3/19/2024
Today from Hiiraan Online:  _
Wararka Maanta- Arbaco, Jan 9 , 2013
Munaasabad uu xilka kula wareegayay Xoghayaha cusub ee Dowladda Hoose ee Laascaanood oo Maanta dhacday

Arbaco, Jannaayo 09, 2013 (HOL) — Munaasabad uu xilka kula wareegayay xoghayaha dowladda hoose ee Laascaanood oo maanta ka dhacday xarunta gobolka Sool ee Laascaanood, iyadoo xoghayahan uu ka mid ahaa xubihii ku soo baxay doorashooyinkii golaha degaanka ee bishii lasoo dhaafnay ka dhacay Somaliland.

Cabdi Khayre Dirrir oo ah xoghayaha xilka la wareegay ayaa xusay inuu aad ugu faraxsan yahay xilka uu la wareegayo, waxaa isagana goobta ka hadlay xoghayihii hore ee talada wareejiyay, Xasan Cashuur Abyan oo faahfaahin ka bixiyay waxqabadkiisa muddadii uu xilka haya iyo heerka ay maanta joogto dowladda hoose ee degmada Laascaanood.

Xoghayaha cusub ayaa ballan-qaaday inuu dusha u ridan doono howsha hor-taalla ee shacabku u igmadeen; isagoo xusay inuusan awooddiisa cidna ugu eexan doonin, wuxuuna intaas ku daray inuu dareensan yahay inay jiraan caqabado ka hor-imaanaya balse uu aaminsan yahay inuu ka dabaalan-doono.

Qaar ka mid ah xildhibaannada golaha deegaanka, wax-garad iyo odayaashii halkaas ka hadlay ayaa u soo jeediyay xoghayaha cusub daloolada dowladda hoose ee laga doonayo inuu daboolo, waxayn sidoo kale xuseen inay jiraan cabashooyin dhinaca dadweynaha ka imaanaya, kuwaasoo laga doonayo inuu ka gudbo, iyagoo ammaan u soo jeediyay xog-hayihii hore.

Duqa degmada Laascaanood, Cabdulqaadir Jaamac Saalax oo ugu dambeyn ka hadlay munaasabadda ayaa hoosta ka xariiqay in xoghayaha cusub looga baahan yahay dadaal iyo dulqaad dheeraad ah, isagoo intaas ku daray inuu si aad ah uga dayriynayo dakhliga dowladda hoose soo gala oo uu sheegay inuusan ahayn sida laga filaayo dadkuna aanay u bisleyn bixinta cashuuraha.

Xil-wareejintan ayaa kusoo beegantay xili ay dhibaatooyin aad u baahsan ka taagan yihiin dowladda hoose oo u badan khilaafka dhulka, waxayna dad badan saadaalinayaan in laga yaabo in xog-hayaha cusub oo ah nin dhallinyaro ah oo kasoo jeeda magaalada uu suura-gelin karo xal loo helo mashaakilaadkaas.

Si kastaba ha ahaatee, Cabdi Khayre oo ay daba-taagan yihiin gole deegaan oo ka kooban 21 dhalinyaro ah oo ay ka mid yihiin duqa degmada Laascaanood iyo ku xigeenkiisa, dhinaca kalena rabitaanka dadweynaha oo aan boos badani uga banaaneyn iyo shaqaale aan xisaabtan xooggani marna soo marin una foofa guruubaysi la eegayaa sida uu uga gudbi karo waqtiga ee kusoo fool leh.

Saynab Cabdi Warsame, Hiiraan Online
[email protected]
Laascaanood, Gobolka Sool













Click here
1/9/2013 2:22 PM EST
Arbaco, Jannaayo 09, 2013 (HOL) — Wasiiradda wasaaradda horumarinta iyo adeegga bulshada xukuuumadda Soomaaliya, Maryan Qaasim Axmed ayaa maanta oo Arbaco ah dib ugu soo laabatay Muqdisho, kadidb safaro ay toddobaadyo ku maraysay dalalka Turkiga iyo Tuuniisiya, waxaana la socday wufuud ka socday dowladda Turkiga uu u kuurlgalaya sidii horumarin loogu sameyn lahaa dalka.

1/9/2013 1:43 PM EST
Arbaco, Jannaayo 09, 2013 (HOL) — Hay’adda dhakhaatiirta aan xuduudda lahayn ee MSF ayaa weydiistay dowladda Soomaaliya in baaritaan dhab ah lagu sameeyo gacan-ku-dhiigle ku dilay Muqdisho laba shaqaalahooda ka mid ah bishii December ee sannadkii 2011 oo dhawaan xabsiga dhexe ee Muqdisho laga sii-daayay.

