2014-10-31
Today from Hiiraan Online:  _
Wararka Maanta- Jimco, Jan 4 , 2013
Madaxweynaha Galmudug oo Waqooyiga Magaalada Gaalkacyo kula kulmay Madaxweynihii hore ee Puntland


Jimco, Jannaayo 04, 2013 (HOL) — Madaxweynaha Galmudug, Jen. Cabdi Xasan Cawaale (Qaybdiid) ayaa maanta Waqooyiga magaalada Gaalkacyo ee gobolka Mudug kula kulmay madaxweynihii hore ee Puntland, Jen. Cadde Muuse Xirsi iyo mas’uuilyiin ka tirsan maamulka gobolka Mudug ee Puntland, isagoo kala hadlay iskaashi dhexmara labada maamul iyo adkeynta amniga gobolka Mudug, gaar ahaan magaalada Gaalkacyo oo falal ammaan-darro ay ka dhacaan.

Jen. Qaybdiid ayaa waxaa kulanka kala qaybgalay wasiirkiisa iskaashiga iyo xiriirka caalamiga ah, Maxamed Cali Nuur, taliyaha Booliiska Galmudug, Col. Cabdi Jaamac Cabdulle (Xabeeb) , waxaana kulanka intiisa badan ay labada dhinac uga hadleen sidii ay isaga kaashan lahaayeen xoojin ammaanka guud ee magaalada Gaalkacyo.

Kulankan ayaa wuxuu qayb ka yahay kulamo ay ku doonayaan maamullada Galmudug iyo Puntland inay ku xoojiyaan xiriirkooda wadashaqeyn, sidoo kalena ay ka hortagaan aanooyinka beeleed oo mararka qaarkood ka dhaca deegaannada ay maamulladan ka taliyaan.

Mas’uuliyiin u hadlay maamulka Galmudug ayaa sheegay in qodobadii looga hadlay kulankii maanta la isku af-gartay, ayna labadan dhinac ka go’an tahay sidii ay xasillooni waarta ugu soo rogi lahaayeen degmada Gaalkacyo.

Booqashada uu Jen. Qaybdiid ku tagay Waqooyiga Gaalkacyo ayaa imaanaya xilli waxgaradka iyo salaadiinta Puntland iyo Galmudug ay ku baaqeen inay labada maamul ka shaqeeyaan sidii loo sii dayn lahaa dad rayid ah oo lagu kala haysto degmooyinka Gaalkacyo iyo Garoowe.

Maamullada Galmudug iyo Puntland ayaa dhowr jeer oo hore isku eedeeyay falal ammaan-darro oo ka dhacay Gaalkacyo iyadoo aan la ogeyn waxay ka bedeli doonto xiriirka labada dhinac kulanka iyo booqashada uu Jen. Qaybdiid ku tagay Waqooyiga Gaalkacyo oo ay ka taliso Puntland.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-04 12:24 PM EST
Jimco, Jannaayo 04, 2013 (HOL) — Wasiirradda wasaaradda horumarinta adeegga bulshada xukuumadda Soomaaliya, Maryan Qaasim Axmed ayaa ka dalbatay dowladda Turkiga inay Soomaaliya ka hirgeliiyaan jaamacado ay wax ku bartaan dhallinyarada Soomaaliyeed iyo isbitaallo lagu daweeyo bukaannada Soomaaliyeed.

2013-01-04 11:51 AM EST
Jimco, Jannaayo 04, 2013 (HOL) — Ra’iisul wasaaraha Soomaaliya, Cabdi Faarax Shir-doon (Saacid) ayaa maanta saxaafadda u soo bandhigay saddex badmaaxe oo tan iyo dhammaadkii sannadkii 2010 afduub loogu haystay gudaha Soomaaliya, iyadoo ra’iisul wasaaruhu uu sheegay inaysan jirin wax madaxfurasho ah oo lagu soo daayay la-haystayaashan.

2013-01-04 9:23 AM EST
Jimco, Jannaayo 04, 2013 (HOL) — Cudurada haya labadan wiil oo u baahan inay helaan daweyn dibadda ah ayaa keenay inay noloshoodu ay adkaato, iyadoo waalidiintooda oo kasoo jeeda qoysas sabool ah ay awoodi waayeen inay Caruurtoodan u helaan adeeg caafimaad oo dibadda ah.

2013-01-04 8:09 AM EST
Jimco, Jannaayo 04, 2013 (HOL) — Wasiirka gaashaandhigga Soomaaliay, C/xakiin Maxamuud Xaaji Fiqi ayaa maanta oo Jimco ah sheegay in ciqaab adag la marsiin doono askarigii dhibaateeya shacabka Soomaaliyeed, isagoo xusay in ciidamada ay ku dhex-jiraan ciidammo doonaya inay sumcadda ciidanka xumeeyaan.

2013-01-04 7:49 AM EST
Jimco, Jannaayo 04, 2013 (HOL) — Guddiga ganacsatada xaafadda Islii ee magaalada Nairobi ayaa dacwado ka dhan ah ciidamada ammaanka ee Kenya u gudbiyay xildhibaanno iyo wasiirro ka tirsan Kenya kaddib kulan ay maanta ku yeesheen magaalada Nairobi.

2013-01-04 1:29 AM EST
Jimco, Jannaayo 04, 2013 (HOL) — Madaxweynaha Soomaaliya, Xasan Sheekh Maxamuud ayaa ka warbixiyay heshiisyo dhexmaray dowladaha Soomaaliya iyo Suudaan, kaddib booqasho laba maamood ah oo uu dalkaas ku tagay.

2013-01-04 1:09 AM EST
Jimco, Jannaayo 04, 2013 (HOL) — Xoogagga Al-shabaab ee saldhiggoodu yahay buuraha Gollis ayaa xalay weerarro ku qaaday koontaroollo ku yaalla duleedka Koonfureed ee degmada Boosaaso, kuwaasoo dhaliyay khasaare kooban.