2014-08-29
Today from Hiiraan Online:  _
Wararka Maanta- Jimco, Jan 4 , 2013
Xukuumadda Soomaaliya oo ka dalbatay Dowladda Turkiga inay Soomaaliya ka dhisto Jaamacado iyo Isbitaallo


Jimco, Jannaayo 04, 2013 (HOL) — Wasiirradda wasaaradda horumarinta adeegga bulshada xukuumadda Soomaaliya, Maryan Qaasim Axmed ayaa ka dalbatay dowladda Turkiga inay Soomaaliya ka hirgeliiyaan jaamacado ay wax ku bartaan dhallinyarada Soomaaliyeed iyo isbitaallo lagu daweeyo bukaannada Soomaaliyeed.

Wasiirradda ayaa hadalkan ka sheegtay kulammo ay si gaar-gaar ah ula kala yeelatay maanta oo Jimco ah ra’iisul wasaare ku xigeenka Turkiga, Bakir Buzdag iyo wasiirka caafimaadka Turkiga, Recep Adkag.

“Kulammada waxaa looga hadlay sidii ay xukuumadda Turkiga u sii wadi lahayd caawinta shacabka Soomaaliyeed, iyadoo wasiiraddu ay codsatay in Turkiga uu Soomaaliya ka hirgeliyo jaamacado iyo isbitaallo,” ayaa lagu yiri warsaxaafadeed kasoo baxay wasaaradda horumarinta adeegga bulshada Soomaaliya.

Dr. Maryan Qaasim waxay ka dalbatay ra’iisul wasaare ku xigeenka dalka Turkiga inay Turkigu sii wadaan mashaariicda hormarineed oo ay Turkigu ka hir-gelinayaan gudaha Soomaaliya, kuwaasoo ay ka mid yihiin dhinacyada caafimaadka iyo waxbarashada.

Turkigu waxay ka billaabeen gudaha Soomaaliya howlo ku caawinayaan shacabka Soomaaliyeed tan iyo markii ra’iisul wasaaraha Turkiga, Recep Tayyip Erdogan uu ku yimid Muqdisho booqasho lama filaan ah, sannadkii 2011, markaasoo ay Soomaaliya ka jirtay abaar sababatay macluul daran.

Xukuumadda Turkiga ayaa waxay waxbarasho jaamacadeed oo lacag la’aan ah siiyeen arday fara badan oo Soomaaliyeed, iyagoo sidoo kale ka hirgeliyay Muqdisho isbitaallo lagu daweeyo bukaannada iyo goobo lagu xannaaneeyo agoonta.

Wasiiradda horumarinta adeegga bulshada ayaa waxay muddooyinkii ugu dambeeyya booqasho ku joogtay dalka Turkiga, iyadoo dadaal ugu jirta sidii ay dowladda Turkiga u xoojin lahayd barnaamijyada horumarineed ee ay ka wadaan gudaha Soomaaliya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-04 11:51 AM EST
Jimco, Jannaayo 04, 2013 (HOL) — Ra’iisul wasaaraha Soomaaliya, Cabdi Faarax Shir-doon (Saacid) ayaa maanta saxaafadda u soo bandhigay saddex badmaaxe oo tan iyo dhammaadkii sannadkii 2010 afduub loogu haystay gudaha Soomaaliya, iyadoo ra’iisul wasaaruhu uu sheegay inaysan jirin wax madaxfurasho ah oo lagu soo daayay la-haystayaashan.

2013-01-04 11:50 AM EST
Jimco, Jannaayo 04, 2013 (HOL) — Madaxweynaha Galmudug, Jen. Cabdi Xasan Cawaale (Qaybdiid) ayaa maanta Waqooyiga magaalada Gaalkacyo ee gobolka Mudug kula kulmay madaxweynihii hore ee Puntland, Jen. Cadde Muuse Xirsi iyo mas’uuilyiin ka tirsan maamulka gobolka Mudug ee Puntland, isagoo kala hadlay iskaashi dhexmara labada maamul iyo adkeynta amniga gobolka Mudug, gaar ahaan magaalada Gaalkacyo oo falal ammaan-darro ay ka dhacaan.

2013-01-04 9:23 AM EST
Jimco, Jannaayo 04, 2013 (HOL) — Cudurada haya labadan wiil oo u baahan inay helaan daweyn dibadda ah ayaa keenay inay noloshoodu ay adkaato, iyadoo waalidiintooda oo kasoo jeeda qoysas sabool ah ay awoodi waayeen inay Caruurtoodan u helaan adeeg caafimaad oo dibadda ah.

2013-01-04 8:09 AM EST
Jimco, Jannaayo 04, 2013 (HOL) — Wasiirka gaashaandhigga Soomaaliay, C/xakiin Maxamuud Xaaji Fiqi ayaa maanta oo Jimco ah sheegay in ciqaab adag la marsiin doono askarigii dhibaateeya shacabka Soomaaliyeed, isagoo xusay in ciidamada ay ku dhex-jiraan ciidammo doonaya inay sumcadda ciidanka xumeeyaan.

2013-01-04 7:49 AM EST
Jimco, Jannaayo 04, 2013 (HOL) — Guddiga ganacsatada xaafadda Islii ee magaalada Nairobi ayaa dacwado ka dhan ah ciidamada ammaanka ee Kenya u gudbiyay xildhibaanno iyo wasiirro ka tirsan Kenya kaddib kulan ay maanta ku yeesheen magaalada Nairobi.

2013-01-04 1:29 AM EST
Jimco, Jannaayo 04, 2013 (HOL) — Madaxweynaha Soomaaliya, Xasan Sheekh Maxamuud ayaa ka warbixiyay heshiisyo dhexmaray dowladaha Soomaaliya iyo Suudaan, kaddib booqasho laba maamood ah oo uu dalkaas ku tagay.

2013-01-04 1:09 AM EST
Jimco, Jannaayo 04, 2013 (HOL) — Xoogagga Al-shabaab ee saldhiggoodu yahay buuraha Gollis ayaa xalay weerarro ku qaaday koontaroollo ku yaalla duleedka Koonfureed ee degmada Boosaaso, kuwaasoo dhaliyay khasaare kooban.