3/19/2024
Today from Hiiraan Online:  _
Wararka Maanta- Isniin, Jan 21, 2013
Puntland oo soo dhaweeyay Aqoonsiga Mareykanka uu aqoonsaday Dowladda Federaalka Soomaaliya

Isniin, Jannaayo 21, 2013 (HOL) — Maamulka Puntland ayaa si weyn u soo dhaweeyay aqoonsigii ay dowladda Mareykanku siisay dowladda Soomaaliya, iyagoo ku tilmaamay aqoonsigan mid horay u sii riixi kara xiriirka ka dhexeeya Soomaaliya iyo Mareykanka.

Dowladda Madaxweynaha ayaa si rasmi ah u aqoonsatay dowladda Soomaaliya 17-kii bishan, kaddib kulan dhexmaray madaxweyne Xasan Sheekh iyo xoghayaha arrimaha dibadda ee Mareykanka.

“Aqoonsiga uu Mareykanku siiyay dowladda Soomaaliya waa tallaabo taariikhi ah oo dhiirri-gelinaysa xiriirka u dhexeeya Soomaaliya iyo Mareykanka,” ayaa lagu yiri warsaxaafadeed uu soo saaray maamulka Puntland. Iyadoo Mareykanka uusan tan iyo sannadkii 1991-kii aqoonsanayn dowladihii soo maray Soomaaliya.

Puntland ayaa warsaxaafadeedkeeda ku sheegtay in Puntland ay horay uga qayb-qaadatay sidii dalka looga saari lahaa xilliga KMG ah, haddana waxay ka qayb-qaadanaysaa sidii nabad iyo xasillooni ay uga dhalan lahayd guud ahaan Soomaaliya. Iyadoo ugu baaqday beesha caalamka inay sii wadaan taageerada ay ka geysanayaan dib u soo celinta nabadda Soomaaliya iyo sidoo kale, gargaarka aadane, dhisidda maamul wanaagga iyo horumarinta dhaqaalaha Soomaaliya.

Sidoo kale, Puntland waxay ugu baaqday dowladda Soomaaliya oo awoodda la wareegtay loo bishii Ogoosto ee sannadkii hore inay dalka oo dhan gaarsiiso federaaliisimka, inay xoojiso xiriirka ka dhexeeya Soomaaliya iyo beesha caalamka, inay sii waddo dib u heshiisiinta iyo inay dhisto golaha sare ee baarlamaanka Soomaaliya sida uu qabo dastuurka cusub ee Soomaaliya.

Warsaxaafadeedka ayaa sidoo kale lagu yiri: "Dowladda iyo shacabka Puntland waxay u mahadcelinayaan shacabka iyo dowladda Mareykanka iyo sidoo kale, shacabka Soomaaliyeed iyo dowaldda federaalka Soomaaliya."

Dowladda Mareykanka ayaa ah dowladda ugu weyn ee dhaqaalaha badan ku taageerta ciidamada AMISOM oo dagaal kula jira Al-shabaab, kuwaasoo dhul ballaaran kala wareegay Al-shabaab 20-kii bilood ee lasoo dhaafay.

Madaxweynaha Soomaaliya, Xasan Sheekh ayaa sheegay in aqoonsigan uu albaabbada u furayo in Soomaaliya ay dib ugu laabato hay’adihii caalamiga ahaa ee ay horay uga tirsanayd. Balse aqoonsigan waxaa kasoo horjeestay maamulka Somaliland.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/21/2013 11:51 AM EST
Isniin, Jannaayo 21, 2013 (HOL) — Madaxweynaha maamul-goboleedka Khaatumo, Maxamed Jaamac Yuusuf (Indha-sheel) ayaa shir jaraa`id oo uu maanta ku qabtay magaalada Buuhoodle wuxuu ku taageeray aqoonsiga buuxa ee dowladda Mareykanku ay siisay dowladda federaalka Soomaaliya.

1/21/2013 11:35 AM EST
Isniin, Jannaayo 21, 2013 (HOL) —Golaha wasiiradda dowladda Soomaaliya ayaa maanta shir ay isugu yimaadeen waxay uga hadleen dhowr qodob oo ay ka mid yihiin: maamul u sameynta gobollada, xaslinta dalka iyo sidii loo soo celin lahaa dhulka iyo hantida dowladda ee gacanta ugu jira shacabka.

