3/19/2024
Today from Hiiraan Online:  _
Wararka Maanta- Isniin, Jan 21, 2013
Xildhibaan Baar Siciid oo Dhaliishay xeer cusub oo ay sameysay Wasaaradda Duulista Hawadda Somaliland



Isniin, Jannaayo 21, 2013 (HOL) — Golaha Wakiiladda ayaa loo qaybiyey xeerka takaalifta madaaradda oo si weyn uga qayliyeen xildhibaanadda golaha Wakiiladda.

Xeerkan adeega madaaradda Somaliland, ayaa buuq iyo muran ka dhex abuuray golaha Wakiiladda waxaana xildhibaanadda sida weyn uga soo horjeedda ka mid ah xildhibaan Baar Siciid oo si adag uga dayrisay xeerkan iyo saameynta uu ku yeelanayo dadweynaha ka soo dega madaaradda.

Xildhibaan Baar Siciid oo ah gabadha kaliya ee golahaasi ku jirta ayaa xeerkan iyo habka uu cashuurta uga qaadayo Wasiirka Duulista Hawadda Maxamuud Xaashi Cabdi dadweynaha adeegsada madaarada ku tilmaamtay mid xaaraan ah oo aanay marna ogolaanayn in xeerkaasi ay ansixiso.

“Xeerkan waxaan  u arkaa mid xaaran ah oo lagu boobayo shacabka reer Somaliland, iyo shacabka kale ee dalka imanaya ee cidday doontaba leh ee doonaya inay dalka maalgashadaan iyo kuwa dalxiiska ku imanayaba waa xeer lidi ku ah ”ayey tidhi xildhibaan Baar Siciid oo ka soo horjeedda xeer cusub oo cashuur lagaga qaadayo dadka soo degaya ama ka dhoofaya madaaradda.

Xildhibaan Baar oo ka hadlaya  waxa uu kaga duwan yahay xeerarka kale xeerkani ayaa tidhi “Sanad kasta badhtankiisa  ama sanad miisaaniyadeeda waxa ummada lagu kordhiyaa lacag, waxa ku kordhiya dad aan xaq u lahayn inay lacagta qaadaan, lacagta waxa dawlad masuul uga ah wasaarada Maaliyada cidi kale ee lacag qaada waa xaaraan qofkasta oo soo dega waxa laga qaadayaa 78 dollar, lacagtaasi marka aad ku dhufato reeraha xaaska ah ee wakhtiga kulaylaha ah Yurub ku soo baxaya toban qof oo aad isku celceliso waxa weeyi sideed boqol oo dollar, marka ma qaadi karaan dadka shacabka ahi waana xaaraan ee ha laga digtoonaadaan, xildhibaanada waxaan usoo jeedinaya ummadda ayaad masuul ka tihiin, hadaad masuuliyadiina gabtaan wuu idin arkayaa, haddii aad u shaqaysanaa waa la idin arkayaa ilaahayna wuu idin arkayaa  dhaartiina xasuustaa wadanka boob ayaa ka socda.”

Mar ay ka hadlaysay haddii xeerka la ansixiyo oo lagaga codbato, waxay tidhi  “Xalaal ma noqonayo ee xaaraan xaaraan lagu ansixiyey ayuu noqonayaa, ninka ansixiya waa nasiibkii oo kolay anigu ma ansixinayo haddii inta kale ansixisana anigu waan diidaya waxana u tudhayaa dadka shacabka ah, ilaahay baa wax na siiya oo camankayaga wax ku guro, lacag ma rabno laaluushna ma rabno ummada ayaa na soo dooratay oo aanu difaacaynaa, haddii aan kaligay soo hadho waan diidaya oo ma ogoli xeerkaasi xaaraanta ah ee dadka lagu dulmiyeyo”.

Sdoo kale waxay wasiirka Duulista ku eedaysay inuu lacag aan sharciga waafaqsnayn ka qaadayo dadka taas oo dalka iyo dadkaba u fiicnayn, waxaanay usoo jeedisay inuu ka laabtaasi hab dhaqankaasi aan fiicneyn “ lacagta waxa ka horeeya in sharciga loo doonto, dalka waan qirayaa inay baahi ka jirto, baahi farsamo ka jirto, in wasaaradu lacag u baahan karto, laakiin waxa ka horeeya in la Xalaashado ayaa ka horaysa, lacagna cid aan wasaarada maaliyada ahayni inay lacag samaysato oo ay urursato oo qasnadeeda ku dhacdo maaha, waxaan leeyahay lacagtaasi waa lacag xaraan ah oo ummada ayaa lagu boobaya, marka xildhibaanada waxaan leeyahay ummadii idin soo dooratay way idin aragtaa”ayey tidhi Xildhibaan Baar Siciid oo qaar ka mid ah warbaahinta u waramaysay.

Si kastaba ha ahaatee, xeerkan adeega madaaradda ayaa ah xeer loo samaynayo madaarada oo dadka soo degaya iyo kuwa ka dhoofayey lacag laga qaadayo, taas oo dib loo gelin doono madaaradda, isla markaana amnigooda lagu sugi doono, haseyeeshee waxa cashuurtaasi cusub ka biyo diiday xildhibaandda qaarkood oo sheegay inay dadweynaha adeegsada madaaradda ku adag tahay, halka xildhibaano kalena ay xuseen in xeerkan loo baahan yahay oo uu la mid yahay qaabka madaarada caalamiga ahi u shaqeeyaan, isla markaana adeega looga baahnaa madaarada qayb ka qaadanayo.

