2014-10-30
Today from Hiiraan Online:  _
Wararka Maanta- Khamiis, Mar 7 , 2013
Ra’iisul Wasaare Saacid oo ka Warbixiyay Safarkii uu ku Tagay Degmooyin ka tirsan Gobolka Galguduud (SAWIRRO)



Khamiis, Maarso 07, 2013 (HOL) — Ra’iisal wasaaraha Soomaaliya, Cabdi Faarax Shirdoon (Saacid) oo dib ugu soo laabtay Muqdisho ayaa galabta shir Jara’id oo uu ku qabtay xafiiskiisa kaga warbixiyay safarkii uu ku tagay degmooyin ka tirsan gobolka Galguduud ee bartamaha Soomaaliya  iyo cunno-qabateyntii hubka ee laga qaaday Soomaaliya.

Ra’iisul wasaaraha ayaa sheegay in safarkii uu ku tagay gobolka Galguduud ee Soomaaliya uu ahaa mid kusoo dhammaaday guul; isagoo sheegay inuu gobolkaas kusoo arkay dad u heelan dowladnimada Soomaaliya.

“Waxaan soo dhaweyn ballaaran kala kulannay magaalada Dhuusamreeb iyo degmooyinkii kale ee aan tagnay aniga iyo waftigii ka koobnaa labada gole ee dowladda, waxaana garoonka nooga horyimid kumannaan dadweyne ah, taas waxay muujinaysa dadku sida ay ugu heellan yihiin dowladnimada lagu tallaabsaday, waxaana u sheegnay inaan ka caawin doono dhanka nabadda iyo horumarinta adeegyada asaasiga u ah nolosha, waxaan kaloo dadka u sheegnay inay mas’uul ka yihiin sidii ay u dhisan lahaayeen maamullo,”  ayuu yiri ra’iisal wasaare Saacid.

Ra’iisul wasaaraha ayaa soo hadal qaaday heshiiskii dhex-maray Ahlusunna Waljameeca iyo dowladda Soomaaliya kaasoo ah mid dowladda ugu fadhiya muhiimad gaar ah marka laga eego dhanka dib-u-heshiisiinta iyo xasilinta dalka.

“Dowladdu waxay heshiis la saxiixatay Ahlusunna oo in muddo ah dagaal kula jiray Al-shabaab oo nabadda kasoo horjeedda, waana bogaadinaynaa sida ay u soo bilaabeen halganka ay kaga sifaynayeen kooxdaas deegaanka ay ku sugan yihiin, heshiiskaas wuxuu dowladda u lahaa ahmiyad gooni ah, wuxuuna dhabaha u xaarayaa sidii ciidamada Ahlusunna ay uga mid noqon lahaayeen ciidanka Qaranka iyagoo ballan-qaaday inay ka dhabeyn doonaan sidii ay ula shaqayn lahaayeen dowladda,” ayuu yiri Saacid oo hadalkiisa ku daray in maamulka Ximin iyo Xeeb ay iyaguna ballanqaadeen inay dowladda la shaqeyn doonaan, waxayna ka codsadeen in dowladdu ay barnaamijyo wax loogu qabanayo u samayso dhallinyarada ka waantoobay falalkii burcad-badeednimada ahaa oo hadda ku sugan qaybo ka mid ah deegaanada uu ka taliyo maamulkaas.

Dhanka kale, ra’iisal wasaaraha Soomaaliya ayaa ka hadlay cunno-qabataynta hubka ee laga qaaday Soomaaliya taasoo fursad u siinaysa dowladda inay tayeyso ciidamadeeda.

“Aad ayaan u soo dhaweynaynaa in laga qaado Soomaaliya cunno-qabateynta hubka, waana dadaal ay dowladdu samaysay muddadii yarayd ee ay jirtay, taas macnaheedu maahan in hubka dowladda gacanteeda soo gala loo maamulayo qaab qaldan, arrinkaas waxaa naga saaran mas’uuliyad taasoo ah in shacabkeenna uga difaacno kooxaha nabad-diiddan, maxaa yeelay dowladda waxaa mas’uuliyadi ka saaran tahay sidii ammaanka loosoo celin lahaa, waxaan u muujinaynaa niyad-wanaag dadka ka qaba walaacana waxaan u sheegaynaa inay ku kalsoonaadaan in hubkaas loo isticmaalo si masuuliyad daro ku jirto,” ayuu yiri ra’iisul wasaaraha Soomaaliya.

Ugu danbayntii Ra’iisul Wasaaraha ayaa sheegay in cuna qabatayta hubka ee la qaaday ay muujinayso dhamaystirka qaranimadii Soomaaliya, maxaa yeelay ma jiro aduunka dowlad aan xaq u lahayn inay soo iibsato hub ay ku difaacdo dadkeeda.




Maxamed Xaaji Xuseen, Hiiraan Online,
maxuseen@hiiraan.com
Muqdisho, Soomaaliya





Post your comments

2013-03-07 12:26 PM EST
Khamiis, Maarso 07, 2013 (HOL) —Dagaal culus oo ciidamada dowladda iyo kuwa Al-shabaab ku dhexmaray maanta deegaanka Lafaale oo ka tirasn degmada Xudur ee gobolka Bakool kaddib ayaa waxay ciidammo ka tirsan kuwa dowladda waxay madaxa dagaalyahan ka tirsan Al-shababa oo ay soo jareen geeyeen degmada Xudur.

