2014-10-24
Today from Hiiraan Online:  _
Wararka Maanta- Sabti, Jan 26, 2013
Ciidamada Ammaanka Dowladda Soomaaliya oo howlgallo ka sameeyay Qaar ka mid ah Degmooyinka Muqdisho


Sabti, Jannaayo 26, 2013 (HOL) — Ciidamada dowladda Soomaaliya ayaa saaka waabarigii howlgallo ballaaran ka bilaabay qaar katirsan degmooyinka gobolka Banaadir, iyadoona ay ciidamadu howlgalladaasi kusoo qabqabteen dad badan oo looga shakisanyahay in ay xiriir la leeyihiin Dhaq-dhaqaaqa Al-shabaab.

Ciidamada dowladda oo isugu jira Nabadsugid, Boolis iyo Militari ayaa saaka waabarigii ku jarmaaday xaafado katirsan degmada Kaaraan ee gobolka Banaadir,waxayna ciidamadu howlgalladaasi ku qabqabteen dad u badan dhalinyaro.

Taliyaha ciidamada booliska gobolka Banaadir Jen: Axmed Xasan Maalin oo warbaahinta la hadlay ayaa sheegay in saaka aroortii ay howlgallo ammaanka lagu xaqiijinayo ka bilaabeen xaafado katirsan degmada Kaaraan ee gobolka Banaadir.

Masuulkani ayaa sheegay in xaafadaha ay howlgallada kasocdaan ay kamid tahay xaafadda Jamhuuriya oo uu xusay in maalmihii u danbeeyay laga soo sheegayay falal amni darro oo ay geystaan kooxo hubeysan oo xilliyada habeenkii ah dadka isbaareysta, wuxuuna xusay in howlgallada ay ku qabqabteen dad badan oo looga shakisanyahay falalkaasi amni darro.

Ciidmaada nabdsugidda, Booliska iyo Militariga oo iskaashanaya ayaa maalmihii u danbeeyay howlgallo ballaaran ka waday degmooyinka kala duwan ee gobolka Banaadir, waxaana howlgalladani ay qeyb ka yihiin dadaallada ay dowladda Soomaaliya ugu jirto xaqiijinta ammaanka magaalada Muqdisho ee caasimadda dalka Soomaaliya.

Dowladda Soomaaliya ayaa hore shaaca uga qaaday in mudnaanta koobaad ay siin doonto dhinaca nabadgelyada, waxaana tan iyo wixii waqtigaasi ka danbeeyay ammaanka Muqdisho uu noqday mid aad uga wanaagsan sidii hore, iyadoona ciidamada booliska iyo kuwa nabadsugidda ay gudaha magaalada ka bilaabeen howlgallo maalin iyo habeen ah.

Xasan Nuur, Hiiraan Online
Hnur@hiiraan.com
Muqdisho, Soomaaliya





Post your comments

2013-01-26 12:29 PM EST
Sabti, Jannaayo 26, 2013 (HOL) —Wasiiradda wasaaradda horumarinta adeegga bulshada, Maryan Qaasim ayaa sheetay in xukuumadda Soomaaliya ay xabsiga dhigtay saddex sarkaal lala xiriiriyay arrimo ku saabsan musuqmaasuq lagu sameeyay deeqo waxbarasho oo Soomaaliya ay ka heshay dalka Turkiga.

2013-01-26 12:05 PM EST
Sabti, Jannaayo 26, 2013 (HOL) — Booliiska Midowga Afrika ee AMISOM ayaa tababar u soo gabgabeeyay saraakii ka tirsan booliiska Soomaaliya tababarkii saddexaad oo ku saabsan baarista dambiyada, iyadoo saaakiishan lagu guddoonsiiyay shahaadooyin dugsiga tababarka booliiska ee Jen. Kaahiye.

2013-01-26 10:27 AM EST
Sabti, Jannaayo 26, 2013 (HOL) —Munaasabadda furitaanka idaacaddan cusub ayaa maanta ka dhacday xaruntii hore ee Gobolka ee loo yaqaan (K2) iyadoona ay kasoo qeybgaleen madax katirsan dowladda federaalka Soomaaliya iyo masuuliyiin ka socotay maamulka KMG magaalada Kismaayo.

2013-01-26 8:12 AM EST
Sabti, January 26, 2013(HOL): Waxaa mar kale ka dhacay garoonka kubbadda cagta Cawaale ee magaalada Gaalkacyo munaasabad ballaaran oo ay isku arkayeen boqoolal dhalinyaro ah kuwaasi oo u kala ciyaara kooxaha da' yarta ah ee Koonfurta iyo Waqoyinga Gaalkacyo iyadoona dhawaan tartamo kala gadisan oo dhanka cayaaraha ah ay u furmi doonan.

2013-01-26 7:30 AM EST
Sabti, Jannaayo 26, 2013 (HOL) —Xukuumadda Soomaaliya ayaa sheegtay inay wax ka qabanayso hoos u dhaca ku yimid shillinka Soomaalga iyo sirir bararka raashinka, iyadoo wasiirka maaliyadda uu sheegay inay qaadi doonnaan tallaabo ay wax uga qabanayaan arrinaas.

2013-01-26 4:21 AM EST
Sabti, Jannaayo 26, 2013 (HOL) — Ergayga xoghayaha guud ee Qaramada Midoobay u qaabilsan arrimaha Soomaaliya, Danijre Augustine Mahiga oo ku sugan magaalada Addis Ababa ayaa beesha caalamka ka dalbaday in dhaqaale ay ku bixiyaan dhismaha ciidamada Soomaaliya si ay awood ugu yeeshaan inay la wareegaan ammaanka guud ee dalka.

2013-01-26 4:02 AM EST
Sabti, Jannaayo 26, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa maanta oo Sabti ka dhoofay Muqdisho, iyagoo kusii jeeda dalka Itoobiya, halkaasoo ay uga qaybgalayaan shir-sannadeedka Midowga Afrika.