3/19/2024
Today from Hiiraan Online:  _
Wararka Maanta- Axad, Jun 2 , 2013
Bannaanbaxyo ka socda Xarunta Turkiga ee Ankara iyo Booliiska oo Gaas u adeegsaday Dibadbaxayaasha (SAWIRRO)


Axad, Juun 02, 2013 (HOL) — Dibadbaxayaal careysan ayaa maanta isugu soo baxay maalintii saddexaad barxadda Kizilay magaalada Ankara ee dalka Turkiga, iyadoo booliiskuna ay u adeegsadeen dibadbaxayaashaan suntan dadka ka ilmeysiisa kaddib markii ay isku dhaceen.

Mudaaharaadayaasha ayaa weli ku sugan barxadda, iyagoo ku dhawaaqay erayo ay kaga soo horjeedaan xukuumadda ra’iisul wasaaraha Turkiga, Racep Tayyip Erdogan, waxayna ka dalbadeen inuu xilka ka dago.

Dibadbaxyada oo jimcihii ka billowday barxadda Taksim oo Istanbul ku taalla ayay dibadbaxayaashu uga cabanayaan isbedel ay doonayso inay dowladda Turkiga ku sameyso, iyagoo sidoo kale sheegay inay ka cabanayaan in lagu xadgudbay xuquuqdooda shaqsiyadeed.

Wararka ayaa waxay sheegayaan in dibadbaxayaashu ay jareer geedihii ku yaallay halkaas, sidoo kalena ay burbur ku geysteen basas iyo gaadiid kale oo ay leedahay dowladda hoose ee Turkiga. Iyadoo shaqaalaha dowladda hoose ee Turkiga ay billaabeen inay nadiifiyaan waddooyinka.

“Bannaanbaxayaashu waxay ku burburiyeen magaalada Ankara ee xarunta dalka Turkiga 16 bas, waxayna dab-qabadsiiyeen lix gaarida oo ay leedahay dowladda hoose ee Turkiga. Boosteejooyinka ay basaasku istaagaan iyo boorar kuwa xayeesiinta ahna way burburiyeen,” ayaa lagu yiri war kasoo baxay dowladda  hoose ee Ankara.



Ciidamada booliiska ayaa la sheegay inay qabqabteen 90 qof oo ka mid ahaa dadkii dibadbaxa ka dhigayay Ankara, sidoo kale waxaa lasoo warinayaan in 48 magaalo oo kale lagu qabqabtay dad gaaraya 936 qof oo dibadbaxayaal ah, kuwaasoo dhammaantood la xiray, inkasto qaar ka mid ah markii dambe lasii daayay.

Ra’iisul wasaaraha dalka Turkiga, Erdogan oo shir jaraa’id qabtay maanta oo Axad ah ayaa ugu baaqay dibadbaxayaasha inay joojiyaan dibadbaxyada ay dhigayaan, ciddii cabasho qabtana ay u timaaddo isaga oo ay sheegto wixii ay doonayso.

Erdogan wuxuu sheegay in isbedelka lagu sameynayo barxadda Taksim lasii wadi doono, isagoo xusay in taasi ay tahay go’aan ay dowladdu diidday, balse dibadbaxayaasha ayaa dalbanaya in goobtaas oo qadiimi ah aan lagu sameyn wax isbedel ah.

Dibadbaxyadan ayaa noqonaya kuwii ugu cuslaa ee dalka Turkiga ka dhaca muddo sannado ah, iyadoo dadka dibadbaxa dhigaya ay sidoo kale sheegeen inay si aad ah uga cabanayaan sharciyo cusub oo ay dowladdu soo saartay kuwaasoo ay ka mid yihiin inaan la isku dhunkan karin jidka dhexdiisa.


Police fire tear gas in Ankara-PHOTO

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/2/2013 3:01 PM EST
Axad, Juun 02, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo) ayaa galabta si rasmi ah uga furay garoonka kubadda cagta ee Hargeysa Stadium ciyaarihii gobollada ee Somaliland oo ay ka qaybgalayaan 13 kooxood oo ka socda gobollada Somaliland.

6/2/2013 2:36 PM EST
Axad, Juun 02, 2013 (HOL) — Prof. Axmed Ismaaciil Samatar ayaa si weyn loogu soo dhaweeyay maanta magaalada Hargeysa ee xarunta Somaliland kaddib markii uu muddo dheer ka maqnaa, isla markaana ahaa aqoonyahan si weyn uga soo horjeeday gooni isku-taagga Somaliland.

