Gobolka waqooyi bari ee dalka Kenya oo la shaaciyay xubnihii ku guulaystay jagooyinka muhiimka ah
Khamiis, March 07, 2013 (HOL) - Wasiirka gaashaandhiga dalka Kenya Yuusuf Xaaji ayaa
noqday senatorka Garissa, kadib markii uu si dirqi ah kaga guulaystay gudoomiye
ku xigeenka baarlamaanka Faarax Macallim oo muddo ku dhow labaatan sano ahaa
xildhibaanka deegaanka Dhadhaab.
Governor ama jagada gudoomiyaha ee Garissa ayaa
waxaa ku gulaystay Nadiif Aadam oo horay
u ahaan jiray madaxii bankiga First Community bank ee dalka Kenya.
Waxaana uu ka guulaystay Maxamed Mawliid Shuuriye,
Haaruun Yuusuf iyo Bunow qorane, iyadoo tartankan uu ahaa mid xamaasad badan oo
ay musharrixiinta tiro isu dhow heleen.
Degmada Wajeer ayaa waxaa helay booska senate-ka
C/raxmaan Colow oo doorashadii hore looga adkaaday kursiga baarlamaanka ee
koonfurta Wajeer oo ku celis ahayd.
Bilow keerow oo kamid ah garyaqaanada ugu caansan
dalka Kenya oo u dooda xuquuqda muslimiinta iyo Soomaalida Kenya ayaa isna
noqday senator-ka degmada Mandheera.
Marka laga soo tago gobolka waqooyi bari ee Kenya ee
Soomaalida, Kenya inteeda kale ayaa u muuqata in is badal xoog leh uu ka
dhacay, iyadoo gabi ahaan meesha laga saaray xildhibaanadii horay mudada dheer
uga soo gali jiray deegaannada.
Dadka caanka ah ee doorashadan ku khasaaray ayaa
waxaa kamid ah, wasiirka arrimaha dibadda Sam Ongeri, wasiirkii hore ee
dalxiiska Najiib Balala, wasiiraddii biyaha Charet Ngilu, Shirau Ali Makwere,Danson
Mungatana, Amos Kimunya , Henry Kosgey,Sally Kosgey, Faarax Macallim,Maxamed
Cabdi Affey iyo siyaasiyiin kale oo caan ah oo dhammaantood cidla ku soo
dhacay, kuwaasoo muddo ku dhow 20 sano noqonayay xildhibaano ama wasiirro.
Waxaana dib u soo noolaaday mar kale qoyskii
madaxweynihii hore ee Kenya Danial Arab Moi, iyadoo labo wiil oo uu dhalay ay
kala heleen xildhibaan iyo Senator, deegaanka Baringo oo ka tirsan gobolka Rift
Valley.
Kenyaan badan oo warbaahinta la hadlay ayaa farxad
ka muujiyay isbadalka cusub ee ka dhacay Kenya oo inta badan ay kasoo galeen
dad dhalinyaro ah oo siyaasadda ku cusub.
Axmed C/samad, Hiiraan Online
[email protected]
Nairobi , Kenya