3/19/2024
Today from Hiiraan Online:  _
Wararka Maanta- Sabti, Jan 12, 2013
Xildhibaan ka tirsan Baarlamaanka Soomaaliya oo lagu weeraray Qarax Miino iyo Qarax kale oo Muqdisho ka dhacay

Sabti, Jannaayo 12, 2013 (HOL) — Magaalada Muqdisho ayaa waxaa maanta ka dhacay laba qarax oo mid ka mid ha lagu weeraray gaari uu watay xildhibaan ka tirsan baarlamaanka Soomaaliya, iyadoo ay ku dhaawacmeen qaraxaas laba ka mid ah ilaaladii xildhibaanka.

Qaraxa lagu weeraray gaariga xildhibaanka ayaa wuxuu ka dhacay xaafadda Buulo-xuubeey ee degmada Wadajir, waxaana qaraxa kale  oo aan la garanayn khasaraha ka dhashay uu isaguna ka dhacay xaafadda warshadda caanaha ee degmada Hodan.

"Gaari uu watay xildhibaan ka tirsan baarlamaanka Soomaaliya ayaa ka dhacay xaafadda Buulo-xuubeey, wuxuuna ahaa miino dhulka lagu aasay. Xildhibaanka oo lagu magacaabo Maxamed Cabdullaahi wax kasoo gaaray ma jirto, balse laba ilaaladiisa ka mid ah ayaa waxaa kasoo gaaray dhaawacyo kala duwan," ayuu yiri afhayeenka booliiska Soomaaliya, Col. Cabdullaahi Xasan Bariise oo  saxaafadda uga war-bixiyay qaraxyada.

Afhayeenku wuxuu sidoo kale sheegay in qaraxii ka dhacay warshada caanaha aysan ogeyn khasaaraha ka dhashay balse ay ciidammo booliis ah u direen si ay u soo hubiyaan waxyeellada uu geystay.

Magaalada Muqdisho oo dhawaanahan ahayd mid deggen ayaa waxay qaraxyadan noqonayaa kuwii ugu horreeyay oo sannadkan cusub ka dhaca magaalada Muqdisho ee xarunta Soomaaliya.

Ciidamada dowladda ayaa la sheegay inay 10-qof u qabqabteen qaraxii lagu weeraray gaariga mudanaha ka tirsan baarlamaanka kaasoo noqonaya kii ugu horreeyay oo qarax lagu weeraro.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/12/2013 7:21 AM EST
Sabti, Jannaayo, 12, 2013 (HOL) – Tartan kubadda cagta ah oo ay ka qeyb-qaadanayeen ilaa afar naadi oo ka kala socday xaafadaha ay ka kooban tahay magaalada Baladweyne ayaa galinkii danbe ee maalintii shalay lagu soo gabagabeeyay garoonka kubadda cagta Lama-galaay.

1/12/2013 7:14 AM EST
Sabti, Jannaayo 12, 2013 (HOL) — Raashinkii quutal daruuriga ahaa, ayaa qaali garoobay ka dib markii sarifkii lacagta uu kor u kacay, taas oo maalmihii u dambeeyey ku abuurtay dadweynuhu inay iibsan kari waayaan.

1/12/2013 7:11 AM EST
Sabti, Jannaayo 12, 2013 (HOL) — Ugu yaraan 20-qof oo isugu jira dhinacyadii dagaalamay iyo dad shacab ah ayaa ku dhintay dagaal xalay gellinkii dambe ku dhexmaray deegaanka Buulo-mareer ee gobolka Shabeellada Hoose ciidamada kumaandooska Faransiiska iyo xoogagga Al-shabaab.

1/12/2013 3:01 AM EST
Sabti, Jannaayo 12, 2013 (HOL) — Ciidamada ammaanka Kenya ayaa xalay ku toogtay xerada Dhagaxleey oo ka mid ah xeryaha Dhadhaab ku yaalla nin la sheegay inuu ahaa burcad dadka xeradaas ku jira dhac ugu geysanayay qori la been abuuray.

1/12/2013 2:29 AM EST
Sabti, Jannaayo 12, 2013 (HOL) — In ka badan 780 arday ayaa u fadhiistay imtixaanka kulliyadaha kala duwan ee jaamacadda Nugaal xarumaheeda ay ku leedahay magaaladda Laascaanood ee gobolka Sool. Imtixaankan oo ah imtixaan sanadeedka jaamacadda ayaa sida uu sheegay guddoomiyaha jamacadda, C/risaaq Maxed Aadan (Lafoole) uu ka duwan yahay imtixaandaadkii ka horreeyey isagoo xusay inay ugu talogaleen qaab loo kordhinayo aqoonta iyo tayada ardayda jaamacada ka qalin-jebinaysa.

1/12/2013 1:25 AM EST
Sabti, Jannaayo 12, 2013 (HOL) — Xukuumadda dalka Ingiriiska ayaa shaacisay inay matigelinayso sannadkan shir looga hadlayo arirmaha dalka Soomaaliya, waxaana shirkan uu daba-socdaa shirkii lagu qabtay London bishii Feberaayo ee sannadkii hore kaasoo socday hal maalin loogana hadlay arrimaha Soomaaliya.

1/12/2013 1:03 AM EST
Sabti, Jannaayo 12, 2013 (HOL) — Guddoomiyihii bankiga dhexe ee dalka Jabuuti, Jaamac Maxamuud Xayd ayaa xalay ku geeriyooday isbitaalka Aga Khan ee magaalada Nairobi halkaasoo maskaxda looga qalay.

1/12/2013 12:46 AM EST
Sabti, Jannaayo 12, 2013 (HOL) — Iska-horimaad culus ayaa xalay saqdii dhexe ku dhexmaray deegaanka Buulo-mareer ee gobolka Shabeellada Hoose ciidammo watay diyaarado kuwa qumaatiga u kaca ah iyo xoogagga Al-shabaab, iyadoo dagaalkaas uu dhaliyay khasaare nafeed oo soo kala gaarta labada dhinac.