6/2/2013 2:01 PM EST
Axad, Juun 02, 2013 (HOL) — Ciidamada AMISOM ee ku sugan Baydhabo ayaa maanta dilay saddex neef oo isugu jiray laba lo’a ah iyo dameero, kaddib markii ay xireen jidka weyn ee buundada xaafadda Isha Baydhabo.

6/2/2013 12:31 PM EST
Axad, Juun 02, 2013 (HOL) — Saraakiil ka tirsan maamulka Puntland ayaa sheegay in mid ka mid ah diyaaradaha aan duuliye lahayn ee Drones-ka loo yaqaan ay kusoo dhacday deegaan lagu magacaabo Qow oo 20-km u jira degmada Boosaaso ee xarunta gobolka Bari.

6/2/2013 12:18 PM EST
Axad, Juun 02, 2013 (HOL) — Wasiirka gaashaandhigga Soomaaliya, C/xakiin Maxamuud Xaaji Fiqi oo ku sugan Kismaayo ayaa sheegay in si wanaagsan loogu soo dhaweeyay magaalada Kismaayo ee xarunta gobolka Jubbada Hoose.

6/2/2013 11:21 AM EST
Axad, Juun 02, 2013 (HOL) — Madaxweynaha Puntland, C/raxmaan Sheekh Maxamed Faroole oo ku sugan magaalada Nairobi ee dalka Kenya ayaa sheegay inuu madaxweynaha Soomaaliya, Xasan Sheekh Maxamuud kala hadli doono arrimaha dastuurka iyo xal u helidda jubbooyinka.

6/2/2013 9:03 AM EST
Axad, Juun 02, 2013 (HOL) — Dowladda Kenya ayaa qorsheynaysa inay dib ugu celiso qoxootiga Soomaaliyeed ee ku jira xeryaha Dhadhaab Soomaaliya sida ay sheegtay wasiirradda arrimaha dibadda ee Kenya, Aamina Maxamed oo Nairobi kula kulantay Jicmihii shalay ra’iisul wasaare ku xigeenka ahna wasiiradda arrimaha dibadda Soomaaliya Fowziyo Yuusuf Xaaji Aadan.

6/2/2013 8:25 AM EST
Axad, Juun 02, 2013 (HOL) — Madaxweynaha Soomaaliya, Xasan Sheekh Maxamuud ayaa maanta oo Axad ah kula kulmay magaalada Yokohama ee dalka Japan guddoomiyaha hay’ada xiriirka caalamiga Japan (JICA), Akihiko TANAKA, isagoo kala hadlay go’aankii ra’iisul wasaaraha Japan, Shinzo Abe ee ahaa in Soomaaliya si toos ah kaalmada Japan loo siinayo dowladda iyo mashaariicda horumarineed ee Soomaaliya u baahan tahay.

6/2/2013 8:22 AM EST
Axad, Juun 02, 2013 (HOL) — Tacbashada beeraha waa laf-dhabarta in badan oo ka mid ah qoysaska ku dhaqan deegaannada uu hareer maro wabiga shabeelle ee gobollka Hiiraan, laakiin haddana dhinaca kale marka aad eegto waxaa muuqaneysa in sanadihii ugu danbeeyay qoysaskaas si wanaagsan uga faa'ideysan tacabka dhulka sababo la xiriira farsamo xumo iyo dhaqaalle la'aan soo food saartay.

6/2/2013 4:02 AM EST
Axad, Juun 02, 2013 (HOL) — Ciidammo madaniga oo la shaqeeya kuwa booliiska ayaa loo sameeyay xaafadaha magaalada Baydhabo, kuwaasoo la wareegay sugidda ammaanka degmada Baydhabo oo bilihii ugu dambeeyay ahayd mid kacsan.

6/2/2013 3:53 AM EST
Axad, Juun 02, 2013 (HOL) — Madaxweynaha Soomaaliya, Mudane Xasan Sheekh Maxamuud ayaa maanta kula kulmay Yokohama xoghayaha guud ee Qaramada Midoobay, Ban Ki-Moon, iyagoo kawada hadlay xafiiska cusub ee ay Qaramada ay ka furayso Muqdisho, ergayga cusub Nicholas Kay oo imaan doona Muqdisho, arrimaha ammaanka iyo sidii Qaramada Midoobay ay qayb uga qaadan lahayd dib u dhiska Soomaaliya.