Barkhad-Ladiif M. Cumar, Hiiraan Online
[email protected] 
Hargeysa, Somaliland













Click here
1/21/2013 11:51 AM EST
Isniin, Jannaayo 21, 2013 (HOL) — Madaxweynaha maamul-goboleedka Khaatumo, Maxamed Jaamac Yuusuf (Indha-sheel) ayaa shir jaraa`id oo uu maanta ku qabtay magaalada Buuhoodle wuxuu ku taageeray aqoonsiga buuxa ee dowladda Mareykanku ay siisay dowladda federaalka Soomaaliya.

1/21/2013 11:35 AM EST
Isniin, Jannaayo 21, 2013 (HOL) —Golaha wasiiradda dowladda Soomaaliya ayaa maanta shir ay isugu yimaadeen waxay uga hadleen dhowr qodob oo ay ka mid yihiin: maamul u sameynta gobollada, xaslinta dalka iyo sidii loo soo celin lahaa dhulka iyo hantida dowladda ee gacanta ugu jira shacabka.

1/21/2013 11:33 AM EST
Isniin, Jannaayo 21, 2013 (HOL) —Xukuumadda Somaliland ayaa maalintii shalay ahayd ku xoojisay wafdi uu hoggaaminayo wasiirka arrimaha gudaha, Maxamed Carraale Duur ku xoojisay laba wasiir iyo guddoomiyaha xisbiga talada haya ee Kulmiye, iyadoo xukuumaddu ay wafdigan u dhiibtay fariin ka duwan fariintii ay beesha Ciise ka diidday wasiirka arrimaha gudaha.

1/21/2013 11:10 AM EST
Isniin, Jannaayo 21, 2013 (HOL) — Madaxweyne ku xigeenka Somaliland, Cabdiraxmaan Cabdilaahi Ismaaciil (Saylici), ayaa ka qaybgalay wejigii labaad ee mashruuc lagu horumarinayo dawladaha hoose ee degmooyinka Somaliland, kuwaas oo socday shantii sanno ee hore.

1/21/2013 8:50 AM EST
Isniin, Jannaayo, 21, 2013 (HOL) -- Wafdi ka tirsan hay’addaha samafalka QM ayaa maanta booqasho ku tagay magaalada Baladweyne, kuwaasoo kala hadllay mas’uuliyiinta maamulka gobollka xaaladaha amniga magaalada.

1/21/2013 8:43 AM EST
Isniin, Jannaayo, 21, 2013 (HOL) -- Jaamacada Plasma oo ka mid ah Jaamacadaha ugu waaweyn ee ka dhisan dalka Soomaaliya ayaa faraceeda magaalada Baladweyne waxaa maanta Imtixaan u fariisatay in ka badan 100 arday ah.

1/21/2013 7:24 AM EST
Isniin, Jannaayo 21, 2013 (HOL) — Ra’iisal wasaaraha Soomaaliya, Cabdi Faarax Shirdoon (Saacid) ayaa maanta boqolaal ruux kala qaybgalay banaanbax ballaaran oo ay ku taageerayeen go’aankii dowladda Mareykanka ay ku aqoonsatay dowladnimada Soomaaliya muddo laga joogo 22-sano.

1/21/2013 3:16 AM EST
Isniin, Jannaayo 21, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo dhawaanahan safar ku joogay dalka Mareykanka ayaa xalay gaaray magaalada Riyaadh ee dalka Saudi Arabia, halkaasoo madaxweynuhu uu uga qaybgeli doono shir looga hadlayo dhaqaalaha dalalka Carabta.

1/21/2013 2:42 AM EST
Isniin, Jannaayo 21, 2013 (HOL) — Madaxweynaha Puntland, Cabdiraxmaan Maxamed (Faroole) iyo wefdi uu horkacayo oo maalntii 5aad booqasho ku jooga dalka Jabuuti ayaa la kulmay madaxweynaha dalkaas Ismaaciil Cumar Geelle iyo mas’uuliyiin kale oo ka tirsan madaxda Jabuuti.

1/21/2013 2:42 AM EST
Isniin, Jannaayo 21, 2013 (HOL) — Qaar ka mid ah haweenka kasoo jeeda gobollada Awdal, Selel iyo Gabiley ee ku noool magaalada Ottowa ee dalka Kanada ayaa deeq lacageed oo gaaraysa $2,260 doollar soo gaarsiiyay dadkii ku waxyeeloobay bannanbaxyadii ka kala dhacay degmooyinka Saylac, Boorama Iyo Lughaya.

1/20/2013 11:56 PM EST
Isniin, Jannaayo 21, 2013 (HOL) — Maamulka Puntland ayaa si weyn u soo dhaweeyay aqoonsigii ay dowladda Mareykanku siisay dowladda Soomaaliya, iyagoo ku tilmaamay aqoonsigan mid horay u sii riixi kara xiriirka ka dhexeeya Soomaaliya iyo Mareykanka.

1/20/2013 11:55 PM EST
Isniin, Jannaayo 21, 2013 (HOL) — Wasiirka arrimaha gudaha Somaliland, Maxamed Nuur Carraale (Duur) ayaa ictiraafay uu Mareykanku siiyay dowladda Soomaaliya ku tilmaamay dharbaaxo indhaha looga riday Somaliland, waxaanu Mareykanka ugu baaqay inuu qiimeeyo Somaliland iyo maamul-goboleedyada kale oo nabad kusoo dabbaalay deegaannadooda intii ay Koonfurta Soomaaliya qasnayd.