3/19/2024
Today from Hiiraan Online:  _
Wararka Maanta- Axad, Jun 2 , 2013
Madaxweynaha Soomaaliya oo dalka Jabbaan kula kulmay Xoghayaha Guud ee Qaramada Midoobay Ban Ki-Moon (SAWIRRO)


Axad, Juun 02, 2013 (HOL) — Madaxweynaha Soomaaliya, Mudane Xasan Sheekh Maxamuud ayaa maanta kula kulmay Yokohama xoghayaha guud ee Qaramada Midoobay, Ban Ki-Moon, iyagoo kawada hadlay xafiiska cusub ee ay Qaramada ay ka furayso Muqdisho, ergayga cusub Nicholas Kay oo imaan doona Muqdisho, arrimaha ammaanka iyo sidii Qaramada Midoobay ay qayb uga qaadan lahayd dib u dhiska Soomaaliya.

Ban Ki-Moon ayaa ammaanay dadaalka iyo horumarka Soomaaliya wuxuuna sheegay in Qaramada Midoobay ay kaalmo buuxda la garab taagan tahay dowladda iyo shacabka Soomaaliyeed. Isagoo Madaxweynaha Soomaaliya uga mahadceliyay saxiixii ay Soomaaliya saxiixday heshiiska caalamiga ah ee ka hortagga hubka sunta ah.

Sidoo kale,  xoghayaha guud ayaa sheegay in ergeyga cusub ee Soomaaliya ka howlgalaya laga billaabo berri inuu la imaan doono isbedel buuxa oo dhammaan hay’adaha Qarammada Midoobayna ay u guuri doonaan gudaha dalka Soomaaliya.

Madaxweynaha ayaa isagana ka mahadceliyay doorka  weyn ee Qaramada Midoobay iyo sida dowladda Soomaaliya loogala tashaday magacaabista mas’uuliyiinta sar-sare ee Qaramada Midoobay ee ka howlgalaya Somalia.

“Dowladda Soomaaliya waxay diyaarisay qorshayaashii xasilinta dalka oo uu ka mid yahay sharciyadii lagu dhisi lahaa maamul-goboleedyada dalka si loo helo maamul wanaag sal sharciyadeed leh, kaasoo ay dadka Soomaaliyeed ku kalsoonaan karaan,” ayuu yiri madaxweynaha Soomaaliya.

Madaxweynuhu wuxuu ka codsaday Qaramada Midoobay inay door fiican ka qaadato sidii Soomaaliya hay’adaheeda dib loogu dhisi lahaa loona heli lahaa hay’ado tayeysan oo u adeega danaha shacabka Soomaaliyeed.

Dhanka kale, madaxweyne Xasan Sheekh ayaa maanta la kulmi doona xubin ka tirsan baarlamaanka dalka Japan oo lagu magacaabo, Noriko Shirasu oo baarlamaanka dalkiisa u qaabilsan xiriirka Afrika, iyagoo kawada hadli doona xaaladda Soomaaliya iyo isbedelka ka dhacay.

Madaxweynaha ayaa shacabka Japan siiyay warbixin kooban ee uu xaaladda Soomaaliya kaga warbixiyay, isagoo sheegay in maanta ay jirto horumar iyo rajo weyn oo ku aaddan in Soomaaliya ay cagaheeda dib isugu taagto.

Madaxweynaha ayaa sheegey inuu ku faraxsanyahay inuu yimaado Japan oo uu la kulmo ra’iisul wasaare Shinzo Abe, isla markaana xiriirkii Japan iyo Soomaaliya dib loo cusbooneysiiyay. Isagoo sidoo kale xusay in Somalia ay rajo weyn ka qabto in Japan ay wax kala qabato sidii dalka dib loogu dhisi lahaa.

Xildhibaan Noriko Shirasu ayaa isagana uga mahadceliyey Madaxweynaha Somalia booqashadiisa uu ku yimid Japan, isla markaana sheegay in Japan ay sii xoojineyso xiriirka ay la leedahay Soomaaliya ayna ka caawinayso wax walba oo ay u baahan yihiin sida dib u dhiska dalka.

Ra’iisul wasaaraha Japan ayaa u ballan-qaadyo madaxweynaha Soomaaliya in shaqalaha sar-sare ee Soomaaliyeed ay tababar u imaan doonaan dalka Japan si loo kordhiyo xirfadahooda iyo waayo-aragnimadooda iyo in Japan ay si toos ah mucaawanada u siin doonto dowladda Soomaaliya.





Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/2/2013 3:01 PM EST
Axad, Juun 02, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo) ayaa galabta si rasmi ah uga furay garoonka kubadda cagta ee Hargeysa Stadium ciyaarihii gobollada ee Somaliland oo ay ka qaybgalayaan 13 kooxood oo ka socda gobollada Somaliland.