1/9/2013 12:05 PM EST
Arbaco, Jannaayo 09, 2013 (HOL) — Hoggaamiyaha kooxaha burcabadeedda ah ee gobollada dhexe ee Soomaaliya, Maxamed Cabdi Xasan [Af-weyne] ayaa maanta kaga dhawaaqay degmada Cadaado ee gobolka Galguduud in isaga iyo raggii la shaqeynayay ay joojiyeen falalka burcadbdeednimo oo uu sheegay nay ku kalliftay inay tanaasulaan codsiyo dhowr jeer loosoo jeediyay iyo dhibaato ay kala kulmeen burcadbadeednimada.

1/9/2013 11:36 AM EST
Arbaco, Jannaayo 09, 2013 (HOL) — Guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan) ayaa sheegay in maamulkiisu uu wado qorshayaal uu kusoo celinayo ammaanka guud ee caasimadda, sidoo kalena ay ku duminayaan dhismayaasha sharci-darrada ah ee laga dhisay hareeraha waddooyinka Muqdisho.

1/9/2013 11:35 AM EST
Arbaco, Jannaayo 09, 2013 (HOL) — Askar ka tirsan ciidamada dowladda Soomaaliya iyo xoogagga Ahlusunna ee ku sugan gobolka Gedo oo dhawaan ay ka dhaceen dagaallo culus ayaa maanta loo dhoofiyay dalka Itoobiya si loogu soo daweeyo.

1/9/2013 8:05 AM EST
Arbaco, Jannaayo 09, 2013 (HOL) — Hal qof ayaa ku dhintay, illa toban kalana way ku dhaawacmeen mudaharaad saaka ka dhacay magaaladda Saylac, ka dib markii dad ka xanaaqsan maayarka cusub ee loo doortay degmada saylac ay isku xeereen dawladda hoose ee magaaladaasi. Ciidamadda milatariga iyo booliska ayaa saaka aroortii hore isku dayey inay dadkaasi ka dareeriyaan xaruntaasi, balse way u suurtogali wayday ilaa markii dambe ay xoog u adeegsadeen, waxaana rasaastii ciidankaasi rideen ku dhaawacmay ilaa toban qof oo mid ka mid ahi la sheegay inuu dhaawacii u dhintay.

1/9/2013 8:02 AM EST
Arbaco, Jannaayo 09, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa maanta digreeto madaxweyne ku Dhaqan-geliyey Xeerka Hay’adda Sirdoonka Qaranka Xeer Lr. 59/2012.

1/9/2013 3:27 AM EST
Arbaco, Jannaayo 09, 2013 (HOL) — Madaxweynaha Puntland oo xalay ka khudbadeynayey munaasabad lagu xusayey sanad guuradii 4-aad ee kasoo wareegtey markii xilka loo doortay, ayaa soo hadal qaaday arimo badan oo ku saabsan ammaanka Puntland, howlihii shidaal-baarista iyo eedeymaha xiligan xukuumaddiisa uga imaanaya dhinaca siyaasiyiinta mucaaradka ah.

1/9/2013 3:24 AM EST
Arbaco, Jannaayo 09, 2013 (HOL) — Munaasabad ballaaran oo lagu xusayey sanad guuradii afaraad ee kasoo wareegtey xiligii la doortay madaxweynaha Puntland iyo ku xigeenkiisa, islamarkaana muddo 5-saac ka badan socotey ayaa xalay ka dhacday xarunta madaxtooyada ee magaalada Boosaaso.

1/9/2013 1:45 AM EST
Arbaco, Jannaayo 09, 2013 (HOL) — Kaddib kulan saraakiisha ciidamada Jabuuti AMISOM ay la qaateen mas’uuliyiinta maamulka gobollka Hiiraan iyo odayaasha dhaqanka magaalada Baladweyne ayaa waxaa leysku weydaarsaday macluumaad iyo aragtiyo ku saabsan isbadalka dhinaca nabad-galyada ah ee ka jira waqtigan magaalada iyo wada shaqeyn buuxda oo ay yeeshaan odayaasha iyo saraakiisha AMISOM.

1/9/2013 1:09 AM EST
Arbaco, Jannaayo 09, 2013 (HOL) — Madaxweynaha Puntland, C/raxmaan Sheekh Maxamed Faroole oo ka hadlayay dabbaal-deg loo sameeyay afar sano guuuradii kasoo wareegtay markii loo doortay madaxweynenimada Puntland oo xalay ka dhacday Boosaaso ayaa ka digay in dib u habeyn lagu sameeyo dastuurka dowladda federaalka Soomaaliya.

1/9/2013 12:33 AM EST
Wasiirka Arrimaha Dibadda ee Soomaaliya Marwa Fowziya Yuusuf Xaaji Aadan ayaa Booqatay qaar ka mid ah xaruumihii hantida ma guurtada ah ee Soomaaliya ku laheyd dalka Talyaaniga.