1/21/2013 11:33 AM EST
Isniin, Jannaayo 21, 2013 (HOL) —Xukuumadda Somaliland ayaa maalintii shalay ahayd ku xoojisay wafdi uu hoggaaminayo wasiirka arrimaha gudaha, Maxamed Carraale Duur ku xoojisay laba wasiir iyo guddoomiyaha xisbiga talada haya ee Kulmiye, iyadoo xukuumaddu ay wafdigan u dhiibtay fariin ka duwan fariintii ay beesha Ciise ka diidday wasiirka arrimaha gudaha.

1/21/2013 11:10 AM EST
Isniin, Jannaayo 21, 2013 (HOL) — Madaxweyne ku xigeenka Somaliland, Cabdiraxmaan Cabdilaahi Ismaaciil (Saylici), ayaa ka qaybgalay wejigii labaad ee mashruuc lagu horumarinayo dawladaha hoose ee degmooyinka Somaliland, kuwaas oo socday shantii sanno ee hore.

1/21/2013 8:50 AM EST
Isniin, Jannaayo, 21, 2013 (HOL) -- Wafdi ka tirsan hay’addaha samafalka QM ayaa maanta booqasho ku tagay magaalada Baladweyne, kuwaasoo kala hadllay mas’uuliyiinta maamulka gobollka xaaladaha amniga magaalada.

1/21/2013 8:43 AM EST
Isniin, Jannaayo, 21, 2013 (HOL) -- Jaamacada Plasma oo ka mid ah Jaamacadaha ugu waaweyn ee ka dhisan dalka Soomaaliya ayaa faraceeda magaalada Baladweyne waxaa maanta Imtixaan u fariisatay in ka badan 100 arday ah.

1/21/2013 7:33 AM EST
Isniin, Jannaayo 21, 2013 (HOL) — Golaha Wakiiladda ayaa loo qaybiyey xeerka takaalifta madaaradda oo si weyn uga qayliyeen xildhibaanadda golaha Wakiiladda.

1/21/2013 7:24 AM EST
Isniin, Jannaayo 21, 2013 (HOL) — Ra’iisal wasaaraha Soomaaliya, Cabdi Faarax Shirdoon (Saacid) ayaa maanta boqolaal ruux kala qaybgalay banaanbax ballaaran oo ay ku taageerayeen go’aankii dowladda Mareykanka ay ku aqoonsatay dowladnimada Soomaaliya muddo laga joogo 22-sano.

1/21/2013 3:16 AM EST
Isniin, Jannaayo 21, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo dhawaanahan safar ku joogay dalka Mareykanka ayaa xalay gaaray magaalada Riyaadh ee dalka Saudi Arabia, halkaasoo madaxweynuhu uu uga qaybgeli doono shir looga hadlayo dhaqaalaha dalalka Carabta.

1/21/2013 2:42 AM EST
Isniin, Jannaayo 21, 2013 (HOL) — Madaxweynaha Puntland, Cabdiraxmaan Maxamed (Faroole) iyo wefdi uu horkacayo oo maalntii 5aad booqasho ku jooga dalka Jabuuti ayaa la kulmay madaxweynaha dalkaas Ismaaciil Cumar Geelle iyo mas’uuliyiin kale oo ka tirsan madaxda Jabuuti.

1/21/2013 2:42 AM EST
Isniin, Jannaayo 21, 2013 (HOL) — Qaar ka mid ah haweenka kasoo jeeda gobollada Awdal, Selel iyo Gabiley ee ku noool magaalada Ottowa ee dalka Kanada ayaa deeq lacageed oo gaaraysa $2,260 doollar soo gaarsiiyay dadkii ku waxyeeloobay bannanbaxyadii ka kala dhacay degmooyinka Saylac, Boorama Iyo Lughaya.

1/20/2013 11:55 PM EST
Isniin, Jannaayo 21, 2013 (HOL) — Wasiirka arrimaha gudaha Somaliland, Maxamed Nuur Carraale (Duur) ayaa ictiraafay uu Mareykanku siiyay dowladda Soomaaliya ku tilmaamay dharbaaxo indhaha looga riday Somaliland, waxaanu Mareykanka ugu baaqay inuu qiimeeyo Somaliland iyo maamul-goboleedyada kale oo nabad kusoo dabbaalay deegaannadooda intii ay Koonfurta Soomaaliya qasnayd.