3/19/2024
Today from Hiiraan Online:  _
Wararka Maanta- Axad, Jun 2 , 2013
Prof. Axmed Ismaaciil Samatar oo si Weyn loogu soo Dhaweeyay Hargeysa, kana warbixiyay Imaashihiisa (SAWIRRO)


Axad, Juun 02, 2013 (HOL) — Prof. Axmed Ismaaciil Samatar ayaa si weyn loogu soo dhaweeyay maanta magaalada Hargeysa ee xarunta Somaliland kaddib markii uu muddo dheer ka maqnaa, isla markaana ahaa aqoonyahan si weyn uga soo horjeeday gooni isku-taagga Somaliland.

Boqolaal dadweyne ayaa ka qaybqaatay soo dhoweynta professor Samatar, kuwaas oo ka kala yimid gobolada Somaliland, isla markaaana lulayay caleemo qoyan, una tirinayey buraanburo loogu soo dhoweynayey.

Sidoo kale, dadweynaha soo dhoweeyey waxa ka muuqday ciyaaryahanada gobolada Gabiley iyo Boorame oo dharkii ciyaartoygoodda watay, isla markaana u sacabo tumayey.

Prof. Samatar oo diyaaradii uu soo raacay dhigtay madaarka Berbera, ayaa waxa diyaarad khaas ah usoo kireeyey xukuumadda oo ka soo dajisay madaarka Hargeysa, halkaasi oo dadweynaha iyo madaxda Somaliland ku sugayeen.

Aqoonyahanka ayaa markii uu diyaaradda ka soo degay ku sujuuday dhulka, ka dibna waxa uu bilaabay salaan gacan qaad ah oo uu boqolaalkii dadweyne oo saf dheer ugu jiray dhamaantoodba salaamay.

Guddoomiyaha guddida xukuumadu u xilsaartay soo dhoweyntiisa Cabdilaahi Geeljire oo ah wasiirka kulluumaysiga iyo khayraadka badda ayaa sheegay in aqoonyahanka ay ku soo dhoweynayaan dhulkiisa hooyo, isla markaana ay ku faraxsan yihiin  imaanshihiisa.

Siyaasi Axmed Ismaaciil Samatar ayaa sheegay inuu ku faraxsan yahay ku soo guryo noqoshadda gurigiisa, maadaama oo muddo dheer ugu dambaysay, waxaanu xusay inay u qorshaysan tahay inuu dhamaan gobolada uu soo wada maro, isla markaana uu bulshada qaybaheedda kala duwan la kulmi doonno.

“Sababtaan u imid Somaliland waxa weeye marka aad wax weyn u timaado laba amuurood ayaa kugu waajiba, kow waxa kugu waajiba inaad dhagahaaga furto oo aad dhagaysato iyo inuu afkaagu xirnaato oo uuna furnaado dareenkaagu, waxa weyn ee aan sheegayo waxa weeye waa Somaliland, Somaliland waxay ahaan jirtay waddan intaan gobonimada la qaadan, magacu shalay muu dhalan, dad iyo qaran baa jira, waxaa igu waajib ah inaan darso oo aan la sheekaysto hamadooda iyo noloshooddu siday tahay aan dareemo”ayuu yidhi Samatar mar uu ka hadlayey sababta uuu yimid, isagoo sheegay inuu casuumad ka helay madaxweynaha Somaliland.

“Arrinta Somaliland maaha wax indhaha laga qarsan karo, muddo badan ayaan ka hadlayey waana la doodaa Somaliland, waayo xaq baan ku leeyahay in aan la doodo ana xaq baa la igu leeyahay, inta aan hadlayey haddii aad dib u baadhaan waxaad garan doontaan inay aduunyadu u garato Somaliland waxay qabsatay oo aan meelo kale loo soo marmarin ee toos loola hadlo, iyadoo aduunyadda hareeraha ka xigaa burbursan tahay, dabadeedna abaalkeedda la siiyo, labaatan sanno ayaan arrintaasi ka hadlayey wax cusub oo aan soo saarayo maaha, waxaanan jeclahay in madaxda iyo shacabka warkooda aan dhagaysto, war baan buuxaa anigu, wadankana war baa buuxa ee waa in aan dhagaysto oo aan wax ku qaato, Somaliland meel aan kaga tagayo ma jirto waana halkii ilaahay iga abuuray,” ayuu yidhi mar uu ka hadlayey waxa uu ka aaminsan yahay qadiyada madax banaanidda Somaliland.

Prof. Axmed Ismaaciil Samatar ayaa ka gaabsaday inuu wax badan yidhaahdo, waxanu ku soo koobay inuu war badan bixin doono marka uu xog badan helo, isla markaana madaxda iyo madax dhaqameedka  la kulmo.

Si kastaba ha ahaatee, maalmihii u dambeeyey ayaa magaaladda Hargeysa si weyn looga dareemayey soo dhoweyntiisa, waxaana wadooyinka lagu xidhay boodhadh waaweyn oo ay ku xardhan yihin sawirkiisa, waxaana wadada kala xidhay boqolaal gaadiid ah oo loogu soo dhoweyanayey.







