2014-04-18
Today from Hiiraan Online:  _
Wararka Maanta- Khamiis, Mar 21, 2013
Taliyaha AMISOM oo sheegay inay diyaar u yihiin in Ciidanka Itoobiya ay kala Wareegaan deegaannada ay ka baxayaan


Khamiis, Maarso 21, 2013 (HOL) — Taliyaha ciidamada Midowga Afrika ee AMISOM, Jen. Andrew Gutti ayaa maanta shaaca ka qaaday in ciidamadooda ay isku diyaarinayaan sidii ay ula wareegi lahaayene goobihii ay Itoobiya kala baxday ciidamadeeda.

Jen. Gutti ayaa sheegay in ciidamadooda ay sugi doonaan ammaanka dadka ku nool deegaannada Bay iyo Bakool ee ay Itoobiya ciidamadeeda kala baxday, isagoo sheegay in ciidamadooda ay awood u leeyihiin inay amaniga goobahaas sugaan.

“Waxaan diyaar u nahay inaan deegaannada Bay iyo Bakool ee ay ciidamada Itoobiya ka baxeen inaan geynno ciidammo xaqiijiya ammaanka, si aysan u lumin deggenaashaha,” ayuu yiri Jen. Gutti. Isagoo intaas ku daray in guud ahaan goobaha ay Itoobiya ku sugan tahay ee Koonfurta Soomaaliya ay ka go’an tahay inay la wareegaan.

Ciidamada Itoobiya ayaa ah ciidammo awood badan ku lahaa Koonfurta Soomaaliya tan iyo bishii November ee sannadkii 2011, halkaasoo ay si iskood ah u soo galeen, waxayna maalintii Axadda ahayd ee lasoo dhaafay ka baxeen magaalada Xudur ee gobolka Bakool, halkaasoo ay Al-shabaab dib ula wareegtay.

Sidoo kale, degmada Xudur waxaa ka baxay ciidamadii dowladda Somalia ee la joogay ciidamada Itoobiya, iyadoo sidoo kale ay degmadaas cabsi awgeed uga baxeen in ka badan 2,000 qof, kuwaasoo gaaray degmada Ceelbarde iyo deegaanno kale oo ku yaalla Bay iyo Bakool.

AMISOM oo tiradoodu tahay in ka badan 17,000 oo askari ayaa waxay tan iyo sannadkii 2011 dagaallo adag kula jireen Al-shabaab oo inta badan dalka ka talinaysay, iyagoo ku guuleystay inay ka qabsadaan deeganno badan oo ay ku jirto magaalada Kismaayo.

Hadalka kasoo baxay taliyaha AMISOM ayaa wuxuu noqonayaa kii ugu horreeyay oo sarkaal ka tirsan AMISOM uu ku sheego inay ciidamadoodu kala wareegayaan kuwa Itoobiya goobaha ay banneynayaan, iyadoo mudane ka tirsan baarlamaanka uu dhawaan sheegay in saraakiisha Itoobiya ay ku wargeliyeen inay ciidamadooda kala bixi doonaan gobollada Bay iyo Bakool.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-21 3:22 PM EST
Khamiis, Maarso 21, 2013 (HOL) — Hal qof ayaa ku dhintay, saddex qof oo uu ku jiray sarkaal ka tirsan ciidamada dowladda ayaa ku dhaawacmay qarax ismiidaamin ah oo ka dhacay gudaha suuqa Bakaaraha, kaasoo lagu bartilmaameedsanayay ciidammo ka tirsan kuwa dowladda Soomaaliya.

2013-03-21 1:45 PM EST
Khamiis, Maarso 21, 2013 (HOL) — Golaha wasiiradda Soomaaliya ayaa maanta isugu yimid shirkoodii joogtada ahaa, kaasoo uu guddoominayay ra’iisul wasaaraha, Cabdi Faarax Shirdoon (Saacid), iyadoo looga hadlay qodobbo dhawr ah oo ay ka mid ahaayeen qorshe loogu magac-daray “The New Deal”, arrimaha amniga iyo soo celinta hantidii dowladda, gaar ahaana warshaddihii dalka.

