2014-10-30
Today from Hiiraan Online:  _
Wararka Maanta- Khamiis, Mar 21, 2013
Weerar Ismiidaamin ah oo lala Beegsaday Saldhig Ciidamada Dowladdu ay ku lahaayeen Gudaha Suuqa Bakaaraha


Khamiis, Maarso 21, 2013 (HOL) — Hal qof ayaa ku dhintay, saddex qof oo uu ku jiray sarkaal ka tirsan ciidamada dowladda ayaa ku dhaawacmay qarax ismiidaamin ah oo ka dhacay gudaha suuqa Bakaaraha, kaasoo lagu bartilmaameedsanayay ciidammo ka tirsan kuwa dowladda Soomaaliya.

Qofka dhintay ayaa ahaa ruuxii qaraxa ismiidaaminta ahaa sameeyay iyadoo dadka dhaawacmayna ay ku jireen laba gabdhood oo middood ay shaah ku iibinaysay meel ku dhow saldhigga la weeraray.

“Weerarku wuxuu u muuqday mid qorsheynaa, waxaa fuliyay wiil dhallinyaro ah oo hilibihiisa aan meesha ku arkay, sidoo kale waxaan arkay dhaawaca saddex qof oo uu ku jiray taliyihii saldhigga,” ayuu yiri goobjooge meel aad ugu dhow halka uu qaraxu ka dhacay.

Taliyaha dhaawacmay ayaa lagu magacaabi jiray Sokor, waxaana dhaawiciisa loo qaaday isbitaallada Muqdisho halkaasoo lagu daweynayo, iyadoo haweenkii iyagana dhaawacmay markiiba goobta laga qaaday.

Ciidamada dowladda ayaa furay rasaas badan inkastoo aysan jirin khasaare kasoo gaartay dadka shacabka ah, iyadoo saraakiisha dowladdu ay dusha kasaareen mas’uuliyada weerarkan Xarakada Al-shabaab, inkastoo aysan Al-shabaab weli ka hadlin weerarkaas.

Qaraxan ismiidaaminta ah ayaa wuxuu kusoo beegmayaa xilli Isniintii lasoo dhaafay uu qarax ismiidaamin ah oo dilay in ka badan 10-qof uu ka dhacay agagaarka Tiyaatarka Muqdisho, kaasoo lagu weeraray taliyaha ciidamada nabadsugidda gobolka Banaadir, Khaliif Axmed Ereg.

Suuqa Bakaaraha ayaa ah goobta ugu weyn ee ganacsiga Koonfurta Soomaaliya, iyadoo weerarkan uu baqdin weyn geliyay ganacsatada ka shaqeysta suuqa, iyadoo suuqan ay horay uga dhaceen falal dilal ah.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-21 2:26 PM EST
Khamiis, Maarso 21, 2013 (HOL) — Taliyaha ciidamada Midowga Afrika ee AMISOM, Jen. Andrew Gutti ayaa maanta shaaca ka qaaday in ciidamadooda ay isku diyaarinayaan sidii ay ula wareegi lahaayene goobihii ay Itoobiya kala baxday ciidamadeeda.

2013-03-21 1:45 PM EST
Khamiis, Maarso 21, 2013 (HOL) — Golaha wasiiradda Soomaaliya ayaa maanta isugu yimid shirkoodii joogtada ahaa, kaasoo uu guddoominayay ra’iisul wasaaraha, Cabdi Faarax Shirdoon (Saacid), iyadoo looga hadlay qodobbo dhawr ah oo ay ka mid ahaayeen qorshe loogu magac-daray “The New Deal”, arrimaha amniga iyo soo celinta hantidii dowladda, gaar ahaana warshaddihii dalka.

2013-03-21 1:16 PM EST
Khamiis, Maarso 21, 2013 (HOL) — Madaxweynaha Soomaaliya, Xasan Sheekh Maxamuud ayaa maanta kormeer howleed ku tagay dekedda weyn ee magaalada, waxaana kormeerkan ku wehlinayay xubno dowladda ka tirsan, wuxuuna socod ku maray bakhaarada dekedda iyo goobaha kale oo ay ka kooban tahay dekedda.

2013-03-21 11:12 AM EST
Khamiis, 21 Maarso, 2013(HOL):- Laba askari ayaa ku dhimatay mid kalena waxaa kasoo gaaray dhaawac kadib markii ay israsaaseyn dhexmartay askar kawada tirsan ciidamada dowladda Soomaaliya ee magaalada Kismaayo.

2013-03-21 10:48 AM EST
Khamiis, 21 Maarso, 2013(HOL) - Wafdi uu hogaaminayo ra’isul wasaaraha dowladda federaalka Soomaaliya Mudane Cabdi faarax Shirdoon Saacid ayaa la filayaa in uu dhawaan soo gaaro magaalada Kismaayo ee xarunta Gobolka J/hoose sida ay warbaahinta u xaqiijiyeen xubno ka tirsan masuuliyiinta shirka maamul u sameynta Jubooyinka.

2013-03-21 9:56 AM EST
Khamiis, 21 Maarso, 2013(HOL) - Gudiga isboortiga gobolka J/hoose oo maanta shir jara’aid ku qabtay xafiiskooda magaalada Kismaayo ayaa u mahadceliyay shaqsiyaad ay sheegeen in ay gacan weyn ka geysteen sidii dib loogu dhisi lahaa Isboortiga gobolka J/hoose.

2013-03-21 8:26 AM EST
Khamiis, Maarso 21, 2013 (HOL) — Afar ka mid ah ciidamada xoogga dalka ayaa siyaabo kala duwan loogu dilay degmada Dayniile ee gobolka Banaadir, gaar ahaan xaafadaha ku teedsan jidka warshadaha.

2013-03-21 8:09 AM EST
Khamiis, Maarso 21, 2013 (HOL) — Magaalooyinka Somaliland ayaa maanta laga xusay maalinta biyaha aduunka oo si weyn loogu dabaaldegay qiimaha ay leeyihiin biyuhu.

2013-03-21 7:51 AM EST
Khamiis, Maarso 21, 2013 (HOL) — Madaxweynaha Soomaaliya, Xasan Sheekh Maxamuud ayaa kulan ku saabsan Xuquuqda Aadanaha kula yeeshay maanta xarunta madaxtooyada khabiir Qaramada Midoobay u qaabilsan dhinaca xuquuqda aadanaha, Shamsul Baari.

2013-03-21 2:53 AM EST
Khamiis, Maarso 21, 2013 (HOL) — Ururka Midowga Yurub ayaa lacag dhan 43-milyan oo doollar ugu deeqay ciidamada Midowga Afrika ee AMISOM ee ka howgala Soomaaliya, waxaana gargaarkan lagu dhawaaqay Talaadadii lasoo dhaafay ee bishan Maarso ay ahayd 19-ka.

2013-03-21 2:30 AM EST
Khamiis, Maarso 21, 2013 (HOL) — Waaxda arrimaha dibadda Mareykayka ayaa soo saartay warbixin lacago lagu dul dhigay madaxa laba ruux oo u dhashay dalka Mareykanka oo ka barbar dagaalama Al-shabaab oo xiriir la leh Al-Qaacida.

2013-03-21 1:58 AM EST
Khamiis, Maarso 21, 2013 (HOL) — Ugu yaraan laba qof ayaa ku dhintay in ka badan afar kalena way ku dhaawacmeen iskahorimaad kooxo malleeshiyo ah ku dhexmaray xalay koonfurta magaalada Gaalkacyo ee xarunta gobolka Mudug.