3/19/2024
Today from Hiiraan Online:  _
Wararka Maanta- Axad, Jun 2 , 2013
Madaxweynaha Soomaaliya oo maanta la Kulmay Madaxa Hay’adda Xiriirka Caalamiga ah ee dalka Japan (SAWIRRO)


Axad, Juun 02, 2013 (HOL) — Madaxweynaha Soomaaliya, Xasan Sheekh Maxamuud ayaa maanta oo Axad ah kula kulmay magaalada Yokohama ee dalka Japan guddoomiyaha hay’ada xiriirka caalamiga Japan (JICA), Akihiko TANAKA, isagoo kala hadlay go’aankii ra’iisul wasaaraha Japan, Shinzo Abe ee ahaa in Soomaaliya si toos ah kaalmada Japan loo siinayo dowladda iyo mashaariicda horumarineed ee Soomaaliya u baahan tahay.

Mr. Tanaka ayaa uga mahadceliyey madaxweynaha Soomaaliya booqadiisha dalka Japan iyo ka qeyb-galkiisa shirka horumarinta Afrika ee Yokohama ka socda, isagoo xusay in Soomaaliya ay horumar muuqda ka gaartay dhinaca ammaanka.

Madaxweyne Xasan Sheekh ayaa isaguna sidoo kale u mahadceliyay marti-gelinta Japan ay u fidisay iyo hoggaanka saliimka ah ee ay ka qaadatay arrimaha Soomaaliya. Madaxweynuhu wuxuu sidoo kale uga mahadceliyay dowladda Japan gaar ahaan ra’iisul wasaare Abe go’aankiisa ahaa in xiriirka Japan iyo Soomaaliya dib loosoo nooleeyo oo ay si toos ah u mucaamilaan.

Sidoo kale, madaxweynaha ayaa warbixin kooban siiyay guddoomiyaha JICA taasoo ku wajahan xaaladda dalka; gaar ahaan mashaariicda shacabka Soomaaliyeed ay sida deg-degga ah ugu baahan yihiin si horumarka ka billowday Soomaaliya loo sii ambaqaado.

“Dhallinyarada Soomaaliyeed waxay u baahan yihiin tababarro xirfadooda shaqo kor loogu qaadayo, isla markaana nolol u abuurta iyo mashaariicda dib u dhiska oo iyagana shaqo abuuris u sameyn kara dad badan oo Somaali ah,” ayuu madaxweynuhu hadalkiisa ku daray.

Ugu danbeyn, guddoomiyaha JICA ayaa ballanqaaday in iskaashi toos ah oo xagga mashaariicda ah ay la sameyn doonaan dowladda Soomaaliyeed, sida in tababarro la siiyo shaqaalaha dowladda kuwaasoo la xiriira maamulka iyo maareynta. In dhismaha machadyada tababarka farsamada la hirgelin doono iyo in dib loo dhisi doono iskuulada, Isbitaalada, waddooyinka iyo kanaallada beeraha.

Madaxweynaha Soomaaliya ayaa maanta kulammo gaar-gaar ah la yeeshay madaxweynaha Koonfur Afrika oo uu kala hadlay xiriirka labada dal iyo sidii Soomaalida deggen dalkaas ammaankooda loo kafaalo qaadi lahaa.

Madaxweynahu waxuu kaloo la kulmay mas’uuliyiin ka socotay Midowga Yurub oo uu kala hadlay shirka Brussels ka dhici doono 16-ka September 2013. Sidoo kale mas’uuliyiin ka socotay hay’adaha Japan ayuu la kulmay madaxweynuhu.











Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/2/2013 3:01 PM EST
Axad, Juun 02, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo) ayaa galabta si rasmi ah uga furay garoonka kubadda cagta ee Hargeysa Stadium ciyaarihii gobollada ee Somaliland oo ay ka qaybgalayaan 13 kooxood oo ka socda gobollada Somaliland.

6/2/2013 2:36 PM EST
Axad, Juun 02, 2013 (HOL) — Prof. Axmed Ismaaciil Samatar ayaa si weyn loogu soo dhaweeyay maanta magaalada Hargeysa ee xarunta Somaliland kaddib markii uu muddo dheer ka maqnaa, isla markaana ahaa aqoonyahan si weyn uga soo horjeeday gooni isku-taagga Somaliland.

