2014-09-30
Today from Hiiraan Online:  _
Wararka Maanta- Jimco, Jun 7 , 2013
Madaxweynaha Somalia oo ku baaqay in si dhaqso ah lagu joojiyo Dagaalka ka socda Magaalo Xeebeedda Kismaayo



Jimce, Juun 07, 2013 (HOL) — Madaxweynaha Soomaaliya, Xasan Sheekh Maxamud ayaa sheegay inuu aad iyo aad uga xumaaday dagaal maanta ka dhacay gudaha magaalada Kismaayo, isagoo baaqay in si deg-deg ah lagu joojiyo colaaddaas, sida lagu sheegay warsaxaafadeed kasoo baxay xafiiska madaxweynaha Soomaaliya.

Madaxweynaha ayaa ku yiri warsaxaafadeedka: “Waxaan tacsi kal iyo lab ah u dirayaa intii ku geeriyootay dagaalkii saakay ee Kismaayo, waxaana ALLE uga baryayaa inuu jannadiisa ka waraabiyo, ehelledii iyo Soomaaliyeeda oo dhanna uu samir iyo iimaan ka siiyo, kuwa ku dhaawacmayna uu ee EEBBE caafimaad deg-deg ah siiyo.”

Sidoo kale, madaxweynaha Soomaaliya ayaa sheegay in waqtigan xasaasiga ah oo Soomaaliya ay kasoo kabaneyno dagaalladii 22-kii sano socday waa nasiib-darro in dad Soomaaliyeed ay is-dilaan, wuxuuna ku baaqayaa in la-wada ilaaliyo xasilloonida iyo nabadda lagana wada shaqeeyo sidii nabad lagu heli lahaa.

“Dagaal shacab baa nooga dhimanaya oo qiimo iyo qaayo weyn noo wada leh, waana in la joojiyo colaadaha ka socda magaalada Kismaayo,”  ayuu ku daray madaxweynuhu hadalkiisa.

Dhanka kale, wuxuu ugu baaqay dhammaan shacabka Soomaaliyeed inay ka fogaadaan wax walba oo keeni kara colaad, dagaal iyo dulqaad la’aan, wax walba oo dhacana lagu dhameeyo wadahadal iyo nabad.

“Dowladdu waa ay ka go’antahay inay wadahadal, dib-u-heshiisiin iyo si ay ku jirto Soomaalinimo ku wajahdo kuna dhameeyso dhammaan khilaafka jira si aan u wada-gaarno himilooyinka aan hiigsaneyno ee ah in Soomaaliya ay cagaheeda isku-taagto, lana tartanto caalamka kale,” ayuu madaxweynuhu kusoo gabagabeeyay warsaxaafadeedkiisa.

Iskahorimaadkii Kismaayo ka dhacay maanta ayaa waxaa ku dhintay saddex qof, lix qof oo kalena way ku dhaawacatay inta la xaqiijiyay, wuxuuna u dhexeeyay dhinacyo isku haya maamulka Jubaland ee bishii hore Kismaayo looga dhawaaqay.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-06-07 4:18 PM EST
Jimce, Juun 07, 2013 (HOL) — Ra'iisal wasaaraha xukuumadda Soomaaliya, Cabdi Faarax Shirdoon (Saacid) ayaa dhinacyada ku dagaalamaya Kismaayo ugu baaqay inay si dag-dag ah u joojiyaan dagaalka, ayna xal iyo nabad ku dhameeyaan khilaafka u dhexeeya.

2013-06-07 3:22 PM EST
Jimce, Juun 07, 2013 (HOL) — Waxgarad iyo siyaasiyiin maanta ku shiray magaalada Muqdisho ee xarunta Soomaaliya ayaa sheegay in reer Hiiraan ay taageersan yihiin dowladda, iyagoo xusay inay raalli-gelin ka bixinayaan hadalkii dhawaan kasoo yeeshay xubno ka tirsan reer Hiiraan oo ku shiray magaalada Baladweyne.

