3/19/2024
Today from Hiiraan Online:  _
Wararka Maanta- Sabti, Jan 19, 2013
Howlgallo ballaaran oo laga sameeyay Muqdisho iyo sarkaalkii Al-shabaab ee Jowhar ee Dowladda isku dhiibay

Sabti, Jannaayo 19, 2013 (HOL) — Ciidamada dowladda Soomaaliya iyo kuwa AMISOM ayaa maanta howgallo lagu soo qabqabtay boqolaal qof ka sameeyay degmooyinka Wadajir iyo Dharkeynley ee gobolka Banaadir. Iyadoo sidoo kale uu dowladda Soomaaliya isku soo dhiibay sarkaalkii amaanka degmada Jowhar ee Al-shabaab.

Howgalladan oo ka dhacay deegaannno ku teedsan xaafadaha Nasteexo iyo silliga Mareykanka ayaa waxay kusoo qabqabteen ciidamadu hub iyo kooxo ay uga shakisan yihiin inay ka tirsan yihiin Al-shabaab.

“Waxaa howlgalladi maanta oo ay iska kaashadeen ciidamada dowaldda iyo kuwa AMISOM lagu soo qabqabtay 730-qof, waxaana afartan ka mid ah lagu tuhunsan yahay inay ka tirsan yihiin Al-shabaab, intii kale oo ahayd 690-qof waa lasii daayay,” ayuu yiri taliyaha ciidamada nabadsugidda gobolka Banaadir, Col. Khaliif Axmed Ereg.

Taliyuhu wuxuu hadalkiisa kud aray in howgalka maanta uu qayb ka ahaa howgallo lagu adkeynayo ammaanka guud ee Muqdisho, ayna socon doonaan inta caasimadda laga nadiifinayo Al-shabaab.

“Guud ahaan degmooyinka gobolka Banaadir oo dhan waa laga sameynayaa howgalladan wayna soconayaan inta laga xaqiijinayo ammaanka. Howlgalkii maanta hub aan badnayn ayaa lagu soo qabtay, kuwaasoo ahaa saddex qori,” ayuu yiri Col. Ereg.

Dhanka kale, hay’adda nabadsugida ayaa soo bandhigtay sarkaal Al-shabaab u qaabilsanaa ammaanka degmada Jowhar ee xarunta gobolka Shabeellada dhexe, kaasoo lagu magacaabo Sheekh Cumar Macallin Cali.

“Aniga waxaan ka tirsanaa Al-shabaab, waxaana la shaqeynayay muddo saddex sano ah anigoo joogay degmada Jowhar, waxaana go’aansaday inaan ka baxo, markii aan ogaaday inay shacabka dhibaato ku hayaan,” ayuu yiri Sheekh Cumar oo saxaafadda la hadlay.

Ugu dambeyn, taliyaha ayaa sheegay in howgallada ay iska kaashanayaan ciidamada dowladda Soomaaliya iyo booliiska AMISOM ay rajeynayaan inay Muqdihso u horseedaan ammaan iyo deggenaasho buuxda.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/19/2013 12:10 PM EST
Sabti, Jannaayo 19, 2013 (HOL) — Ciidammo booliis ah oo tiradooda ay gaarayso 160-askari booliis ah ayaa wuxuu tababar uga furmay maanta oo Sabti ah xarunta gobolka Galguduud ee Dhuusamarreeb, tababarkaas oo socon doona muddo hal toddobaad ah.

1/19/2013 12:09 PM EST
Sabti, Jannaayo 19, 2013 (HOL) — Maxkamad ku taalla Koonfurta dalka Yemen ayaa maanta oo Sabti ah ku xukuntay saddex ruux oo Soomaali ah min 10-sano oo xabsi ah, kaddib markii lagu helay inay afduubeen gacanka Cadan ka afduubeen dooni ganacsi.

1/19/2013 7:53 AM EST
Sabti, Jannaayo 19, 2013 (HOL) — Cabsi weyn ayaa saqdii dhexe ee xalay soo wajahay magaalada Laascaanood ee xarunta gobolka Sool kaddib markii duleedka Koonfur-barri degmadaas uu dagaal xoogan oo muddo kooban ku dhexmaray ciidamada Somaliland oo halkaas fariisin ku lahaa iyo ciidammo taabacsan maamulka Khaatumo.

1/19/2013 7:40 AM EST
Sabti, Jannaayo 19, 2013 (HOL) — Ra’iisul wasaaraha Soomaaliya, Cabdi Faraax Shirdoon (Saacid) oo shir jaraa’id ku qabtay Muqdisho ayaa soo dhaweeyay aqoonsiga ay dowladda Mareykanka aqoonsatay dowladda Soomaaliya, isagoo sidoo kale ka hadlay dil shalay loogu geystay Muqdisho wariye iyo sidoo kale wariye kale oo xiran.

1/19/2013 7:21 AM EST
Sabti, Jannaayo 19, 2013 (HOL) —Boqollaal qoys oo dhawaan ka barakacay dagaallo iyo duqeymo jaziiradda Kudhaa ee gobolka jubada hoose ku dhexmaray xoogagga Al-shabaab iyo ciidamada Kenya ayaa lagu soo waramayaa in ay ku dhibaateeysanyihiin deegaano ku dhow-dhow Jaziiradaasi.

1/19/2013 2:47 AM EST
Sabti, Jannaayo 19, 2013 (HOL) — Madaxweynaha Soomaaliya, Xasan Sheekh Maxamuud oo booqasho ku jooga dalka Mareykanka ayaa xalay kula hadlay magaalada Minneapolis ee gobolka Minnesota dadweyne Soomaaliyeed oo tiradoodu ahayd 5,000 oo qof.

1/19/2013 2:45 AM EST
Sabti, Jannaayo 19, 2013 (HOL) — Shirkadda Isgaarsiinta ee Golis ayaa Isbitaalka weyn ee magaalada Boosaaso ku wareejisey qaboojiye loogu tala galay in dadka meydka ah la geliyo.

1/19/2013 1:59 AM EST
Sabti, Jannaayo 19, 2013 (HOL) —Dagaal culus oo u dhexeeya ciidamada dowladda Soomaaliya oo kaashanaya kuwa Raaskaambooni iyo xoogagga al-shabaab ayaa xalay ka dhacay degmada Afmadow ee gobolka jubada hoose.

1/19/2013 12:02 AM EST
Sabti, Jannaayo 19, 2013 (HOL) — Qaramada Midoobay ayaa cambaareyn dusha uga tuurtay dhibaatooyinka loo geysto haweenka oo ay ka mid yihiin kufsiga iyo guurka khasabka ah ee lagula kaco haweenka Soomaalida, iyadoo la sheegay in qofkii dambigaas lagu helo loo gudubin doono maxkamadda caalamiga ah si loogu ciqaabo dhibaatadii uu haweenka Soomaaliyeed u geystay.

1/19/2013 12:00 AM EST
Sabti, Jannaayo 19, 2013 (HOL) —Wasiirka arrimaha gudaha Somaliland, Maxamed Nuur Carraale (Duur) ayaa la filayo inuu maanta uu soo xiro wada-hadal afarta maalmood qaatay oo uu ku joogo degmadda Saylac ee gobolka Salal kaddib markii lagu heshiin waayay doorashooyinkii golayaasha deegaanka ee halkaas ka dhashay sannadkii hore.