2014-10-01
Today from Hiiraan Online:  _
Wararka Maanta- Sabti, Jan 26, 2013
Madaxweynaha Somalia oo u ambabaxay Itoobiya, halkaas oo uu kaga Qayb-galayo shirka Ururka Midowga Afrika


Sabti, Jannaayo 26, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa maanta oo Sabti ka dhoofay Muqdisho, iyagoo kusii jeeda dalka Itoobiya, halkaasoo ay uga qaybgalayaan shir-sannadeedka Midowga Afrika.

Wafdiga madaxweynaha ayaa waxay ka mid ahaa xubno ka tirsan madaxtooyada, waxaana sii dhaweeyay xubno ay ka mid yihiin guddoomiyaha baarlamaanka, ra'iisul wasaaraha, wasiirro iyo xildhibaanno, iyadoo inta uu ku sugan yahay magaalada Addis Ababa kulammo la yeelan doona madaxda Afrikaanka ah ee shirkaas kasoo qaybgalay kuwaasoo uu kala hadli doono arrimo ku saabsan Soomaaliya.

Mudane Xasan Sheekh ayaa dhowr jeer oo hore sheegay in dowladdiis ay xoogga saari doonto sidii dalka ay nabad ugu soo rogi lahayd ayna ula dagaalami lahayd dambiyada uu ka mid yahay musuqmaasuqa oo inta lagu eedeeyo dowladaha Soomaaliya.

Safarnkan ayaa wuxuu noqonayaa kii labaad oo madaxweynaha Soomaaliya uu ku tago dalka Itoobiya oo ay ciidammo ka joogaan Soomaaliya, iyadoo kulanka sannadkan ee ururka Midowga Afrika lagu wado in looga hadlayo dalalka ay xasaradaha ka taagan yihiin sida dalka Maali oo dagaallo ay ka socdaan iyo kacdoonnada Masar.

Madaxweynaha iyo wafdigiisa ayaa waxay u sii dhoofi doonaan dalka Belgium halkaasoo uu kaga qaybgeli doono shir looga hadlayo arrimaha Soomaaliya oo dalalka Yurub ay ku yeelan doonaan magaaladaas, iyadoo uu dalkan noqonayo dalkii labaad ee ku yaalla Yurub oo uu madaxweyne Xasan Sheekh ku tago safar shaqo.

Dhawaan ayaa madaxweynuhu wuxuu kasoo laabtay safar uu ku tagay dalka Mareykanka, iyadoo dowladda Mareykanka ay aqoonsatay dowladda Soomaaliya, isagoo sheegay in dowladdiisa ay xoogga saari doonto sidii ay u xoojin lahayd xiriirka caalamka ayna dib ugu soo celin lahayd ammaanka guud ee dalka kaddib 22 sano oo ay colaado jireen.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-26 12:29 PM EST
Sabti, Jannaayo 26, 2013 (HOL) —Wasiiradda wasaaradda horumarinta adeegga bulshada, Maryan Qaasim ayaa sheetay in xukuumadda Soomaaliya ay xabsiga dhigtay saddex sarkaal lala xiriiriyay arrimo ku saabsan musuqmaasuq lagu sameeyay deeqo waxbarasho oo Soomaaliya ay ka heshay dalka Turkiga.

2013-01-26 12:05 PM EST
Sabti, Jannaayo 26, 2013 (HOL) — Booliiska Midowga Afrika ee AMISOM ayaa tababar u soo gabgabeeyay saraakii ka tirsan booliiska Soomaaliya tababarkii saddexaad oo ku saabsan baarista dambiyada, iyadoo saaakiishan lagu guddoonsiiyay shahaadooyin dugsiga tababarka booliiska ee Jen. Kaahiye.

2013-01-26 10:27 AM EST
Sabti, Jannaayo 26, 2013 (HOL) —Munaasabadda furitaanka idaacaddan cusub ayaa maanta ka dhacday xaruntii hore ee Gobolka ee loo yaqaan (K2) iyadoona ay kasoo qeybgaleen madax katirsan dowladda federaalka Soomaaliya iyo masuuliyiin ka socotay maamulka KMG magaalada Kismaayo.

2013-01-26 8:12 AM EST
Sabti, January 26, 2013(HOL): Waxaa mar kale ka dhacay garoonka kubbadda cagta Cawaale ee magaalada Gaalkacyo munaasabad ballaaran oo ay isku arkayeen boqoolal dhalinyaro ah kuwaasi oo u kala ciyaara kooxaha da' yarta ah ee Koonfurta iyo Waqoyinga Gaalkacyo iyadoona dhawaan tartamo kala gadisan oo dhanka cayaaraha ah ay u furmi doonan.

2013-01-26 7:30 AM EST
Sabti, Jannaayo 26, 2013 (HOL) —Xukuumadda Soomaaliya ayaa sheegtay inay wax ka qabanayso hoos u dhaca ku yimid shillinka Soomaalga iyo sirir bararka raashinka, iyadoo wasiirka maaliyadda uu sheegay inay qaadi doonnaan tallaabo ay wax uga qabanayaan arrinaas.

2013-01-26 4:55 AM EST
Sabti, Jannaayo 26, 2013 (HOL) —Ciidamada dowladda Soomaaliya ayaa saaka waabarigii howlgallo ballaaran ka bilaabay qaar katirsan degmooyinka gobolka Banaadir, iyadoona ay ciidamadu howlgalladaasi kusoo qabqabteen dad badan oo looga shakisanyahay in ay xiriir la leeyihiin Dhaq-dhaqaaqa Al-shabaab.

2013-01-26 4:21 AM EST
Sabti, Jannaayo 26, 2013 (HOL) — Ergayga xoghayaha guud ee Qaramada Midoobay u qaabilsan arrimaha Soomaaliya, Danijre Augustine Mahiga oo ku sugan magaalada Addis Ababa ayaa beesha caalamka ka dalbaday in dhaqaale ay ku bixiyaan dhismaha ciidamada Soomaaliya si ay awood ugu yeeshaan inay la wareegaan ammaanka guud ee dalka.