed Maxamed Maxamuud Siillaanyo, ayaa xalay si kadis ah loo arkay isagoo ka soo qaybgalay daawashadda tartanka ciyaaraha baasketka ee Garoonka Timadda Cadde ka socota oo ay ku dheelayeen labadda gobol ee Maroodi jeex (Hargeysa) iyo Sanaag.