12/18/2014
Today from Hiiraan Online:  _
Wararka Maanta- Isniin, Jan 28, 2013
Ciidamada Dowladda Somalia oo Baaritaanno ka sameeyay Xaafado dhowr ah oo ka tirsan Degmooyinka Huriwaan iyo Yaaqshiid


Isniin, Jannaayo 28, 2013 (HOL) — Ciidmada dowldda Soomaaliya ayaa howgallo ay kusoo qabqabteen xubno ay uga shakisan yihiin Al-shabaab ka sameeyay maanta xaafado ka tirsan degmooyinka Yaaqshiid iyo Huriwaa ee gobolka Banaadir.

Howgalladan ayaa waxay billowdeen xalay gellinkii dambe, iyadoo saraakiisha ciidamadu ay sheegeen inay kusoo qabqabteen 450-qof oo ay soo dhex-saareen 26-qof oo lagu tuhusan yahay inay Al-shabaab ka tirsan yihiin.

“Xaafadaha Al-cadaala, Suuqa Dayax iyo Waxara-cadde ayaan ka sameynay howlgallo aan ku raadinaynay dad aan xog ka haynay oo Al-shabaab ka mid ah, waxaana dadkii aan howgalladaas kusoo qabannay kala baxnay 26-qof oo ay ku jiraan kuwii aan tuhunsanayn,” ayuu yiri Khaliif Axmed Ere goo ah taliyaha nabadsugidda gobolka Banaadir .

Sidoo kale, taliyaha ayaa sheegay in dhallinyaradii kale ee guryahooda laga soo qabqabtay la fasaxay, wuxuuna howlgalkan ku tilmaamay mid ka mid ah kuwo la doonayo in lagu sugo ammaanka guud ee magaalada Muqdisho.

Ciidamada dowladda oo aad u hubeysan ayaa tan iyo xalay roondooyin  kawaday xaafadaha baaritaannada lagu sameeyay, iyadoo baaritaankan uu noqonayo kii afaraad oo degmooyinkaas lagu sameeyo muddo laba bilood gudahood ah.

Dhanka kale, goobjoogayaal ku sugan xaafadaha ay ciidamadu baarista ku sameeyeen ayaa sheegay in saakay ay ku waabariisteen ciidammo fara badan oo ku sugan guryahooda, kuwaasoo gudaha u galay guryaha halkaas  ku yaalla si ay baaritaanno ugu sameeyaan.

Magaalada Muqdisho ayaa waxaa labadii bilood ee ugu dambeeyay ka socday howlgallo baaritaanno ah, kuwaasoo saraakiisha haya’daha amaanka ay ku sheegeen in lagu sugayo ammaanka caasimadda Soomaaliya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

1/28/2013 8:18 AM EST
Isniin, Jannaayo 28, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa maanta xafiiskiisa ku qaabilay danjiraha Talyaaniga u qaabilsan arrimaha Soomaaliya, Adrea Mazzela isagoo kala hadlay sidii loo xoojin lahaa iskaashiga u dhaxeeya labada dalka.

1/28/2013 8:03 AM EST
Isniin, Jannaayo 28, 2013 (HOL) — Kulankan oo ay soo qaban-qaabiyeen shaqsiyaad ka shaqeeeya arrimaha bulshada Soomaalida ah ee ku dhaqan gobolka Minnesota ayaa waxaa markii labaad lagu marti qaaday prof: Axmed Ismaaciil Samatar iyo Cali Khaliif Galeyr, oo labaduba ka tirsan mudaneyaasha baarlamaanka Soomaaliya. Iyadoona ay madasha kulankan soo xaadireen in ka badan dad lagu qiyaasay sadex boqol oo ruux.

1/28/2013 7:28 AM EST
Isniin, Jannaayo 28, 2013 (HOL) — Golaha Wakiiladda Somaliland ayaa dood adag ka yeeshay xeerka takaaliifta (Adeegyada) madaaradda Somaliland, kuwaas oo qaarkood soo bandhigay lacago ay sheegeen in sifo sharci daro loo lunsaday, isla markaana miisaaniyadda Qaranka lagu soo darin.

1/28/2013 7:02 AM EST
Isniin, Jannaayo 28, 2013 (HOL) — Wasiirro ka tirsan xukuumadda Somalia ayaa maanta gaaray magaalada Baydhabo ee gobolka Bay, iyagoo kulammo la yeeshay waxgaradka gobollada Bay iyo Bakool, iyagoo kala hadlay maamul u smeynta gobolladaas.

1/28/2013 6:36 AM EST
Isniin, Jannaayo, 28, 2013 (HOL) – Tan iyo wixii ka danbeeyay markii ay ciidamada Jabuuti ee howlgalka midowgga Africa AMISOM iyo ciidamo si gaar ah loo tababaray oo ka tirsan maamulka gobolka Hiiraan la wareegeen sugida amniga Baladweyne waxaa is badal muuqda ku yimid nabad-galyada magaalada, taasoo keentay in ay dib u shaqo galaan goobihii danta-guud ee mudada dheer aan shaqeyn.

1/28/2013 6:18 AM EST
Isniin, Jannaayo 28, 2013 (HOL) — Xukuumadda Somaliland ayaa sheegtay in ay baadhanayaan cabsida ay ingiriisku ka muujiyey nabadgalyada dalka, waxaaanay xuseen in aanay wax cabsi ah iyo nabadgalyo daro jirin oo ay nabadu ku jirto gacanta ciidamadda amniga.

1/28/2013 2:44 AM EST
Isniin, Jannaayo 28, 2013 (HOL) — Xafiiska arrimaha dibadda ee Britain ayaa ugu baaqay muwaadiniintooda ku sugan Somaliland inay si dhaqso ah uga baxaan halkaas, kaddib markii ay soo baxeen sida warbixinta lagu xusay khataro cusub oo kusoo food leh dadka reer galbeedka ah ee Somaliland ku sugan. Iyadoo naamulka Somaliland uu arrintaas ka hadlay.

1/28/2013 2:10 AM EST
Isniin, Jannaayo 28, 2013 (HOL) — Saraakiisha ciidamada ammaanka dowladda Soomaaliya ayaa shaaca ka qaaday in ay wadaan baaritaanno xooggan oo lagu ogaanayo dadka ka danbeeya dilalka magaalada Muqdisho loogu geeysto wariyeyaasha.

1/28/2013 12:40 AM EST
Isniin, Jannaayo 28, 2013 (HOL) — Madaxweynaha dowladda Soomaaliya, Xasan Sheekh Maxamuud oo khudbad dheer ka jeediyay kulanka Midowga Afrika ee shalay ka furmay magaalada Addis Ababa ee xarunta Itoobiya ayaa ka dalbaday dalalka Afrika inay gacan siiyaan Soomaaliya, isagoo xusay in Soomaaliya ay dib ugu soo laabatay beesha caalamka doorkeedana uu yahay mid aan la yareysan karin.