2014-09-21
Today from Hiiraan Online:  _
Wararka Maanta- Jimco, Jan 25, 2013
Dowladda Kenya oo Weydiisatay Qaramada Midoobay in loo celiyo Dhaqaalihii kaga baxay Howgalkii Ciidan ee Soomaaliya



Jimco, Jannaayo 25, 2013 (HOL) —Danjiraha Kenya u fadhiya Qaramada Midoobay, Macharia Kamau ayaa weydiistay Qaramada Midoobay in dalka Kenya loo celiyo dhaqaalihii kaga baxay howgalkii milateri ee ay ku galeen Soomaailya.

Golaha wasiirrada dalka Kenya oo Khamiistii shalay kulan ku yeeshay aqalka madaxtooyada ayaa sheegay in Kenya ay magdhow ahaan u heshay lacag gaaraysa 28-milyan oo doollar, iyagoo sheegay in howlgalka Kenya uu kaga baxay dhaqaale dhan 98-milyan oo doollar.

Qaramada Midoobay ayaa bishii July ee lasoo dhaafay u ballanqaaday inay Kenya siinayso 131-milyan oo doollar, balse ay heleen oo keliya 941,000 oo doollar, sida uu baahiyay wargeyska Daily Nation ee kasoo baxa Nairobi.

“Dhaqaalahan wuxuu ahaa mid loogu talogalay in ciidamada Kenya lagu diyaariyo looguna iibiyo qalab ay ciidamadu ku howlgalaan,” ayuu Kamau u sheegay xubnaha golaha ammaanka ee Qaramada Midoobay. Isagoo intaas ku daray inaysan u dulqaadanayn in bixinta dhaqaalahaas uu dib u dhaco.

Golaha wasiirrada Kenya ayaa sheegay  in dhaqaalaha loo baahan yahay in lagu maal-geliyo barnaamijyo deg-deg ah oo lagu horumarinayo bulshada iyo dhaqaalaha dalka oo hoos u dhac uu ku yimid.

Ciidamada Kenya ayaa si iskood ah u galay Soomaailya bishii Oktoobar ee sannadkii 2011 si ay ula dagaalamaan Al-shabaab oo ay ku eedeeyeen inay ka dambeysay afduubyo, qaraxyo iyo dilal ka dhacay gudaha Kenya, gaar ahaan deegaanno ku dhow xuduuda Kenya iyo Soomaaliya u dhexeeya, iyadoo ciidamada Kenya ay sannadkii lasoo dhaafay ku biireen howgalka Midowga Afrika ee AMISOM.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-25 5:36 PM EST
Jimco, January 25, 2013(HOL): Xulka Qaranka Kubadda Kolayga Soomaaliya oo tartanka FIBA Zone 5 ee dalka Tanzania ka socda ka qeybgelaya ayaa waxaa uu soo gaaray rubac-dhammaadka tartanka ama semi-finalka, hayeeshee ciyaartii caawa dhexmartay Somalia iyo Rwanda ayuu xulka Somalia ku haray.

2013-01-25 12:23 PM EST
Jimco, Jannaayo 25, 2013 (HOL) —Kooxo hubeysan ayaa gallinkii dambe ee maanta ku dilay deegaan lagu magacaabo Hargaanti oo 40-km ka baxsan degmada Bu’aale ee gobolka Jubbad Dhexe nabaddoon lagu magacaabi jiray Daahir Caydiid.

2013-01-25 11:56 AM EST
Jimco, Jannaayo 25, 2013 (HOL) —Taliyaha hay’adda nabad-sugidda Qaranka Soomaaliyeed, Axmed Macallin Fiqi ayaa sheegay inaysan waxba ka jirin warar sheegaya in dadka lagu soo qabqabto howgallda laga sameeyo Muqdisho qaarkood lagu sii-daayo lacago.

2013-01-25 11:35 AM EST
Jimco, Jannaayo 25, 2013 (HOL) —Shabakadda isku xirna bulshada ee Twitter ayaa xannibtay maanta oo Jimco ah boggii ay Al-shabaab ku lahayd shabakaddaas, kaddib markii ay ku baahiyeen sawirro muujinaya mid ka mid ah askarta kumaandooska Faransiiska oo la dilay iyo hanjabaad lagu sheegay in la dilayo Dennis Allex.

2013-01-25 1:40 AM EST
Jimco, Jannaayo 25, 2013 (HOL) —Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in midnimada Soomaaliya ay tahay mid laga maarmaan ah oo howlaha horyaalla dowladda ay ka mid yihiin sidii midnimada ummaddan loo ilaalin lahaa.

2013-01-25 1:27 AM EST
Jimco, Jannaayo 25, 2013 (HOL) —Madaxweynaha Dowladda Soomaaliya, Xasan Sheekh Maxmauud ayaa sheegay in dowladdiisu ay ka hortagayso saddex qodob oo aad u fool xun, kuwaasoo uu sheegay inuu ka mid yahay kufsiga haweenka.

2013-01-25 1:05 AM EST
Jimco, Jannaayo 25, 2013 (HOL) —Mucaaradka Jabuuti ayaa sannadkan isku diyaarinaya ka qaybgalka doorashooyinka baarlamaanka ee dhici doona bisha Feberaayo ee sannadkan, kaddib markii is-bedel lagu sameeyay bishii November ee lasoo dhaafay nidaamka doorashada ee baarlamaanka Jabuuti kaasoo ahaa in kuraasta oo dhan ay buuxiyaan kooxdii hesha aqlabiyadda baarlamaanka, kaasoo ay mucaaradku kasoo horjeedeen.