2013-03-07 12:12 PM EST
Khamiis, Maarso 07, 2013 (HOL) — Xukuumadda Somaliland ayaa sheegtay inay walaac ka qabto cunno-qabateynta hubka ee laga qaaday Soomaaliya, iyagoo wasiirka arrimaha dibadda ee maamulkas uu ku tilmaay go’aanka uu golaha ammaanka qaatay mid aan si wanaagsan looga fiirsan.

2013-03-07 10:46 AM EST
Khamiis, Maarso 07, 2013 (HOL) — Ururka HIRDA ayaa maanta ku qabtay Muqdisho munaasabad lagu soo dhaweynayay laguna xusayay maalinta haweenta adduunka ee 8-da Maarso oo sanad walba xiliyadan oo kale laga xuso Soomaaliya iyo caalamka intiisa kale.

2013-03-07 10:20 AM EST
Khamiis, Maarso 07, 2013 (HOL) — Ciidamada dowladda Soomaaliya oo gacan ka helaya kuwa Itoobiya ayaa saakay 9:00 aroonimo la wareegay degmada Ufuroow ee gobolka Bay, halkaasoo ay ka talinaysay Al-shabaab sannadihii lasoo dhaafay.

2013-03-07 8:32 AM EST
Khamiis, Maarso 07, 2013 (HOL) — Ra’iisul wasaaraha Soomaaliya iyo wasiirkiisa maaliyadda lacagta oo laga dalbaday inay horyimaadaan golaha baarlamaanka Soomaaliya si wax looga weydiiyo hoos u dhaca xoogga leh ee ku yimid doollarka, taasoo dhibaateyn ku ah shacabka Soomaaliyeed.

2013-03-07 8:22 AM EST
Khamiis, Maarso 07, 2013 (HOL) — Wasaaradda horumarinta arrimaha bulshada ee dowladda Soomaaliya iyo xafiiska Jinsiga ee AMISOM ayaa maanta si wadajir ah ugu qabtay Muqdisho xuska maalinta haweenka Adduunka ee 8-da Maarso oo sannad walba laga xuso dunida oo dhan, iyadoo la sheegay in lasoo hormariyay maadaama ay berri Jimco tahay oo laga nasanayo shaqooyinka.

2013-03-07 7:21 AM EST
Khamiis, Maarso 07, 2013 (HOL) — Shirkadda Mubaarak Farsamasi ee dawooyinka soo dejiya ayaa sheegtay in dawooyinkeedda ay ka soo iibiyaan mid ka mid ah shirkadaha sameeya dawooyinka ee dalka Turkiga, kuwaas oo soo saara dawoooyin tayo leh.

2013-03-07 7:19 AM EST
Khamiis, Maarso 07, 2013 (HOL) — Qaar ka mid ah dhibanayaashii dacwadda ku oogay madaxweyne ku xigeenkii hore ee Soomaalya Cali Samatar, ayaa ka hadlay waraaq uu Ra’isal wasaaraha Soomaaliya Saacid u qoray wasaaradda arrimaha dibadda ee Maraykanka oo uu kaga codsanayo in xukunkii lagu xukumay Cali Samatar la buriyo maadama oo uu xaasanad siyaasadeed leeyahay.

2013-03-07 6:31 AM EST
Khamiis, March 07, 2013 (HOL) - Wasiirka gaashaandhiga dalka Kenya Yuusuf Xaaji ayaa noqday senatorka Garissa, kadib markii uu si dirqi ah kaga guulaystay gudoomiye ku xigeenka baarlamaanka Faarax Macallim oo muddo ku dhow labaatan sano ahaa xildhibaanka deegaanka Dhadhaab.

2013-03-07 5:27 AM EST
Xildhibaan Yuusuf Xassan ayaa si aqlabiyad ah markale loogu doortay kursiga degmada Kamakunji oo ah deegaanka ay ka tirsantahay xaafada Islii ee magaalada Nairobi.

2013-03-07 12:45 AM EST
Khamiis, Maarso 07, 2013 (HOL) — Dowladda Soomaaliya iyo ururka Ahlusunna Waljamaca ayaa shalay kala saxiixday heshiis qodobbo badan ah, kuwaasoo ay si wadajir ah u saxiixeen mas’uuliyiinta dowladda iyo kuwa Ahlusunna.

2013-03-07 12:22 AM EST
Khamiis, Maarso 07, 2013 (HOL) — Guddiga doorashooyinka dalka Kenya ayaa sheegay inay dib ugu laabteen tirinta codadka doorashooyinka, kaddib markii ay xumaadeen qalabkii lagu tirin lahaa codadka, iyagoo sheegay inay natiijadu soo bixin doonto berri oo Jimco ah.

2013-03-06 11:57 PM EST
Khamiis, Maarso 07, 2013 (HOL) — Madaxweynaha Soomaaliya, Xasan Sheekh Maxamuud ayaa sida diirran u soo dhaweynaya go’aanka Golaha Ammaanka ee Qaramada Midoobay uu cunno-qabteynta hubka kaga qaaday dowladda Soomaaliya.