2014-04-24
Today from Hiiraan Online:  _
Wararka Maanta- Talaado, Jan 29, 2013
Xildhibaanno ka tirsan Baarlamaanka Soomaaliya oo booqanaya deegaano ka Tirsan Gobolka Galguduud

Talaado, Jannaayo 29, 2013 (HOL) — Wafdi xildhibaanno ah oo ka tirsan baarlamaanka Soomaaliya ayaa booqanaya deegaanno ka tirsan gobollka Galguduud, halkaasoo ay kulamo kula leeyihiin mas’uuliyiinta gobollka iyo qeybaha kala duwan ee bulshada.

Wafdiga ka socda baarlamaanka oo ka kooban lix mudane ayaa socodaalkooda ka bilaabay degmada Guri-ceel ee gobolka Galguduud oo ay kulamo kula qaateen maamulka degmada iyo qeybaha bulshada oo si weyn halkaa ugu soo dhaweeyay, iyagoo uga sii gudbay degmooyinka Dhuusa-mareeb iyo Caabud-waaq oo isla gobolka ka tirsan.

Xildhibaan Mahad Max’ed Salaad oo ka mid ah mudanayaasha baarlamaanka Soomaaliya ee booqanaya Galguduud oo la hadllay warbaahinta ayaa sheegay in ujeedada socdaalkooda tahay u kuur-galida xaalada deegaannada gobollka oo mud dheer sida uu sheegay aysan imaan wafdi intan la eg oo ka socda dowladda .

"Annaga ujeedada socdaalkeena waa in aan marka hore bal u kuur-galo xaaladaha nolaleed iyo nabad-galyo ee ka jira deegaannada gobollka, sidoo kalana waxaan hor dhac u nahay wafdi ka socda dowladda dhexe oo halka booqasho ku iman doona,’’ ayuu yiri xildhibaannka.

Sidoo kale, Xildhibaan Jawaahir Axmed oo ka mid mudanayaasha baarlamaanka Soomaaliya ee booqanaya gobollka Galguduud ayaa meel fagaaro ah dad isugu soo baxay soo dhaaweyntooda ka sheegtay in ay u socdaan isku xirka gobollka iyo dowladda dhexe, madaama ay iyagu yihiin xildhibannadii gobollka uga wakiilka ahaa dowladda.

Guddoomiyaha degmada Guri-ceel Cismaan Ciise Nuur Taar-dhuuleed oo ka mid ahaa mas’uuliyiinta gobollka ku soo dhaweysay xubanaha ka tirsan baarlamaanka Soomaaliya, ayaa sheegay in ka maamul ahaan ay siweyn u soo dhaweynayaan xildhibaannada, isaga oo sheegay in marka ay dib ugu laabtaan Muqdisho looga baahan yahay in ay dowladda hor dhigaan xaqiiqda dhabta ah ee ka jirta gobollka.

"Bulshada dhaxgala oo wareysta si aad wax badan u ogaataan, waa in aad xogta aad ka ururisaan deegaannada gobollka si toos ah ugu gudbisaan dowladda,'' ayuu yiri guddoomiyaha degmada Guri-ceel ee gobolka Galguduud.

Wafdiga xildhibaannada ah ee booqanaya gobollka Galguduud ayaa noqonaya kii ugu horeeyay ee gaaray gobolka tan iyo markii la dhisay baarlamaanka dowladda federaalka, iyadoo la filayo dhawaan in ay gobollka tagaan wafdi heer wasiirro ah oo ka socda xukuumada Soomaaliya.

C/raxmaan Diini, Hiiraan Online
diini@hiiraan.com
Baladweyne, Soomaaliya





Post your comments

2013-01-29 12:29 PM EST
Talaado, January 29, 2013(HOL): Waxaa Hotelka Kilimanjaro ee ku yaalla magaalada Dar es Salaam ee dalka Tanzania ka dhacday Xaflad aad u heer sarreysay oo lagu sagootinayay wafdigii iyo Ciyaartoydii Kubbadda Koleyga Soomaaliyeed ee guulaha taariikhi ahaa ka soo hooyay Tartankii Africa Zone 5 ee lagu qabtay magaalada Dar es Salaam .

2013-01-29 6:54 AM EST
Talaado, Jannaayo 29, 2013 (HOL) — Wasiirka warfaafinta, isgaarsiinta iyo gaadiidka xukuumadda Soomaaliya, Cabdullaahi Ciilmooge Xirsi oo shir jaraa'id ku qabtay Muqdisho ayaa sheegay in ruuxii ismiidaaminta ka geystay afaafka hore ee xafiiska ra'iisul wasaaraha Soomaaliya oo madaxtooyada ku dhow uu kasoo goostay Al-shabaab.

2013-01-29 6:37 AM EST
Talaado, Jannaayo 29, 2013 (HOL) — Ergayga Midowga Afrika ee arrimaha Soomaaliya, danjire Maxamed Anaadiif iyo danjiraha Tallyaaniga ee Soomaaliya, Mr. Andrea Mazzella ayaa cambaareeyay weerarkii Ismiidaaminta ahaa ee ka dhacay afaafka hore ee xarunta madaxtooyada Soomaaliya.

2013-01-29 3:52 AM EST
Talaado, Jannaayo 29, 2013 (HOL) — Bannaanbax laga soo horjeedo fidinta xarumaha xisbiga HORSEED ee talada Puntland haya ayaa ka dhacay magaaladda Buuhoodle ee gobolka Cayn.

2013-01-29 3:39 AM EST
Talaado, Jannaayo 29, 2013 (HOL) — Madaxweynaha Soomaaliya Xassan Sheekh Maxamud iyo wafdiga uu hoggaaminayo ayaa xalay gaaray magaalada Brussels ee xarunta dalka Belgium, halkasoo uu kaga qaybgalayo shir ay leeyihiin dalalka Midowga Yurub, kasoo lagu soo qaadayo arrimaha dalka Soomaaliya.

2013-01-29 3:02 AM EST
Talaado, Jannaayo 29, 2013 (HOL) — Ugu yaraan laba qof oo uu ku jiro ruux ismiidaamiye ahaa ayaa ku dhintay weerar ismiidaamin oo ka dhacay afaafka hore ee xafiska ra'iisul wasaaraha Soomaaliya oo ku dhow xarunta madaxtooyada Soomaaliya, waxaana ku dhaawacmay weerarkaas tiro kale.