3/19/2024
Today from Hiiraan Online:  _
Wararka Maanta- Jimco, Jan 25, 2013
Ra’iisul Wasaaraha Soomaaliya oo hoosta ka xariiqay in Midnimada Ummadda Soomaaliyeed ay tahay Muqaddas

Jimco, Jannaayo 25, 2013 (HOL) —Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in midnimada Soomaaliya ay tahay mid laga maarmaan ah oo howlaha horyaalla dowladda ay ka mid yihiin sidii midnimada ummaddan loo ilaalin lahaa.

Mudane Saacid ayaa sheegay in madaxda dowladdu ay yihiin kuwo si wadajir ah u shaqeynaya, caalamkana uu ka dalbanayo inay dowladda Soomaaliya ku garab-istaagaan soo celinta midnimada ummadda Soomaaliyeed.

“Shacabka waxaan ugu baahanaa inay ka shaqeyaan midnimadooda; waayo wadajir la’aan lama gaari karo hadafka la higsanayo. Beesha Caalamkana waxaan ka codsanayaa inay ku taageeraan shacabka Soomaaliyeed sidii ay horumar ku gaari lahaayeen,” ayuu ra’iisul wasaaruhu ku yiri hadal dheer oo uu shalay ka jeediyay munaasabad lagu soo dhaweynayay aqoonsigii ay dowladda Mareykanku siisay dowladda Soomaaliya.

Ra’iisul wasaaruhu wuxuu sheegay in dowladdiisu ay dadaal u geli doono sidii ay horumar ku gaarsiin lahayd shacabka Soomaaliyeed kaddib 22-sano oo ay colaado iyo dhibaatooyin kusoo jireen.

“Waxaa ii muuqda mustaqbal ifaya. Haddeynaan isku dhuubnaa oo aanan joojin hadallada aan macnaha badan lahayn iyo kutiri-ku-teenta ma gaari karno halka halka aan doonayno inaan gaarno, waana kala daadan doonnaa,” ayuu yiri mudane Saacid.

Ugu dambeyn, ra’iisul wasaaraha Soomaaliya ayaa shacabka Soomaaliyeed ugu baaqay inay dowladda gacan ku siiyaan sugidda ammaanka iyo dib u dhiska dalka, isagoo xusay in hadafkoodu uu yahay in Soomaaliya ay gaarsiiiyaan meel ka wanaagsan halka ay hadda joogto.

Ra’iisul wasaaraha Soomaaliya ayaa xilka loo magacaabay horraniti bishii November ee sannadkii hore, isagoo soo dhisay xukuumad tiro yar oo ay ku jiraan laba haween ah oo middood loo dhiibay xilka ra’iisul wasaare ku xigeenka iyo wasiirka arrimaha dibadda Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/25/2013 5:36 PM EST
Jimco, January 25, 2013(HOL): Xulka Qaranka Kubadda Kolayga Soomaaliya oo tartanka FIBA Zone 5 ee dalka Tanzania ka socda ka qeybgelaya ayaa waxaa uu soo gaaray rubac-dhammaadka tartanka ama semi-finalka, hayeeshee ciyaartii caawa dhexmartay Somalia iyo Rwanda ayuu xulka Somalia ku haray.

1/25/2013 12:45 PM EST
Jimco, Jannaayo 25, 2013 (HOL) —Danjiraha Kenya u fadhiya Qaramada Midoobay, Macharia Kamau ayaa weydiistay Qaramada Midoobay in dalka Kenya loo celiyo dhaqaalihii kaga baxay howgalkii milateri ee ay ku galeen Soomaailya.

1/25/2013 12:23 PM EST
Jimco, Jannaayo 25, 2013 (HOL) —Kooxo hubeysan ayaa gallinkii dambe ee maanta ku dilay deegaan lagu magacaabo Hargaanti oo 40-km ka baxsan degmada Bu’aale ee gobolka Jubbad Dhexe nabaddoon lagu magacaabi jiray Daahir Caydiid.

1/25/2013 11:56 AM EST
Jimco, Jannaayo 25, 2013 (HOL) —Taliyaha hay’adda nabad-sugidda Qaranka Soomaaliyeed, Axmed Macallin Fiqi ayaa sheegay inaysan waxba ka jirin warar sheegaya in dadka lagu soo qabqabto howgallda laga sameeyo Muqdisho qaarkood lagu sii-daayo lacago.

1/25/2013 11:35 AM EST
Jimco, Jannaayo 25, 2013 (HOL) —Shabakadda isku xirna bulshada ee Twitter ayaa xannibtay maanta oo Jimco ah boggii ay Al-shabaab ku lahayd shabakaddaas, kaddib markii ay ku baahiyeen sawirro muujinaya mid ka mid ah askarta kumaandooska Faransiiska oo la dilay iyo hanjabaad lagu sheegay in la dilayo Dennis Allex.

1/25/2013 1:27 AM EST
Jimco, Jannaayo 25, 2013 (HOL) —Madaxweynaha Dowladda Soomaaliya, Xasan Sheekh Maxmauud ayaa sheegay in dowladdiisu ay ka hortagayso saddex qodob oo aad u fool xun, kuwaasoo uu sheegay inuu ka mid yahay kufsiga haweenka.

1/25/2013 1:05 AM EST
Jimco, Jannaayo 25, 2013 (HOL) —Mucaaradka Jabuuti ayaa sannadkan isku diyaarinaya ka qaybgalka doorashooyinka baarlamaanka ee dhici doona bisha Feberaayo ee sannadkan, kaddib markii is-bedel lagu sameeyay bishii November ee lasoo dhaafay nidaamka doorashada ee baarlamaanka Jabuuti kaasoo ahaa in kuraasta oo dhan ay buuxiyaan kooxdii hesha aqlabiyadda baarlamaanka, kaasoo ay mucaaradku kasoo horjeedeen.