2014-09-02
Today from Hiiraan Online:  _
Wararka Maanta- Axad, Jan 6 , 2013
Madaxweyne Bashar Al-assad oo hoosta ka xariiqay qorshe cusub oo dhanka nabadda ah


Axad, Jannaayo 06, 2013 (HOL) —Madaxweeynaha dalka Suuriya Bashar Al-asad ayaa hadal uu maanta jeediyay uga hadlay xaaladda cakiran ee ka jirta dalkaasi, isagoona sheegay in sida keliya ee xalka looga gaari karo dhibaatooyinka ka taagan dalkaasi ay tahay oo qura in la wada hadlo.

Madaxweeynaha ayaa ku tilmaamay kooxaha kasoo horjeeda dowaladiisa: “Argagixiso aan hore loo arag”, wuxuuna sheegay in kooxahani ay garab ka helayaan dad ajaanib ah, oo uu xusay in ay doonayaan in ay daciifiyaan awoodda Suuriya, taasoo uu sheegay in aysan marnaba suurogal ahayn.

Madaxweeynaha oo taageerayaashiisa kula hadlayay magaalada Damascus ayaa ku eedeeyay kooxaha mucaaradka in ay xadgudubyo ba’an u geystaan dadka reer Suuriya, wuxuuna ugu baaqay shacabka dalkaasi in ay iska difaacaan kooxahaasi.

“Waxaa jirto argagixiso raaceeysa afkaarta ururka Al-qaacidda. Inagoo dad walaalo ah waxaa nalaka doonayaa in aaan la dagaalanno dadkani. Intooda badan ma ahan dad suuriya u dhashay, waxaan bari doonna cashar,” ayuu yiri madaxweeynaha.

‘Qaranka waxa iska leh dhamaanteen, waa in aan difaacannaa,” ayuu hadalkiisii raaciyay.

Madaxweynaha ayaa sheegay in xal ka gaaridda dhibaatooyinka siyaasadeed ee dalka suuriya  ay u baahan doonto in awoodaha shisheeye ay joojiyaan taageeridda iyo hubeynta kooxaha mucaaradka, wuxuuna xusay in dowaldiisu ay diyaar u tahay in ay qabato shir dib-u-heshiisiin  oo caalami ah oo lagu soo dhisi doono dowlad iyo dastuur cusub.

Kooxaha mucaaradka ee dalka Suuriya ayaa durba ku gacan seeyray hadalka kasoo yeeray madaxweeynaha Suuriya, waxayna sheegeen in aysan marnaba wada xaajood la gali doonin madaxweeyne Assad.

Louay Safi oo xubin ka ah kooxaha mucaaradka dalkaasi Suuriya ayaa sheegay in aysan aqbali doonin wax aan ka ahayn in ay meesha ka baxaan madaxweeynaha iyo dowladiisa.

Hay’adda Qaramada Midoobay ayaa dhawaan shaacisay in colaadaha ka jira dalka Suuriya ay galaafteen nolosha in ka badan 60,000 oo qof, waxaana weli dalkaasi ka soconayo dagaallo qaraar oo u dhexeeya ciidamada daacadda u ah madaxweeynaha dalka Suuriya iyo kooxaha mucaaradka ee kasoo horjeeda.

 

Xasan Nuur, Hiiraan Online
hnur@hiiraan.com
Muqdisho, Soomaaliya

 





Post your comments

2013-01-06 10:11 PM EST
Madaxweynaha Jamhuuriyada Federaalka Soomaaliya Mudane Xassan Sh Maxamud ayaa ka qeyb galay munaasabadda sanad guradii 41-aad ee hay’ada Sirdoonka iyo Nabad Sugidda Qaranka iyo dib u furidda xarunta hay’adaas.

2013-01-06 9:57 AM EST
Axad, January 06, 2013(HOL): Garoonka Kubadda Koleyga 1da Luulyo {Ex-Luugino} ee Magaalada Muqdisho ayaa waxaa ka dhacday kulan guddoonsiinta qalab kala duwan oo Xiriirka Kubadda Koleyga Soomaaliyeed uu soo gaarsiiyay Guddoomiyaha Ururka Dhallinyarada jiilka cusub ee Isboortiga iyo dhaqanka [NGSC] C/Qani C/llaahi Hilowle (C/qani Jeenyo).

2013-01-06 9:14 AM EST
Axad, Jannaayo 06, 2013 (HOL) — Dagaal khasaare badan geystay oo u dhexeeya ciidamada dowladda Soomaaliya oo taageero ka helaya kuwa Itoobiya iyo xoogagga Al-shabaab ayaa ka qarxay deegaan lagu magacaabo May-kaareebay oo 20-km dhinaca waqooyi kaga began xarunta gobolka Gedo.

2013-01-06 4:11 AM EST
Axad, Jannaayo 06, 2013 (HOL) — Kooxo hubeysan ayaa ku dhaawacay ganacsade Axmed Cabdi Timir oo ka mid ah raga ugu horreeya ganacsiga gobolka Sool xilli uu marayay bartamaha magaalada, iyagoo dhowr xabbadood kaga dhuftay madaxa iyo laabta.

2013-01-06 2:48 AM EST
Axad, Jannaayo 06, 2013 (HOL) — Afhayeenka Al-Shabaab, Sheekh Cali Maxamuud Raag (Sheekh Cali Dheere) ayaa shir jaraa'id oo uu qabtay wuxuu kaga hadlay arrimo badan oo ay ka mid yihiin dagaalo ka dhacay Gobolada Bari ee Puntland.

2013-01-06 2:47 AM EST
Axad, Jannaayo 06, 2013 (HOL) — Dowladda Soomaaliya iyo Al-shabaab ayaa guulo ka kala sheegtay dagaallo shalaly gallinkii dambe ku dhexmaray deegaanno u dhexeeya degmada Luuq iyo Garbahaarey ee gobolka Gedo.

2013-01-06 2:37 AM EST
Axad, Jannaayo 06, 2013 (HOL) — Madaxweynaha Somaliland, Axmed Maxamed Maxamuud Siillaanyo ayaa xariga ka jaray Sabtidii shalay warshad cusub oo laga hirgaliyey magaaladda Hargeysa, taas oo soo saari doonta waraaqaha iyo buugaagta, kuwaas oo guud ahaan dalka wada gaadhsiin doonta.

2013-01-06 2:32 AM EST
Axad, Jannaayo 06, 2013 (HOL) — Kulan la damacsan yahay in go`aan lagaga gaaro colaad dhuleed dabayaaqadii sanadkii aan soo dhaafnay ka billaabantay deegaanka lagu magcaabo Gal-xamudh oo ka tirsan Widh-widh ayaa ka billaabmay tuuladda Dandan oo in ka badan 20-km bari kaga beegan degmada Buuhoodle.