2014-07-23
Today from Hiiraan Online:  _
Wararka Maanta- Jimco, Jun 7 , 2013
Dowladda Shiinaha oo Beesha Caalamka iyo UN-ka ugu baaqday inay gacan ka geystaan Nabadeynta Soomaaliya


Jimce, Juun 07, 2013 (HOL) — Dowladda Shiinaha ayaa ugu baaqday beesha calaamka iyo Qaramada Midoobay inay xoojiyaan hanaanka nabadda dalka Soomaaliya iyo dib u dhiskiisa, si ay uga baxdo mashaakilaadkii ay ku jirtay 22-kii sano ee lasoo dhaafay.

Ergayga joogtada ah ee Shiinaha ee Qaramada Midoobay, Li Baodong ayaa ka sheegay hadalkan kulan uu golaha ammaanka ee Qaramada Midoobay ku yeeshay shalay oo Khamiis ahayd xaruntiisa New York.

“Waa inaan ka caawinno dowladda cusub ee Soomaaliya fulinta howlaha hor-yaalla oo ay ka mid yihiin lixdii qodob ee ay u dajisay, xoojinta hay’adaha dowladda iyo qorshaha dowladdu ay ku doonayso inay maamulkeeda ugu baahiso dalka oo dhan,” ayuu yri Baodong.

Sidoo kale, ergaygu wuxuu carrabka ku dhuftay in dib u heshiinta ay tahay jidka keliya ee lagu soo celin karo nabadda Soomaaliya, isagoo ugu baaqay dhammaan dhinacyada Soomaalida inay si shuruud la’aan ah ugu biiraan hannaanka lagu soo celinayo nabadda Soomaaliya.

“Waxaan rajeynayaan in qaybaha Soomaalida ay baaqdan ayidi doonaan, dib u soo celinta nabadda, horumarka iyo xasilinta dalkana waa mid ku xiran in si wadajira h looga shaqeeyo, dhinacyaduna ay khilaafyadooda si wadahadal ah ku dhameeyaan, laguna dadaalo horumarinta dhaqaalaha dalka iyo in kor loo qaado daqliga shacabka,” ayuu hadalkiisa raaciyay.

Mr. Li wuxuu ku baaqay in la raaco qodobbada ku saabsan arrimaha Somalia ee kasoo baxay Midowga Afrika, urur goboleedka Bariga Afrika ee IGAD iyo hay’adaha kale ee dowliga ah.

“Waxaan filayaa in haddii Qaramada Midoobay ay raacdo qodobbada kasoo baxay ururada gobolka iyo kuwa kale ee Afrika inay tahay mid xoojinaysa aragtida waxyaabaha laga damacsan yahay Soomaaliya,” ayuu hadalkiisa ku daray. Isagoo xusay in mar walba ay tahay in la ilaaliyo madax-bannaanida Soomaaliya.

Dhanka kale, eragayga Shiinaha wuxuu ku boorriyaya Qaramada Midoobay in sida ugu dhaqsiyaha badan loo howlgeliyo howlgalka UN-ka ee Somalia (UNSOM), sidoo kalena la kordhiyo taageerada dhaqaale ee la siinayo howl-galka Midowga Afrika ee AMISOM.

Bishii lasoo dhaafay golaha ammaanka ee Qaramada Midoobay waxay isku raaceen in la sameeyo xafiiska UNSOM oo lagu xoojinayo howgalka nabad raadinta Soomaaliya, iyadoo howgalkan siyaasadeed si rasmi ah uu uga billowday Soomaaliya Isniintii lasoo dhaafay ee toddobaadkan.

Soomaaliya ayaa waxay ka baxaysaa colaado soo billowday sannadkii 1991-kii markaasoo xilka laga tuuray xukuumaddii milateriga ahayd ee dalka ka talinaysay, iyadoo haatan ay Soomaaliya ka jirto dowlad rasmi ah oo leh baarlamaan iyo xukuumad joogto ah.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-06-07 4:18 PM EST
Jimce, Juun 07, 2013 (HOL) — Ra'iisal wasaaraha xukuumadda Soomaaliya, Cabdi Faarax Shirdoon (Saacid) ayaa dhinacyada ku dagaalamaya Kismaayo ugu baaqay inay si dag-dag ah u joojiyaan dagaalka, ayna xal iyo nabad ku dhameeyaan khilaafka u dhexeeya.

