3/29/2024
Today from Hiiraan Online:  _
Wararka Maanta- Jimco, Jan 4 , 2013
Dagaalyahanno ka tirsan Al-shabaab oo weeraray Koontaroollo Boosaaso ku dhow iyo Xiisado ka taagan Puntland

Jimco, Jannaayo 04, 2013 (HOL) — Xoogagga Al-shabaab ee saldhiggoodu yahay buuraha Gollis ayaa xalay weerarro ku qaaday koontaroollo ku yaalla duleedka Koonfureed ee degmada Boosaaso, kuwaasoo dhaliyay khasaare kooban.

Wararka laga helayo degmada Boosaaso ayaa sheegaya in dagaalladu ay dhaceen xalay 10:30 fiidnimo ayna socdeen muddo kooban, waxaana lagu dilay mid ka mid ah xoogaggii Al-shabaab iyadoo aysan ciidamada Puntland uu kaga dhintay hal askari, halka xoogaggii Al-shabaabna looga dilay saddex dagaalyahan shan kalena looga dhaawacay.

“Koontaroolka Laag oo 30-km u jira degmda iyo koontaroolka degmada laynga soo galo oo isaguna 10-km u jira magaalada ayay weerarradu ka dhaceen, waxayna ahaayeen kuwo muddo kooban socday,” ayuu yiri goobjooge ku sugan Boosaaso oo la hadlay HOL.

Maamulka Puntland ayaa sheegay in la iska difaacay xoogaggii weerarka soo qaaday ayna ka dileen saddex ka mid ah xoogaggooda ayna ka dhaawaceen shan kale, iyadoo Al-shabaabna aysan weli ka hadlin dagaalkii xalay ka dhacay duleedka Boosaaso, waxaana uu kusoo beegmayaa weerarkan xilli uu wasiirka ammaanka Puntland sheegay inay qaadayaan weerarro ka dhan ah Al-shabaab.

Weerarkan ayaa noqonaya kii labaad oo oo ka dhaca gobolka Bari oo ay ku soo qaaddo Al-shabaabta Gollis, iyadoo weerarkii hore uu bishii lasoo dhaafay ee December ka dhacay deegaan lagu magacaabo Sugurre oo ay ku sugnaayeen ciidammo ka tirsan kuwa Puntland waxaana halkaas lagu dilay 11 askari oo ka tirsan ciidamada Puntland iyo toddoba ka mid ah xoogagga Al-shabaab, iyadoo weerarradan ay imaanayaan xilli uu magaaladaas ku sugan yahay madaxweynaha Puntland C/raxmaan Faroole.

Dhanka kale, xiisado ka dhashay doorashooyinka ayaa ka taagan deegaannada Puntland ay ka taliso, iyadoo mucaaradku ay si aad ah uga soo horjeestaan muddada halka sano ah ee uu madaxweyne Faroole ku kororsaday muddada uu xilku hayo.

Siyaasiyiinta ku sugan Puntland oo magacyadooda sababo dhinaca ammaanka ah u qariyay ayaa sheegay in xiisadaha hadda taagan ay sababi karaan iska-horimaadyo ka dhaca Puntland, inkastoo madaxweyne Faroole uu dadaal ugu jiro inaysan dhibaatooyin dhicin.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/4/2013 12:24 PM EST
Jimco, Jannaayo 04, 2013 (HOL) — Wasiirradda wasaaradda horumarinta adeegga bulshada xukuumadda Soomaaliya, Maryan Qaasim Axmed ayaa ka dalbatay dowladda Turkiga inay Soomaaliya ka hirgeliiyaan jaamacado ay wax ku bartaan dhallinyarada Soomaaliyeed iyo isbitaallo lagu daweeyo bukaannada Soomaaliyeed.

1/4/2013 11:51 AM EST
Jimco, Jannaayo 04, 2013 (HOL) — Ra’iisul wasaaraha Soomaaliya, Cabdi Faarax Shir-doon (Saacid) ayaa maanta saxaafadda u soo bandhigay saddex badmaaxe oo tan iyo dhammaadkii sannadkii 2010 afduub loogu haystay gudaha Soomaaliya, iyadoo ra’iisul wasaaruhu uu sheegay inaysan jirin wax madaxfurasho ah oo lagu soo daayay la-haystayaashan.

1/4/2013 11:50 AM EST
Jimco, Jannaayo 04, 2013 (HOL) — Madaxweynaha Galmudug, Jen. Cabdi Xasan Cawaale (Qaybdiid) ayaa maanta Waqooyiga magaalada Gaalkacyo ee gobolka Mudug kula kulmay madaxweynihii hore ee Puntland, Jen. Cadde Muuse Xirsi iyo mas’uuilyiin ka tirsan maamulka gobolka Mudug ee Puntland, isagoo kala hadlay iskaashi dhexmara labada maamul iyo adkeynta amniga gobolka Mudug, gaar ahaan magaalada Gaalkacyo oo falal ammaan-darro ay ka dhacaan.

1/4/2013 9:23 AM EST
Jimco, Jannaayo 04, 2013 (HOL) — Cudurada haya labadan wiil oo u baahan inay helaan daweyn dibadda ah ayaa keenay inay noloshoodu ay adkaato, iyadoo waalidiintooda oo kasoo jeeda qoysas sabool ah ay awoodi waayeen inay Caruurtoodan u helaan adeeg caafimaad oo dibadda ah.

1/4/2013 8:09 AM EST
Jimco, Jannaayo 04, 2013 (HOL) — Wasiirka gaashaandhigga Soomaaliay, C/xakiin Maxamuud Xaaji Fiqi ayaa maanta oo Jimco ah sheegay in ciqaab adag la marsiin doono askarigii dhibaateeya shacabka Soomaaliyeed, isagoo xusay in ciidamada ay ku dhex-jiraan ciidammo doonaya inay sumcadda ciidanka xumeeyaan.

1/4/2013 7:49 AM EST
Jimco, Jannaayo 04, 2013 (HOL) — Guddiga ganacsatada xaafadda Islii ee magaalada Nairobi ayaa dacwado ka dhan ah ciidamada ammaanka ee Kenya u gudbiyay xildhibaanno iyo wasiirro ka tirsan Kenya kaddib kulan ay maanta ku yeesheen magaalada Nairobi.

1/4/2013 1:29 AM EST
Jimco, Jannaayo 04, 2013 (HOL) — Madaxweynaha Soomaaliya, Xasan Sheekh Maxamuud ayaa ka warbixiyay heshiisyo dhexmaray dowladaha Soomaaliya iyo Suudaan, kaddib booqasho laba maamood ah oo uu dalkaas ku tagay.