3/19/2024
Today from Hiiraan Online:  _
Wararka Maanta- Sabti, Jan 19, 2013
Booliis ka badan 100-Askari oo Tababar looga furay Degmada Dhuuso-mareeb ee Xarunta Gobolka Galguduud

Sabti, Jannaayo 19, 2013 (HOL) — Ciidammo booliis ah oo tiradooda ay gaarayso 160-askari booliis ah ayaa wuxuu tababar uga furmay maanta oo Sabti ah xarunta gobolka Galguduud ee Dhuusamarreeb, tababarkaas oo socon doona muddo hal toddobaad ah.

Degmada Dhuusomareeb oo ay ka taliso Ahlusunna Waljamaaca ayaa waxay noqonysaa markii ugu horreysay oo tababar looga furo ciidamo booliis ah tan iyo markii ay dhacday dowladdii dhexe ee Soomaaliya muddo hadda laga joogo 22-sano.

“Tababarkan waa kii ugu horreeyay oo ciidammo booliis ah looga furo degmada Dhuusomareeb muddo 20-sano ka badan. Tababarkan oo socon doona muddo toddobaad ah ayaa waxay ciidammadu ku baran doonaan habka sugidda ammaanka,” ayuu yiri guddoomiye ku xigeenka gobolka Galguduud, Saadaq Sheekh Yuusuf oo ka hadlayay furitaanka tababarka.

Guddoomiye ku xigeenka maamulka gobolka wuxuu sheegay in mushaarka iyo qalabka ay u baahan yihiin ciidamadan ay dowladda Soomaaliya ballan-qaaday inay iyadu bixin doonto.

Sidoo kale, guddoomkiyaha golaha fulinta ee Ahlusunna, Sheekh Yuusuf Maxamed Xeefoow oo isaguna ka hadlay xafladdii furitaanka tababarkan ayaa sheegay inay tahay wax lagu farxo, isagoo ku ammaanay dowladda federaalka ah inay markii ugu horreysay tababar uga furto Dhuusomareeb ciidammo ka tirsan booliiska Soomiaaliya.

“Waxaan idin kula dardaarmayaa inaad si wanaagsan casharrada uga faa’iideysataan, aadka isku diayaarisaan inaad ka shaqeysaa sugidda amniga degmada gobolka, gaar ahaan deegaannada aad ka howlgeli doontaa,” ayuu yiri Xeefoow oo la hadlayay ciidamadii tababarka loo furay.

Ugu dambeyn, mas’uuliyiinta gobolka Galguduud ayaa sheegay in ciidamadan laga soo xulay dhammaan deegaannada uu gobolka ka kooban yahay, iyagoo sheegay inay soo dhaweynayaan in ciidammo ammaanka suga loo tababaro degmooyinka gobolka, gaar ahaan Dhuusomareeb.

Tababarka ciidamada looga furay Dhuusomareeb ayaa wuxuu kusoo beegmayaa iyadoo dhawaan dowladda Soomaaliya iyo ururka Ahlusunna ay kala saxiixdeen heshiis ku saabsan in ciidamada Ahlusunna ay si rasmi ah uga mid noqdaan ciidamada dowladda Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/19/2013 12:09 PM EST
Sabti, Jannaayo 19, 2013 (HOL) — Maxkamad ku taalla Koonfurta dalka Yemen ayaa maanta oo Sabti ah ku xukuntay saddex ruux oo Soomaali ah min 10-sano oo xabsi ah, kaddib markii lagu helay inay afduubeen gacanka Cadan ka afduubeen dooni ganacsi.

1/19/2013 7:53 AM EST
Sabti, Jannaayo 19, 2013 (HOL) — Cabsi weyn ayaa saqdii dhexe ee xalay soo wajahay magaalada Laascaanood ee xarunta gobolka Sool kaddib markii duleedka Koonfur-barri degmadaas uu dagaal xoogan oo muddo kooban ku dhexmaray ciidamada Somaliland oo halkaas fariisin ku lahaa iyo ciidammo taabacsan maamulka Khaatumo.

1/19/2013 7:40 AM EST
Sabti, Jannaayo 19, 2013 (HOL) — Ra’iisul wasaaraha Soomaaliya, Cabdi Faraax Shirdoon (Saacid) oo shir jaraa’id ku qabtay Muqdisho ayaa soo dhaweeyay aqoonsiga ay dowladda Mareykanka aqoonsatay dowladda Soomaaliya, isagoo sidoo kale ka hadlay dil shalay loogu geystay Muqdisho wariye iyo sidoo kale wariye kale oo xiran.

1/19/2013 7:21 AM EST
Sabti, Jannaayo 19, 2013 (HOL) —Boqollaal qoys oo dhawaan ka barakacay dagaallo iyo duqeymo jaziiradda Kudhaa ee gobolka jubada hoose ku dhexmaray xoogagga Al-shabaab iyo ciidamada Kenya ayaa lagu soo waramayaa in ay ku dhibaateeysanyihiin deegaano ku dhow-dhow Jaziiradaasi.

1/19/2013 7:15 AM EST
Sabti, Jannaayo 19, 2013 (HOL) — Ciidamada dowladda Soomaaliya iyo kuwa AMISOM ayaa maanta howgallo lagu soo qabqabtay boqolaal qof ka sameeyay degmooyinka Wadajir iyo Dharkeynley ee gobolka Banaadir. Iyadoo sidoo kale uu dowladda Soomaaliya isku soo dhiibay sarkaalkii amaanka degmada Jowhar ee Al-shabaab.

1/19/2013 2:47 AM EST
Sabti, Jannaayo 19, 2013 (HOL) — Madaxweynaha Soomaaliya, Xasan Sheekh Maxamuud oo booqasho ku jooga dalka Mareykanka ayaa xalay kula hadlay magaalada Minneapolis ee gobolka Minnesota dadweyne Soomaaliyeed oo tiradoodu ahayd 5,000 oo qof.

1/19/2013 2:45 AM EST
Sabti, Jannaayo 19, 2013 (HOL) — Shirkadda Isgaarsiinta ee Golis ayaa Isbitaalka weyn ee magaalada Boosaaso ku wareejisey qaboojiye loogu tala galay in dadka meydka ah la geliyo.

1/19/2013 1:59 AM EST
Sabti, Jannaayo 19, 2013 (HOL) —Dagaal culus oo u dhexeeya ciidamada dowladda Soomaaliya oo kaashanaya kuwa Raaskaambooni iyo xoogagga al-shabaab ayaa xalay ka dhacay degmada Afmadow ee gobolka jubada hoose.

1/19/2013 12:02 AM EST
Sabti, Jannaayo 19, 2013 (HOL) — Qaramada Midoobay ayaa cambaareyn dusha uga tuurtay dhibaatooyinka loo geysto haweenka oo ay ka mid yihiin kufsiga iyo guurka khasabka ah ee lagula kaco haweenka Soomaalida, iyadoo la sheegay in qofkii dambigaas lagu helo loo gudubin doono maxkamadda caalamiga ah si loogu ciqaabo dhibaatadii uu haweenka Soomaaliyeed u geystay.

1/19/2013 12:00 AM EST
Sabti, Jannaayo 19, 2013 (HOL) —Wasiirka arrimaha gudaha Somaliland, Maxamed Nuur Carraale (Duur) ayaa la filayo inuu maanta uu soo xiro wada-hadal afarta maalmood qaatay oo uu ku joogo degmadda Saylac ee gobolka Salal kaddib markii lagu heshiin waayay doorashooyinkii golayaasha deegaanka ee halkaas ka dhashay sannadkii hore.