3/19/2024
Today from Hiiraan Online:  _
Wararka Maanta- Jimco, Jan 25, 2013
Madaxweynaha Soomaaliya o sheegay in Dowladdu ay ka hortagayso Saddex Arrimood oo uu ka mid yahay Kufsiga

Jimco, Jannaayo 25, 2013 (HOL) —Madaxweynaha Dowladda Soomaaliya, Xasan Sheekh Maxmauud ayaa sheegay in dowladdiisu ay ka hortagayso saddex qodob oo aad u fool xun, kuwaasoo uu sheegay inuu ka mid yahay kufsiga haweenka.

Xasan Sheekh ayaa hadalkan ku sheegay khudbad uu shalay ka jeediyay kulan lagu soo dhaweynayay aqoonsigii Mareykanka uu aqoonsatay dowladda federaalka Soomaaliya.

“Uma dulqaadanayno qofka qof kale dila, mana jirto cid laga yeelayo inay soo daba-gasho. Alle bani’aadamka waa karaameeyay mana ogolaan karno in qof si macno-darro ah lagu dilo,” ayuu yiri madaxweyne Xasan Sheekh oo soo ku celcelinayay xikmadda ah ‘Geeridu mar-bay nolosha dhaantaa’.

Sidoo kale, madaxweynuhu wuxuu sheegay inay ka hortagayaan kufsiga loo geysto haweenka, isagoo sheegay inaysan jirin cid inta kufsi u geysato gabar Soomaaliyeed oo aan wax dhibaato ah u geysan ay haddana meeshay doonto iska marto iyadoo aan sharciga la horgeyn.

“Gabdhaha Soomaaliyeed waa sharafta iyo haybadda dadkeenna, mana ogolaan karno in la kufsado ama dhibaato loo geysto. Qof walba oo ku kaca kufsi waxaa la marin doonaan sharciga,” ayuu yiri Xasan Sheekh.

Madaxweynaha Soomaaliya ayaa bishii November ee sannadkii hore Muqdisho ka sheegay in askarigii lagu helo fal kufsi ah uu xukunkiisu noqon doono dil toogasho, iyadoo bishan laba askari oo lagu toogtay Muqdisho uu mid ka mid ah ku eedeysnaa kufsi.

Dhanka kale, madaxweynaha Soomaaliya wuxuu sheegay inay dagaal adag la geli doonaan inta ay xukunka hayaan musuqmaasuqa oo uu sheegay inuu yahay mid dhabarka ka jabinaya horumar uu dalku gaaro, isagoo sheegay in askari, rayid, oday, wiil iyo gabar haddii ay musuqmaasuq sameeyaan uusan matelin wasaaradda ama xafiiska uu ka shaqeeyo uu falkaas uu isaga ku kooban yahay.

“Waxaa la yiraahdaa wasaaradda maaliyadda ayaa musuqmaasuqaas ka dhacay, marka waxaan halkan ka sheegayaa in falkaas aysan sameyn wasaaradda maaliyadda, balse uu sameeyay shaqsi ka shaqeynayay ayna habboon tahay in sidaas loo ogaado, sidoo kale, ruuxa ka tirsan xafiiska madaxtooyada ee wax xada isaga ayuu falkaas tuugonimada ah ku kooban yahay. Waxaana shacabka ka codsanayaa inaysan tuugada qarsan,” ayuu yiri madaxweyne Xasan Sheekh.

Ugu dambeyn, madaxweynaha Soomaaliya wuxuu sheegay inay dowladdiisu difaaci doonto suxufiyiinta, balse aysan ogolaan doonin in suxufi uu dalkan ka shaaciyo warar been ah oo aan waxba ka jirin isagoo lagu sabayo lacag yar si dalka uu fidno uga abuuro.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/25/2013 5:36 PM EST
Jimco, January 25, 2013(HOL): Xulka Qaranka Kubadda Kolayga Soomaaliya oo tartanka FIBA Zone 5 ee dalka Tanzania ka socda ka qeybgelaya ayaa waxaa uu soo gaaray rubac-dhammaadka tartanka ama semi-finalka, hayeeshee ciyaartii caawa dhexmartay Somalia iyo Rwanda ayuu xulka Somalia ku haray.

1/25/2013 12:45 PM EST
Jimco, Jannaayo 25, 2013 (HOL) —Danjiraha Kenya u fadhiya Qaramada Midoobay, Macharia Kamau ayaa weydiistay Qaramada Midoobay in dalka Kenya loo celiyo dhaqaalihii kaga baxay howgalkii milateri ee ay ku galeen Soomaailya.

1/25/2013 12:23 PM EST
Jimco, Jannaayo 25, 2013 (HOL) —Kooxo hubeysan ayaa gallinkii dambe ee maanta ku dilay deegaan lagu magacaabo Hargaanti oo 40-km ka baxsan degmada Bu’aale ee gobolka Jubbad Dhexe nabaddoon lagu magacaabi jiray Daahir Caydiid.

1/25/2013 11:56 AM EST
Jimco, Jannaayo 25, 2013 (HOL) —Taliyaha hay’adda nabad-sugidda Qaranka Soomaaliyeed, Axmed Macallin Fiqi ayaa sheegay inaysan waxba ka jirin warar sheegaya in dadka lagu soo qabqabto howgallda laga sameeyo Muqdisho qaarkood lagu sii-daayo lacago.

1/25/2013 11:35 AM EST
Jimco, Jannaayo 25, 2013 (HOL) —Shabakadda isku xirna bulshada ee Twitter ayaa xannibtay maanta oo Jimco ah boggii ay Al-shabaab ku lahayd shabakaddaas, kaddib markii ay ku baahiyeen sawirro muujinaya mid ka mid ah askarta kumaandooska Faransiiska oo la dilay iyo hanjabaad lagu sheegay in la dilayo Dennis Allex.

1/25/2013 1:40 AM EST
Jimco, Jannaayo 25, 2013 (HOL) —Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in midnimada Soomaaliya ay tahay mid laga maarmaan ah oo howlaha horyaalla dowladda ay ka mid yihiin sidii midnimada ummaddan loo ilaalin lahaa.

1/25/2013 1:05 AM EST
Jimco, Jannaayo 25, 2013 (HOL) —Mucaaradka Jabuuti ayaa sannadkan isku diyaarinaya ka qaybgalka doorashooyinka baarlamaanka ee dhici doona bisha Feberaayo ee sannadkan, kaddib markii is-bedel lagu sameeyay bishii November ee lasoo dhaafay nidaamka doorashada ee baarlamaanka Jabuuti kaasoo ahaa in kuraasta oo dhan ay buuxiyaan kooxdii hesha aqlabiyadda baarlamaanka, kaasoo ay mucaaradku kasoo horjeedeen.