2014-07-23
Today from Hiiraan Online:  _
Wararka Maanta- Arbaco, Mar 20, 2013
Salaaddiin iyo Waxgarad Qoddobo kasoo saaray kulan looga hadlay maamul u sameynta Gobolka Hiiraan (SAWIRRO)



Arbaco, Maarso 20, 2013 (HOL) — Kulan ballaaran oo ay ka qayb-galeen, waxgarad, salaaddiin, culumaa’uddiin, aqoonyahanno iyo saraakiil kasoo jeeda gobolka Hiiraan ayaa maanta lagu qabtay Magaalada Muqdisho, kaas oo looga hadlayay arrimo ku saabsan maamul u sameynta gobolka Hiiraan.

Kulankan ayaa lagu lafa-guray qaabka ugu habboon ee maamul lasoo doortay loona dhan yahay loogu sameyn karo gobolka Hiiraan iyo sidii arrintaas ay mowqif mideysan uga qaadan lahaayeen qaybaha bulshada gobolka.

Waxaa kulanka ka hadlay, Boqor Faarax Cabdi Guure oo ah guddoomiyaha golaha salaaddiinta Soomaaliyeed, kana mid ah waxgaradka kasoo jeeda gobolka Hiiraan, kaasoo sheegay in kulankan ay u qabteen sidii shacabka deggan gobolka Hiiraan loogu madax-baneyn lahaa inay sameystaan maamul rabitaankooda ku yimid.

 “Ujeeddada kulankan wuxuu ahaa sidii ay u dhici lahayd doorasho xalaal ah oo dadka reer Hiiraan ay kusoo doortaan maamulkooda, sida horeyba uga dhacday gobollada qaarkood, haddana ka socoto gobolo kale, waxaan soo jeedinaynaa in maamul sameynta Hiiraan aan wax faragelin lagu sameyn,” ayuu yiri Boqor Faarax Cabdi Guure.

Waxaa kulankaas ka hadlay odayaal kala duwan oo ku hadlayay magacyada qabaa’ilka dega gobolka Hiiraan, iyadoo ay goob-joog ka ahaayeen odayaal fara badan oo laga xusi karo nabaddoon Maxamuud Axmed Xooshow (Korontaale), nabaddoon Cabdi Sheekh Faarax, Iimaan Cabdullaahi khaliif Rooble, Suldaan C/casiis Xaaji Dafe, Suldaan Cali Suldaan Cabdi, Jen. Baal-taag iyo xubno kale oo fara badan, waxaana gabagabadii kulankaas laga soo saaray warsaxafadeed ka kooban saddex qodob oo kala ah:

1.   In talada ku saabsan maamul sameynta loo celiyo reer Hiiraan.

2.   Inaan lagala tashan dhismaha maamulka dadka leh danaha shaqsi iyo kuwa siyasadeed ka leh maamulka.

3.   In loo saaro guddi arrimaha maamul u sameynta gobolka kala tashada dowladda iyo madaxweynaha iyo in dowladdu gacan ka geysato maamul u sameynta gobolkaas.

Ugu dambeyn, waxaa kulankaas laga sheegay in natiijooyin wanaagsan oo hordhac ay kasoo baxeen kulan horey Muqdisho ugu dhexmaray madaxweyne Xasan Sheekh iyo waxgarad kasoo jeeda gobolka Hiiraan, kaasoo ku saabsanaa qaabka ugu habboon ee maamul madax-bannaan oo cadaalad ku dhisan loogu sameyn karo gobolka.








Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-20 2:19 PM EST
Arbaco, Maarso 20, 2013 (HOL) — Madaxweynaha Mareykanka, Barack Obama ayaa safarkiisii ugu horreeyay ku tagay dalka Israa’iil tan iyo markii xilka madaxweynimo ee dalkaas loo doortay, isagoo mar labaad ku guuleystay xilkan, waxaana garoonka diyaaradaha Tel Aviv ku soo dhaweeyay ra’iisul wasaaraha Israa’iil Benjamin Netanyahu iyo weliba madaxweynaha dalkaas, Shimon Peres.

2013-03-20 8:28 AM EST
Arbaco, Maarso 20, 2013 (HOL) — In ka badan 20 ruux ayaa u geeriyootay cudurka shuban biyoodka halka in ka badan 60 oo isugu jira caruur iyo dad waaweyn u jiifaan xeryo gaar ah oo ay dulleedka magaalada ka hergaliyeen saraakiisha ciidamada Jabuuti si looga daweeyo dadka uu cudurka soo ridanayo.

2013-03-20 8:02 AM EST
Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa maanta kulan ku yeeshay Muqdisho wafdi ka socday Qarammada Midoobay oo uu hoggaaminayay Shamsul Baari oo ah madaxa arrimaha xuquuqul insaanka ee Qaramada, iyadoo kulankaas looga hadlay ilaalinta xuquuqul insaanka Soomaaliya.

2013-03-20 7:33 AM EST
Arbaco, Maarso 20, 2013 (HOL) — Maxkamadda Hargeysa ayaa maanta xukun laba sano ah ku ridday boqor Raabbi Yuusuf Cabdullaahi laba sano oo xarig ah, kaddib markii lagu eedeeyay inuu ka qaybgalay shir loo horjeedo madaxbannaanida Somaliland oo ka dhacay Muqdisho, uuna wax kasoo xulay baarlamaanka Soomaaliya.

2013-03-20 7:20 AM EST
Arbaco, Maarso 20, 2013 (HOL) — Jen. Yuusuf Maxamed Siyaad (Indho-cadde) oo horay u soo noqday wasiir u dowlihii wasaaradda gaashaandhigga dowladdii KMG ahayd ayay ciidamada AMISOM ku xireen saakay muddo kooban garoonka diyaaradaha ee Muqdisho, kaddib markii uu muran soo dhexgalay.

2013-03-20 2:38 AM EST
Arbaco, Maarso 20, 2013 (HOL) — Ugu yaraan sagaal xubnood oo isugu jira saraakiil iyo dagaalyahanno ka tirsan Xarakada Al-shabaab ayaa ku dhintay qarax weyn oo xalay ka dhacay degmada Diinsoor ee gobolka Bay, iyadoo in ka badan 10 qof oo ku dhaawacmayna la dhigay isbitaalka Diinsoor.

2013-03-20 2:16 AM EST
Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in xukuumaddiisa ay ka go’an tahay inay dib ula wareegto degmada Xudur ee gobolka Bakool, halkaasoo ay la wareegeen xoogagga Al-shabaab Axaddii lasoo dhaafay markii ay ciidamadii Itoobiya iyo kuwii dowladda ay isaga baxeen.