Barkhad-Ladiif M. Cumar, Hiiraan Online
[email protected]  
Hargeysa, Somaliland













Click here
6/2/2013 3:01 PM EST
Axad, Juun 02, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo) ayaa galabta si rasmi ah uga furay garoonka kubadda cagta ee Hargeysa Stadium ciyaarihii gobollada ee Somaliland oo ay ka qaybgalayaan 13 kooxood oo ka socda gobollada Somaliland.

6/2/2013 2:01 PM EST
Axad, Juun 02, 2013 (HOL) — Ciidamada AMISOM ee ku sugan Baydhabo ayaa maanta dilay saddex neef oo isugu jiray laba lo’a ah iyo dameero, kaddib markii ay xireen jidka weyn ee buundada xaafadda Isha Baydhabo.

6/2/2013 12:31 PM EST
Axad, Juun 02, 2013 (HOL) — Saraakiil ka tirsan maamulka Puntland ayaa sheegay in mid ka mid ah diyaaradaha aan duuliye lahayn ee Drones-ka loo yaqaan ay kusoo dhacday deegaan lagu magacaabo Qow oo 20-km u jira degmada Boosaaso ee xarunta gobolka Bari.

6/2/2013 12:18 PM EST
Axad, Juun 02, 2013 (HOL) — Wasiirka gaashaandhigga Soomaaliya, C/xakiin Maxamuud Xaaji Fiqi oo ku sugan Kismaayo ayaa sheegay in si wanaagsan loogu soo dhaweeyay magaalada Kismaayo ee xarunta gobolka Jubbada Hoose.

6/2/2013 12:06 PM EST
Axad, Juun 02, 2013 (HOL) — Dibadbaxayaal careysan ayaa maanta isugu soo baxay maalintii saddexaad barxadda Kizilay magaalada Ankara ee dalka Turkiga, iyadoo booliiskuna ay u adeegsadeen dibadbaxayaashaan suntan dadka ka ilmeysiisa kaddib markii ay isku dhaceen.

6/2/2013 11:21 AM EST
Axad, Juun 02, 2013 (HOL) — Madaxweynaha Puntland, C/raxmaan Sheekh Maxamed Faroole oo ku sugan magaalada Nairobi ee dalka Kenya ayaa sheegay inuu madaxweynaha Soomaaliya, Xasan Sheekh Maxamuud kala hadli doono arrimaha dastuurka iyo xal u helidda jubbooyinka.

6/2/2013 9:03 AM EST
Axad, Juun 02, 2013 (HOL) — Dowladda Kenya ayaa qorsheynaysa inay dib ugu celiso qoxootiga Soomaaliyeed ee ku jira xeryaha Dhadhaab Soomaaliya sida ay sheegtay wasiirradda arrimaha dibadda ee Kenya, Aamina Maxamed oo Nairobi kula kulantay Jicmihii shalay ra’iisul wasaare ku xigeenka ahna wasiiradda arrimaha dibadda Soomaaliya Fowziyo Yuusuf Xaaji Aadan.

6/2/2013 8:25 AM EST
Axad, Juun 02, 2013 (HOL) — Madaxweynaha Soomaaliya, Xasan Sheekh Maxamuud ayaa maanta oo Axad ah kula kulmay magaalada Yokohama ee dalka Japan guddoomiyaha hay’ada xiriirka caalamiga Japan (JICA), Akihiko TANAKA, isagoo kala hadlay go’aankii ra’iisul wasaaraha Japan, Shinzo Abe ee ahaa in Soomaaliya si toos ah kaalmada Japan loo siinayo dowladda iyo mashaariicda horumarineed ee Soomaaliya u baahan tahay.

6/2/2013 8:22 AM EST
Axad, Juun 02, 2013 (HOL) — Tacbashada beeraha waa laf-dhabarta in badan oo ka mid ah qoysaska ku dhaqan deegaannada uu hareer maro wabiga shabeelle ee gobollka Hiiraan, laakiin haddana dhinaca kale marka aad eegto waxaa muuqaneysa in sanadihii ugu danbeeyay qoysaskaas si wanaagsan uga faa'ideysan tacabka dhulka sababo la xiriira farsamo xumo iyo dhaqaalle la'aan soo food saartay.

6/2/2013 4:02 AM EST
Axad, Juun 02, 2013 (HOL) — Ciidammo madaniga oo la shaqeeya kuwa booliiska ayaa loo sameeyay xaafadaha magaalada Baydhabo, kuwaasoo la wareegay sugidda ammaanka degmada Baydhabo oo bilihii ugu dambeeyay ahayd mid kacsan.

6/2/2013 3:53 AM EST
Axad, Juun 02, 2013 (HOL) — Madaxweynaha Soomaaliya, Mudane Xasan Sheekh Maxamuud ayaa maanta kula kulmay Yokohama xoghayaha guud ee Qaramada Midoobay, Ban Ki-Moon, iyagoo kawada hadlay xafiiska cusub ee ay Qaramada ay ka furayso Muqdisho, ergayga cusub Nicholas Kay oo imaan doona Muqdisho, arrimaha ammaanka iyo sidii Qaramada Midoobay ay qayb uga qaadan lahayd dib u dhiska Soomaaliya.