2013-03-21 1:16 PM EST
Khamiis, Maarso 21, 2013 (HOL) — Madaxweynaha Soomaaliya, Xasan Sheekh Maxamuud ayaa maanta kormeer howleed ku tagay dekedda weyn ee magaalada, waxaana kormeerkan ku wehlinayay xubno dowladda ka tirsan, wuxuuna socod ku maray bakhaarada dekedda iyo goobaha kale oo ay ka kooban tahay dekedda.

2013-03-21 11:12 AM EST
Khamiis, 21 Maarso, 2013(HOL):- Laba askari ayaa ku dhimatay mid kalena waxaa kasoo gaaray dhaawac kadib markii ay israsaaseyn dhexmartay askar kawada tirsan ciidamada dowladda Soomaaliya ee magaalada Kismaayo.

2013-03-21 10:48 AM EST
Khamiis, 21 Maarso, 2013(HOL) - Wafdi uu hogaaminayo ra’isul wasaaraha dowladda federaalka Soomaaliya Mudane Cabdi faarax Shirdoon Saacid ayaa la filayaa in uu dhawaan soo gaaro magaalada Kismaayo ee xarunta Gobolka J/hoose sida ay warbaahinta u xaqiijiyeen xubno ka tirsan masuuliyiinta shirka maamul u sameynta Jubooyinka.

2013-03-21 9:56 AM EST
Khamiis, 21 Maarso, 2013(HOL) - Gudiga isboortiga gobolka J/hoose oo maanta shir jara’aid ku qabtay xafiiskooda magaalada Kismaayo ayaa u mahadceliyay shaqsiyaad ay sheegeen in ay gacan weyn ka geysteen sidii dib loogu dhisi lahaa Isboortiga gobolka J/hoose.

2013-03-21 8:26 AM EST
Khamiis, Maarso 21, 2013 (HOL) — Afar ka mid ah ciidamada xoogga dalka ayaa siyaabo kala duwan loogu dilay degmada Dayniile ee gobolka Banaadir, gaar ahaan xaafadaha ku teedsan jidka warshadaha.

2013-03-21 8:09 AM EST
Khamiis, Maarso 21, 2013 (HOL) — Magaalooyinka Somaliland ayaa maanta laga xusay maalinta biyaha aduunka oo si weyn loogu dabaaldegay qiimaha ay leeyihiin biyuhu.

2013-03-21 7:51 AM EST
Khamiis, Maarso 21, 2013 (HOL) — Madaxweynaha Soomaaliya, Xasan Sheekh Maxamuud ayaa kulan ku saabsan Xuquuqda Aadanaha kula yeeshay maanta xarunta madaxtooyada khabiir Qaramada Midoobay u qaabilsan dhinaca xuquuqda aadanaha, Shamsul Baari.

2013-03-21 2:53 AM EST
Khamiis, Maarso 21, 2013 (HOL) — Ururka Midowga Yurub ayaa lacag dhan 43-milyan oo doollar ugu deeqay ciidamada Midowga Afrika ee AMISOM ee ka howgala Soomaaliya, waxaana gargaarkan lagu dhawaaqay Talaadadii lasoo dhaafay ee bishan Maarso ay ahayd 19-ka.

2013-03-21 2:30 AM EST
Khamiis, Maarso 21, 2013 (HOL) — Waaxda arrimaha dibadda Mareykayka ayaa soo saartay warbixin lacago lagu dul dhigay madaxa laba ruux oo u dhashay dalka Mareykanka oo ka barbar dagaalama Al-shabaab oo xiriir la leh Al-Qaacida.

2013-03-21 1:58 AM EST
Khamiis, Maarso 21, 2013 (HOL) — Ugu yaraan laba qof ayaa ku dhintay in ka badan afar kalena way ku dhaawacmeen iskahorimaad kooxo malleeshiyo ah ku dhexmaray xalay koonfurta magaalada Gaalkacyo ee xarunta gobolka Mudug.