2014-07-30
Today from Hiiraan Online:  _
Wararka Maanta- Arbaco, Mar 20, 2013
Madaxweynaha Mareykanka Barack Obama oo safarkii ugu horeeyay ku tagay Israa’iil isagoo booqan doona Falastiin



Arbaco, Maarso 20, 2013 (HOL) — Madaxweynaha Mareykanka, Barack Obama ayaa safarkiisii ugu horreeyay ku tagay dalka Israa’iil tan iyo markii xilka madaxweynimo ee dalkaas loo doortay, isagoo mar labaad ku guuleystay xilkan, waxaana garoonka diyaaradaha Tel Aviv ku soo dhaweeyay ra’iisul wasaaraha Israa’iil Benjamin Netanyahu iyo weliba madaxweynaha dalkaas, Shimon Peres.

Obama ayaa horay u sheegay in Israa’iil aysan ahayn saaxiibka ugu weyn ee Mareykanku leeyahay, balse maanta ayuu Tel Aviv ka sheegay in Israa’iil iyo Mareykanka uu ka dhexeeyo xiriir adag. Isagoo intaas ku daray inay tahay in dhulka barakeysan ay nabaddu timaaddo.

Maalinta Khamiista ah ayaa lagu wadaa in Barakac Obama uu safar ku tago magaalada ku taalla daanta galbeed ee Ramallah halkaasoo uu kula kulmi doono madaxweynaha Falastiin, Maxamuud Cabbaas.

Wadahadallada uu Obama la yeelanayo hoggaamiyeyaasha Falastiin iyo Israa’iil ayaa u badnaan doona dhinaca nabadda, qalalaasaha ka socda Siiriya iyo weliba bacriminta hubka Nukliyeerka ee dalka Iiraan.

Laakiin saraakiil ka tirsan dowladda Mareykanka ayaa sheegay inay aad u yar tahay rajada laga qabo inay dib u furmaan wadahadallada nabadeed ee u dhexeeya Israa’iil iyo Falastiin.

“Indho furan ayaan ku aragnaa dhibaatooyinka jira, ma lumin doonno aragtida Isaa’iil eek u aaddan inay nabad kula noolaato dariskeeda,” ayuu yiri Obama oo si kooban ula hadlay warbaahinta.

Sidoo kale, madaxweynaha Mareykanka wuxuu intaas ku daray: “Mareykanka wuxuu garab taagan yahay Israa’iil, waayo waxay aasaas u tahay ammaankeenna waxayna mudan tahay inaan garab istaagno. Israa’iil waa saaxiibkeena dhabta ah, weligeedna way ahaanaysaa."

Ra’iisul wasaaraha Israa’iil Netanyahu ayaa u mahadceliyay Obama isagoo sheegay in Israa’iil ay xaq u leedahay inay ilaashato madax-bannaanideeda ayna iska difaacdo cadowga kusoo duulaya , ayna jawaabto hanjabaadaha kaga imaanaya dibadda.

Ururka Xamaas ayaa cambaareeyay booqashada madaxweyaha Mareykanka uu ku tagay Israa’iil, iyago ku tilmaamay booqasho lagu yaq-yaqsoodo iyagoo sheegay inaysan dhageysan doono wararka kasoo baxa Obama.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-20 9:34 AM EST
Arbaco, Maarso 20, 2013 (HOL) — Kulan ballaaran oo ay ka qayb-galeen, waxgarad, salaaddiin, culumaa’uddiin, aqoonyahanno iyo saraakiil kasoo jeeda gobolka Hiiraan ayaa maanta lagu qabtay Magaalada Muqdisho, kaas oo looga hadlayay arrimo ku saabsan maamul u sameynta gobolka Hiiraan.

2013-03-20 8:28 AM EST
Arbaco, Maarso 20, 2013 (HOL) — In ka badan 20 ruux ayaa u geeriyootay cudurka shuban biyoodka halka in ka badan 60 oo isugu jira caruur iyo dad waaweyn u jiifaan xeryo gaar ah oo ay dulleedka magaalada ka hergaliyeen saraakiisha ciidamada Jabuuti si looga daweeyo dadka uu cudurka soo ridanayo.

2013-03-20 8:02 AM EST
Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa maanta kulan ku yeeshay Muqdisho wafdi ka socday Qarammada Midoobay oo uu hoggaaminayay Shamsul Baari oo ah madaxa arrimaha xuquuqul insaanka ee Qaramada, iyadoo kulankaas looga hadlay ilaalinta xuquuqul insaanka Soomaaliya.

2013-03-20 7:33 AM EST
Arbaco, Maarso 20, 2013 (HOL) — Maxkamadda Hargeysa ayaa maanta xukun laba sano ah ku ridday boqor Raabbi Yuusuf Cabdullaahi laba sano oo xarig ah, kaddib markii lagu eedeeyay inuu ka qaybgalay shir loo horjeedo madaxbannaanida Somaliland oo ka dhacay Muqdisho, uuna wax kasoo xulay baarlamaanka Soomaaliya.

2013-03-20 7:20 AM EST
Arbaco, Maarso 20, 2013 (HOL) — Jen. Yuusuf Maxamed Siyaad (Indho-cadde) oo horay u soo noqday wasiir u dowlihii wasaaradda gaashaandhigga dowladdii KMG ahayd ayay ciidamada AMISOM ku xireen saakay muddo kooban garoonka diyaaradaha ee Muqdisho, kaddib markii uu muran soo dhexgalay.

2013-03-20 2:38 AM EST
Arbaco, Maarso 20, 2013 (HOL) — Ugu yaraan sagaal xubnood oo isugu jira saraakiil iyo dagaalyahanno ka tirsan Xarakada Al-shabaab ayaa ku dhintay qarax weyn oo xalay ka dhacay degmada Diinsoor ee gobolka Bay, iyadoo in ka badan 10 qof oo ku dhaawacmayna la dhigay isbitaalka Diinsoor.

2013-03-20 2:16 AM EST
Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in xukuumaddiisa ay ka go’an tahay inay dib ula wareegto degmada Xudur ee gobolka Bakool, halkaasoo ay la wareegeen xoogagga Al-shabaab Axaddii lasoo dhaafay markii ay ciidamadii Itoobiya iyo kuwii dowladda ay isaga baxeen.