12/20/2014
Today from Hiiraan Online:  _
Wararka Maanta- Arbaco, Mar 20, 2013
Ra’iisul Wasaaraha Soomaaliya oo ku gooddiyay in Xukuumaddiisu mar kale la wareegayso Degmada Xudur ee Gobolka Bakool



Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in xukuumaddiisa ay ka go’an tahay inay dib ula wareegto degmada Xudur ee gobolka Bakool, halkaasoo ay la wareegeen xoogagga Al-shabaab Axaddii lasoo dhaafay markii ay ciidamadii Itoobiya iyo kuwii dowladda ay isaga baxeen.

Sidoo kale, ra’iisul wasaaruhu wuxuu si adag u cambaareeyay dilkii Sheekh weyn loogu geystay degmada Xudur, kaasoo ay ka dambeeyeen xoogagga Al-shabaab oo ku eedeeyay inuu ahaa qaaligii maxkamadda degmadaas.

“Xukuumadda Soomaaliya waxay waddaa qorshe ay ku doonayso inay dib ugula wareegto degmada Xudur ee xarunta gobolka Bakool,” ayuu ra’iisul wasaaruhu ku sheegay war uu ugu talogalay saxaafadda oo kasoo baxay xafiiskiisa.

Degmada Xudur oo 450-km dhinac waqooyi-galbeed kaga beegan magaalada Muqdisho ayaa waxaa muddo hal sano ah ka talinayay ciidamada Soomaaliya oo ay wehliyaan kuwa dowladda Itoobiya.

Ra’iisul wasaaruhu wuxuu si adag u cambaareeyay falkii lagu dilay Sheekh C/raxmaan Macallin Mursal oo 75-jir ahaa, isagoo falkaas ku tilmaamya mid fool xun oo ay geysteen kooxo aan dadka u naxayn.

“Falkan foosha xun nagama horjoogsanayo inaan horay u soconno, haddana waxaan shaqeynaynaa in ciidamada dowladda Soomaaliya iyo kuwa gacanta siinaya ay dib ula wareegaan degmada Xudur,” ayuu yiri ra’iisul wasaaraha Soomaaliya.

Isagoo hadalkiisa sii wata ayuu yiri: “Al-shabaab waan ka saaraynaa degmada Xudur ee gobolka Bakool.” Balse ra’iisul wasaaruhu ma uusan sheegin xilliga ay billaabayaan howgallada ay dib ugula qabsanayaan degmada Xudur.

Lama oga sababata dhabta ah ee ka dambeysa inay ciidamada Itoobiya isaga baxaan degmada Xudur, balse xildhibaan Sheekh Aadan Madoobe oo ku sugan gobolka Bay ayaa sheegay in ciidamada dowladda ay hub iyo sahay la’aan uga baxeen xarunta gobolka Bakool.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

3/20/2013 2:19 PM EST
Arbaco, Maarso 20, 2013 (HOL) — Madaxweynaha Mareykanka, Barack Obama ayaa safarkiisii ugu horreeyay ku tagay dalka Israa’iil tan iyo markii xilka madaxweynimo ee dalkaas loo doortay, isagoo mar labaad ku guuleystay xilkan, waxaana garoonka diyaaradaha Tel Aviv ku soo dhaweeyay ra’iisul wasaaraha Israa’iil Benjamin Netanyahu iyo weliba madaxweynaha dalkaas, Shimon Peres.

3/20/2013 9:34 AM EST
Arbaco, Maarso 20, 2013 (HOL) — Kulan ballaaran oo ay ka qayb-galeen, waxgarad, salaaddiin, culumaa’uddiin, aqoonyahanno iyo saraakiil kasoo jeeda gobolka Hiiraan ayaa maanta lagu qabtay Magaalada Muqdisho, kaas oo looga hadlayay arrimo ku saabsan maamul u sameynta gobolka Hiiraan.

3/20/2013 8:28 AM EST
Arbaco, Maarso 20, 2013 (HOL) — In ka badan 20 ruux ayaa u geeriyootay cudurka shuban biyoodka halka in ka badan 60 oo isugu jira caruur iyo dad waaweyn u jiifaan xeryo gaar ah oo ay dulleedka magaalada ka hergaliyeen saraakiisha ciidamada Jabuuti si looga daweeyo dadka uu cudurka soo ridanayo.

3/20/2013 8:02 AM EST
Arbaco, Maarso 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa maanta kulan ku yeeshay Muqdisho wafdi ka socday Qarammada Midoobay oo uu hoggaaminayay Shamsul Baari oo ah madaxa arrimaha xuquuqul insaanka ee Qaramada, iyadoo kulankaas looga hadlay ilaalinta xuquuqul insaanka Soomaaliya.

3/20/2013 7:33 AM EST
Arbaco, Maarso 20, 2013 (HOL) — Maxkamadda Hargeysa ayaa maanta xukun laba sano ah ku ridday boqor Raabbi Yuusuf Cabdullaahi laba sano oo xarig ah, kaddib markii lagu eedeeyay inuu ka qaybgalay shir loo horjeedo madaxbannaanida Somaliland oo ka dhacay Muqdisho, uuna wax kasoo xulay baarlamaanka Soomaaliya.

3/20/2013 7:20 AM EST
Arbaco, Maarso 20, 2013 (HOL) — Jen. Yuusuf Maxamed Siyaad (Indho-cadde) oo horay u soo noqday wasiir u dowlihii wasaaradda gaashaandhigga dowladdii KMG ahayd ayay ciidamada AMISOM ku xireen saakay muddo kooban garoonka diyaaradaha ee Muqdisho, kaddib markii uu muran soo dhexgalay.

3/20/2013 2:38 AM EST
Arbaco, Maarso 20, 2013 (HOL) — Ugu yaraan sagaal xubnood oo isugu jira saraakiil iyo dagaalyahanno ka tirsan Xarakada Al-shabaab ayaa ku dhintay qarax weyn oo xalay ka dhacay degmada Diinsoor ee gobolka Bay, iyadoo in ka badan 10 qof oo ku dhaawacmayna la dhigay isbitaalka Diinsoor.