6/2/2013 2:36 PM EST
Axad, Juun 02, 2013 (HOL) — Prof. Axmed Ismaaciil Samatar ayaa si weyn loogu soo dhaweeyay maanta magaalada Hargeysa ee xarunta Somaliland kaddib markii uu muddo dheer ka maqnaa, isla markaana ahaa aqoonyahan si weyn uga soo horjeeday gooni isku-taagga Somaliland.

6/2/2013 2:01 PM EST
Axad, Juun 02, 2013 (HOL) — Ciidamada AMISOM ee ku sugan Baydhabo ayaa maanta dilay saddex neef oo isugu jiray laba lo’a ah iyo dameero, kaddib markii ay xireen jidka weyn ee buundada xaafadda Isha Baydhabo.

6/2/2013 12:31 PM EST
Axad, Juun 02, 2013 (HOL) — Saraakiil ka tirsan maamulka Puntland ayaa sheegay in mid ka mid ah diyaaradaha aan duuliye lahayn ee Drones-ka loo yaqaan ay kusoo dhacday deegaan lagu magacaabo Qow oo 20-km u jira degmada Boosaaso ee xarunta gobolka Bari.

6/2/2013 12:18 PM EST
Axad, Juun 02, 2013 (HOL) — Wasiirka gaashaandhigga Soomaaliya, C/xakiin Maxamuud Xaaji Fiqi oo ku sugan Kismaayo ayaa sheegay in si wanaagsan loogu soo dhaweeyay magaalada Kismaayo ee xarunta gobolka Jubbada Hoose.

6/2/2013 12:06 PM EST
Axad, Juun 02, 2013 (HOL) — Dibadbaxayaal careysan ayaa maanta isugu soo baxay maalintii saddexaad barxadda Kizilay magaalada Ankara ee dalka Turkiga, iyadoo booliiskuna ay u adeegsadeen dibadbaxayaashaan suntan dadka ka ilmeysiisa kaddib markii ay isku dhaceen.

6/2/2013 11:21 AM EST
Axad, Juun 02, 2013 (HOL) — Madaxweynaha Puntland, C/raxmaan Sheekh Maxamed Faroole oo ku sugan magaalada Nairobi ee dalka Kenya ayaa sheegay inuu madaxweynaha Soomaaliya, Xasan Sheekh Maxamuud kala hadli doono arrimaha dastuurka iyo xal u helidda jubbooyinka.

6/2/2013 9:03 AM EST
Axad, Juun 02, 2013 (HOL) — Dowladda Kenya ayaa qorsheynaysa inay dib ugu celiso qoxootiga Soomaaliyeed ee ku jira xeryaha Dhadhaab Soomaaliya sida ay sheegtay wasiirradda arrimaha dibadda ee Kenya, Aamina Maxamed oo Nairobi kula kulantay Jicmihii shalay ra’iisul wasaare ku xigeenka ahna wasiiradda arrimaha dibadda Soomaaliya Fowziyo Yuusuf Xaaji Aadan.

6/2/2013 8:25 AM EST
Axad, Juun 02, 2013 (HOL) — Madaxweynaha Soomaaliya, Xasan Sheekh Maxamuud ayaa maanta oo Axad ah kula kulmay magaalada Yokohama ee dalka Japan guddoomiyaha hay’ada xiriirka caalamiga Japan (JICA), Akihiko TANAKA, isagoo kala hadlay go’aankii ra’iisul wasaaraha Japan, Shinzo Abe ee ahaa in Soomaaliya si toos ah kaalmada Japan loo siinayo dowladda iyo mashaariicda horumarineed ee Soomaaliya u baahan tahay.

6/2/2013 8:22 AM EST
Axad, Juun 02, 2013 (HOL) — Tacbashada beeraha waa laf-dhabarta in badan oo ka mid ah qoysaska ku dhaqan deegaannada uu hareer maro wabiga shabeelle ee gobollka Hiiraan, laakiin haddana dhinaca kale marka aad eegto waxaa muuqaneysa in sanadihii ugu danbeeyay qoysaskaas si wanaagsan uga faa'ideysan tacabka dhulka sababo la xiriira farsamo xumo iyo dhaqaalle la'aan soo food saartay.

6/2/2013 4:02 AM EST
Axad, Juun 02, 2013 (HOL) — Ciidammo madaniga oo la shaqeeya kuwa booliiska ayaa loo sameeyay xaafadaha magaalada Baydhabo, kuwaasoo la wareegay sugidda ammaanka degmada Baydhabo oo bilihii ugu dambeeyay ahayd mid kacsan.