6/2/2013 2:01 PM EST
Axad, Juun 02, 2013 (HOL) — Ciidamada AMISOM ee ku sugan Baydhabo ayaa maanta dilay saddex neef oo isugu jiray laba lo’a ah iyo dameero, kaddib markii ay xireen jidka weyn ee buundada xaafadda Isha Baydhabo.

6/2/2013 12:31 PM EST
Axad, Juun 02, 2013 (HOL) — Saraakiil ka tirsan maamulka Puntland ayaa sheegay in mid ka mid ah diyaaradaha aan duuliye lahayn ee Drones-ka loo yaqaan ay kusoo dhacday deegaan lagu magacaabo Qow oo 20-km u jira degmada Boosaaso ee xarunta gobolka Bari.

6/2/2013 12:18 PM EST
Axad, Juun 02, 2013 (HOL) — Wasiirka gaashaandhigga Soomaaliya, C/xakiin Maxamuud Xaaji Fiqi oo ku sugan Kismaayo ayaa sheegay in si wanaagsan loogu soo dhaweeyay magaalada Kismaayo ee xarunta gobolka Jubbada Hoose.

6/2/2013 12:06 PM EST
Axad, Juun 02, 2013 (HOL) — Dibadbaxayaal careysan ayaa maanta isugu soo baxay maalintii saddexaad barxadda Kizilay magaalada Ankara ee dalka Turkiga, iyadoo booliiskuna ay u adeegsadeen dibadbaxayaashaan suntan dadka ka ilmeysiisa kaddib markii ay isku dhaceen.

6/2/2013 11:21 AM EST
Axad, Juun 02, 2013 (HOL) — Madaxweynaha Puntland, C/raxmaan Sheekh Maxamed Faroole oo ku sugan magaalada Nairobi ee dalka Kenya ayaa sheegay inuu madaxweynaha Soomaaliya, Xasan Sheekh Maxamuud kala hadli doono arrimaha dastuurka iyo xal u helidda jubbooyinka.

6/2/2013 9:03 AM EST
Axad, Juun 02, 2013 (HOL) — Dowladda Kenya ayaa qorsheynaysa inay dib ugu celiso qoxootiga Soomaaliyeed ee ku jira xeryaha Dhadhaab Soomaaliya sida ay sheegtay wasiirradda arrimaha dibadda ee Kenya, Aamina Maxamed oo Nairobi kula kulantay Jicmihii shalay ra’iisul wasaare ku xigeenka ahna wasiiradda arrimaha dibadda Soomaaliya Fowziyo Yuusuf Xaaji Aadan.

6/2/2013 8:22 AM EST
Axad, Juun 02, 2013 (HOL) — Tacbashada beeraha waa laf-dhabarta in badan oo ka mid ah qoysaska ku dhaqan deegaannada uu hareer maro wabiga shabeelle ee gobollka Hiiraan, laakiin haddana dhinaca kale marka aad eegto waxaa muuqaneysa in sanadihii ugu danbeeyay qoysaskaas si wanaagsan uga faa'ideysan tacabka dhulka sababo la xiriira farsamo xumo iyo dhaqaalle la'aan soo food saartay.

6/2/2013 4:02 AM EST
Axad, Juun 02, 2013 (HOL) — Ciidammo madaniga oo la shaqeeya kuwa booliiska ayaa loo sameeyay xaafadaha magaalada Baydhabo, kuwaasoo la wareegay sugidda ammaanka degmada Baydhabo oo bilihii ugu dambeeyay ahayd mid kacsan.

6/2/2013 3:53 AM EST
Axad, Juun 02, 2013 (HOL) — Madaxweynaha Soomaaliya, Mudane Xasan Sheekh Maxamuud ayaa maanta kula kulmay Yokohama xoghayaha guud ee Qaramada Midoobay, Ban Ki-Moon, iyagoo kawada hadlay xafiiska cusub ee ay Qaramada ay ka furayso Muqdisho, ergayga cusub Nicholas Kay oo imaan doona Muqdisho, arrimaha ammaanka iyo sidii Qaramada Midoobay ay qayb uga qaadan lahayd dib u dhiska Soomaaliya.