2013-06-07 12:37 PM EST
Jimce, Juun 07, 2013 (HOL) — Madaxweynaha Soomaaliya, Xasan Sheekh Maxamuuda ayaa kulan kula yeeshay magaalada Nairobi ee xarunta dalka Kenya kulan kula yeeshay madaxweynaha maamulka Puntland, C/raxmaan Sheekh Maxamed Faroole.

2013-06-07 12:03 PM EST
Jimce, Juun 07, 2013 (HOL) — Xarakada Al-shabaab ayaa laba wiil oo da’yar ah ku toogtay degmada Baraawe ee gobolka Shabeellada Hoose khamiistii shalay ahayd, kuwaasoo ay ku eedeeyeen inay basaasiin u ahaayeen dowladda Soomaaliya iyo ciidamada AMISOM.

2013-06-07 11:01 AM EST
Jimce, Juun 07, 2013 (HOL) — Olole nadaafadeed oo ay iska kaashadeen qaar ka mid ah ardayda wax-ka-barta magaalada Laascaanood, dowladda hoose iyo ganacsatda ayaa lagu nadiifiyay deegaanno muhiim u ah bulshada ku dhaqan magaalada Laascaanood ee xarunta gobolka Sool.

2013-06-07 10:29 AM EST
Jimce, Juun 07, 2013 (HOL) — Faahfaahinno dheeraad ah ayaa kasoo baxa dagaal maanta ku dhexmaray bartamaha magaalada Kismaayo maamulka uu hoggaamiyo Sheekh Axmed Madoobe iyo ciidammo taageersanaa mid ka mid ah raggii ku dhawaaqay inay madaxweynaha ka yihiin maamulkii looga dhawaaqay Kismaayo ee Jubaland.

2013-06-07 8:40 AM EST
Jimce, Juun 07, 2013 (HOL) — Dowladda Shiinaha ayaa ugu baaqday beesha calaamka iyo Qaramada Midoobay inay xoojiyaan hanaanka nabadda dalka Soomaaliya iyo dib u dhiskiisa, si ay uga baxdo mashaakilaadkii ay ku jirtay 22-kii sano ee lasoo dhaafay.

2013-06-07 8:01 AM EST
Jimco, June 07, 2013(HOL) :- Dagaal xooggan oo la isku adeegsaday hubka noocyadiisa kala duwan ayaa ka dhacay magaalada Kismaayo, iyadoona dagaalkani uu u dhexeeyay ciidamo beeleed taageersan dowladda Soomaaliya iyo ciidamada maamulka Kismaayo garabka uu hogaamiyo Sheekh Axmed Madoobe.

2013-06-07 7:29 AM EST
Jimce, Juun 07, 2013 (HOL) — Dowladda Britain ayaa maanta danjire cusub u soo magacowday arrimaha dalka Soomaaliya, kasoo bedeli doona danjirihii hore ee dalka Britain ay u magacowday, Matt Baugh.

2013-06-07 7:05 AM EST
Jimce, Juun 07, 2013 (HOL) — Taliyaha ciidamada gobolka Bay ee gobolka Bay, Mahad C/raxmaan ayaa ku dhaawacmay weerar maanta ka dhacay deegaanka Leego ee gobolka Shabeellada Hoose, iyadoo weerarkaas lagu dilay darawalkiisii.

2013-06-07 6:54 AM EST
Jimce, Juun 07, 2013 (HOL) — Kooxo hubeysan oo Koonfur Afrikaan ah ayaa xalay laba wiiil oo Soomaali ah oo isla dhashay ku dilay baangado iyo midiyo kaddib markii ay ku weerareen dukaankooda oo ku yaalla deegaanka Balamalango oo ka tirsan gobolka Limbombo oo ku yaalla soohdinta dalalka Koonfur Afrika iyo Mozambique.

2013-06-07 6:18 AM EST
Jimce, Juun 07, 2013 (HOL) — Madaxweynaha Somaliland mudane, Axmed Maxamed Maxamuud Siillaanyo, ayaa xalay si kadis ah loo arkay isagoo ka soo qaybgalay daawashadda tartanka ciyaaraha baasketka ee Garoonka Timadda Cadde ka socota oo ay ku dheelayeen labadda gobol ee Maroodi jeex (Hargeysa) iyo Sanaag.