2013-06-07 3:22 PM EST
Jimce, Juun 07, 2013 (HOL) — Waxgarad iyo siyaasiyiin maanta ku shiray magaalada Muqdisho ee xarunta Soomaaliya ayaa sheegay in reer Hiiraan ay taageersan yihiin dowladda, iyagoo xusay inay raalli-gelin ka bixinayaan hadalkii dhawaan kasoo yeeshay xubno ka tirsan reer Hiiraan oo ku shiray magaalada Baladweyne.

2013-06-07 12:37 PM EST
Jimce, Juun 07, 2013 (HOL) — Madaxweynaha Soomaaliya, Xasan Sheekh Maxamuuda ayaa kulan kula yeeshay magaalada Nairobi ee xarunta dalka Kenya kulan kula yeeshay madaxweynaha maamulka Puntland, C/raxmaan Sheekh Maxamed Faroole.

2013-06-07 12:03 PM EST
Jimce, Juun 07, 2013 (HOL) — Xarakada Al-shabaab ayaa laba wiil oo da’yar ah ku toogtay degmada Baraawe ee gobolka Shabeellada Hoose khamiistii shalay ahayd, kuwaasoo ay ku eedeeyeen inay basaasiin u ahaayeen dowladda Soomaaliya iyo ciidamada AMISOM.

2013-06-07 11:31 AM EST
Jimce, Juun 07, 2013 (HOL) — Madaxweynaha Soomaaliya, Xasan Sheekh Maxamud ayaa sheegay inuu aad iyo aad uga xumaaday dagaal maanta ka dhacay gudaha magaalada Kismaayo, isagoo baaqay in si deg-deg ah lagu joojiyo colaaddaas, sida lagu sheegay warsaxaafadeed kasoo baxay xafiiska madaxweynaha Soomaaliya.

2013-06-07 11:01 AM EST
Jimce, Juun 07, 2013 (HOL) — Olole nadaafadeed oo ay iska kaashadeen qaar ka mid ah ardayda wax-ka-barta magaalada Laascaanood, dowladda hoose iyo ganacsatda ayaa lagu nadiifiyay deegaanno muhiim u ah bulshada ku dhaqan magaalada Laascaanood ee xarunta gobolka Sool.

2013-06-07 10:29 AM EST
Jimce, Juun 07, 2013 (HOL) — Faahfaahinno dheeraad ah ayaa kasoo baxa dagaal maanta ku dhexmaray bartamaha magaalada Kismaayo maamulka uu hoggaamiyo Sheekh Axmed Madoobe iyo ciidammo taageersanaa mid ka mid ah raggii ku dhawaaqay inay madaxweynaha ka yihiin maamulkii looga dhawaaqay Kismaayo ee Jubaland.

2013-06-07 8:01 AM EST
Jimco, June 07, 2013(HOL) :- Dagaal xooggan oo la isku adeegsaday hubka noocyadiisa kala duwan ayaa ka dhacay magaalada Kismaayo, iyadoona dagaalkani uu u dhexeeyay ciidamo beeleed taageersan dowladda Soomaaliya iyo ciidamada maamulka Kismaayo garabka uu hogaamiyo Sheekh Axmed Madoobe.

2013-06-07 7:29 AM EST
Jimce, Juun 07, 2013 (HOL) — Dowladda Britain ayaa maanta danjire cusub u soo magacowday arrimaha dalka Soomaaliya, kasoo bedeli doona danjirihii hore ee dalka Britain ay u magacowday, Matt Baugh.

2013-06-07 7:05 AM EST
Jimce, Juun 07, 2013 (HOL) — Taliyaha ciidamada gobolka Bay ee gobolka Bay, Mahad C/raxmaan ayaa ku dhaawacmay weerar maanta ka dhacay deegaanka Leego ee gobolka Shabeellada Hoose, iyadoo weerarkaas lagu dilay darawalkiisii.

2013-06-07 6:54 AM EST
Jimce, Juun 07, 2013 (HOL) — Kooxo hubeysan oo Koonfur Afrikaan ah ayaa xalay laba wiiil oo Soomaali ah oo isla dhashay ku dilay baangado iyo midiyo kaddib markii ay ku weerareen dukaankooda oo ku yaalla deegaanka Balamalango oo ka tirsan gobolka Limbombo oo ku yaalla soohdinta dalalka Koonfur Afrika iyo Mozambique.

2013-06-07 6:18 AM EST
Jimce, Juun 07, 2013 (HOL) — Madaxweynaha Somaliland mudane, Axmed Maxamed Maxamuud Siillaanyo, ayaa xalay si kadis ah loo arkay isagoo ka soo qaybgalay daawashadda tartanka ciyaaraha baasketka ee Garoonka Timadda Cadde ka socota oo ay ku dheelayeen labadda gobol ee Maroodi jeex (Hargeysa) iyo Sanaag.