2014-10-25
Today from Hiiraan Online:  _
Wararka Maanta- Jimco, Jan 4 , 2013
Ra’iisul Wasaaraha Somalia oo soo bandhigay Badmaaxiin ku afduubnaa gudaha Soomaaliya Muddo Sannado ah



Jimco, Jannaayo 04, 2013 (HOL) — Ra’iisul wasaaraha Soomaaliya, Cabdi Faarax Shir-doon (Saacid) ayaa maanta saxaafadda u soo bandhigay saddex badmaaxe oo tan iyo dhammaadkii sannadkii 2010 afduub loogu haystay gudaha Soomaaliya, iyadoo ra’iisul wasaaruhu uu sheegay inaysan jirin wax madaxfurasho ah oo lagu soo daayay la-haystayaashan.

Saddex ruux oo laba ka mid ah ay u dhasheen dalka Siiriya ayaa lagu kala magacaabi jiray: Ibraahim Cabdalle Jowri oo ahaa kabtanka markab lagu magacaabo MV Orna iyo Axmed Cabdalla oo ahaa Injineerka markabka iyo qofka kale oo u dhashay dalka Sirilanka kaasoo ka mid ahaa shaqaalihii markabkan oo lagu magacaabo, Sarath Chandra Surajena.

“Halkan waxaa ka muuqda maanta saddex qof oo afduub loogu qabsaday xeebaha Soomaaliya 20-kii bishii December 2010, waxaana xukuumaddu ay ku guuleysatay in laga soo daayo kooxihii gacanta ku hayay,” ayuu ra’iisul wasaaruhu ka sheegay munaasabaddii lagu soo bandhigay badmaaxiinta la soo furtay.

Ra’iisul wasaaruhu wuxuu sheegay in sii-daynta raggan ay ku timid dadaal dheeraad ah oo uu sameeyay wasiirka arrimaha gudaha iyo Amniga Qaranka, C/kariin Xuseen Guuleed, iyadoo aan la sheegin goob lagu haystay badmaaxiintan lasoo furtay.


“Xukuumadda Soomaaliya sharaf weyn ayay u tahay inay la haystayaashan soo furato, waxayna muujinaysaa dadaalka aan ugu jirto sidii aan ajnabiga lagu haysto dalka oo dhan uga sii dayn lahayn gacanta kooxaha haysta,” ayuu yiri ra’iisul wasaaraha.

Badmaaxiintan lasoo furtay oo iyaguna saxaafadda la hadlay ayaa sheegay inay ku faraxsan yihiin in laga soo saaro gacanta kooxihii gacanta ku hayay waxayna sheegeen inaan dhibaato loo geysan intii afduubka loo haystay.

“Lama soo koobi karo farxad aan maanta dareemayo, waxaan afduubnaa mudo labo sano ah runtii aad ayaan u wel-weli jiray lakiin dadaalka ay dowladdu u gashay sii dayntayda waxaan oran karaa inay tahay mid i hilmaansiisay wixii dhib ahaa oo I soo maray, xataa burcad badeedii i haystay mudadaas waan iska cafiyay maanta madaama ay dowladda Soomaaliya si wanaagsan noosoo samata-bixisay,” ayuu yiri Sarath Surajena.

Lama sheegin markabkii badmaaxiintan lagu afduubtay inay weli haystaan afduubayaashii iyo in kale, waxaana tallaabadan ay kusoo beegmaysaa xilli ay ciidamada Puntland toddobaadkii hore xoog ku furteen markab afduub ahaan loo haystay muddo dheer iyo shaqaalihii la socday oo 22-ruux ahaa.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-04 12:24 PM EST
Jimco, Jannaayo 04, 2013 (HOL) — Wasiirradda wasaaradda horumarinta adeegga bulshada xukuumadda Soomaaliya, Maryan Qaasim Axmed ayaa ka dalbatay dowladda Turkiga inay Soomaaliya ka hirgeliiyaan jaamacado ay wax ku bartaan dhallinyarada Soomaaliyeed iyo isbitaallo lagu daweeyo bukaannada Soomaaliyeed.

2013-01-04 11:50 AM EST
Jimco, Jannaayo 04, 2013 (HOL) — Madaxweynaha Galmudug, Jen. Cabdi Xasan Cawaale (Qaybdiid) ayaa maanta Waqooyiga magaalada Gaalkacyo ee gobolka Mudug kula kulmay madaxweynihii hore ee Puntland, Jen. Cadde Muuse Xirsi iyo mas’uuilyiin ka tirsan maamulka gobolka Mudug ee Puntland, isagoo kala hadlay iskaashi dhexmara labada maamul iyo adkeynta amniga gobolka Mudug, gaar ahaan magaalada Gaalkacyo oo falal ammaan-darro ay ka dhacaan.

2013-01-04 9:23 AM EST
Jimco, Jannaayo 04, 2013 (HOL) — Cudurada haya labadan wiil oo u baahan inay helaan daweyn dibadda ah ayaa keenay inay noloshoodu ay adkaato, iyadoo waalidiintooda oo kasoo jeeda qoysas sabool ah ay awoodi waayeen inay Caruurtoodan u helaan adeeg caafimaad oo dibadda ah.

2013-01-04 8:09 AM EST
Jimco, Jannaayo 04, 2013 (HOL) — Wasiirka gaashaandhigga Soomaaliay, C/xakiin Maxamuud Xaaji Fiqi ayaa maanta oo Jimco ah sheegay in ciqaab adag la marsiin doono askarigii dhibaateeya shacabka Soomaaliyeed, isagoo xusay in ciidamada ay ku dhex-jiraan ciidammo doonaya inay sumcadda ciidanka xumeeyaan.

2013-01-04 7:49 AM EST
Jimco, Jannaayo 04, 2013 (HOL) — Guddiga ganacsatada xaafadda Islii ee magaalada Nairobi ayaa dacwado ka dhan ah ciidamada ammaanka ee Kenya u gudbiyay xildhibaanno iyo wasiirro ka tirsan Kenya kaddib kulan ay maanta ku yeesheen magaalada Nairobi.

2013-01-04 1:29 AM EST
Jimco, Jannaayo 04, 2013 (HOL) — Madaxweynaha Soomaaliya, Xasan Sheekh Maxamuud ayaa ka warbixiyay heshiisyo dhexmaray dowladaha Soomaaliya iyo Suudaan, kaddib booqasho laba maamood ah oo uu dalkaas ku tagay.

2013-01-04 1:09 AM EST
Jimco, Jannaayo 04, 2013 (HOL) — Xoogagga Al-shabaab ee saldhiggoodu yahay buuraha Gollis ayaa xalay weerarro ku qaaday koontaroollo ku yaalla duleedka Koonfureed ee degmada Boosaaso, kuwaasoo dhaliyay khasaare kooban.