2014-11-29
Today from Hiiraan Online:  _
Wararka Maanta- Khamiis, Jan 24, 2013
Olole Nadaafadeed oo laga hirgeliyay Isbitaalka guud iyo degaannada kale ee degmada Laascaanood



Khamiis, January 24, 2013(HOL): Olole Nadaafadeed oo ay soo qaban-qaabiyeen fulinayeena dawladda Hoose ee degmada Laascaanood ayaa laga fuliyay Isbitaalka dhexe iyo qaybo kale oo ka mid ah degaannada dadka ka dhexeeya ee ku yaalla magaaladda Laascaanood ee xarunta Gobolka Sool.

 

Ololahan ayaa socda todobaadkii labaad oo ay dawladda hoose ballan-qaadday inay maalin kasta oo Khamiis ah samayn doonto. Waxaa ka hadlay Xoghayaha dawladda Hoose Cabdi Khayrre Dirir oo sheegay in ay tallaabadani tahay ballankoodii ay ka qaadeen dadweynaha.

 

Xoghayaha ayaa ka codsaday dadweynaha in ay bixiyaan canshuurta si ay u buuxiyaan baahida hawleed ee looga baahan yahay, una higsadaan horumar ay degmada ku soo kordhiyaan.

 

Sidoo kale C/qaadir Jaamac Saalax Duqa degmada Laascaanood ayaa isaguna sheegay inay diyaar u yihiin sidii ay waxqabad buuxa u samayn lahaayeen, taasna loo baahan yahay inay bulshada Laascaanood ka caawiyaan.

 

Hawlaha ay wadaan dawladda Hoose ee degmada Laascaanood ayaa u muuqanaya mid soo jiidanaya bulsho weynta degan magaaladda Laascaanood oo si aad ah uga biyo diidanaa bixinta cashuurta taas oo sabab ay uga dhigaan kalsoonida maamulka Somaliland ay u hayaan oo liidata.

 

Dhanka kalena munaasibad lagu maamuusayay xuska dhalashada nabigeenii Suubanaa Muxamed N.N.K.H ayaa maanta ka dhacday Barxadda dugsiga hoose dhexe ee Darwiish ee magaalada Buuhoodle ee gobolka Cayn.

 


Munaasibaddani oo ahayd mid ballaaran, isla markaasna ay ka soo qaybgaleen madax ka tirsan maamul goboleedka Khaatumo oo uu hoggaaminayo madaxweynaha maamul goboleedka Khaatumo Maxamed Yuusuf Jaamac (Indho-sheel), waxgarad, aqoonyahanno, siyaasiyiin, culumaa’uddiin, haween, dhalinyaro, iyo bulshada qaybaheeda kala duwan ayaa ahayd mid lagu maamuusayey xuska dhalashada Nabi Muxamed N.N.K.H.

 

Munaasibadan oo ay soo qabanqaabiyeen culimada Buuhoodle qaarkood ayaa waxaa ugu horreynba munaasibaddani ka hadlay Sheekh Cawil Abshir Xaashi oo ka mida culumaa’udiinka Buuhoodle, isagoona wax ka xusay muhiimadda ay leedahay maamuusidda xuska dhalashada nabiga N.N.K.H.

 

Waxaa iyana sidoo kale halkaasi ka hadlay madaxweynaha maamul goboleedka Khaatumo Maxamed Yuusuf Jaamac (Indha sheel), oo ka warbixiyey maalintan waxaanun xusay in barashada diintu tahay mid qof kasta looga baahan yahay. Sheekh C/raxmaan Mursal Xaaji, iyo Sheekh Maxamuud Yuusuf Faarax, iyagoona dhammaantood ku dheeraaday xuska dhalashada nabigeena Muxamed N.N.K.H.

 

Waa markii ugu horreysey muddo dheer ee meel fagaare ah sidan oo kale loogu weyneeyo xuska dhalashada Nebigeenii Suubanaa ee Maxamed Naxariis iyo nabadgelyo korkiisa ha ahaatee, taas oo ku soo gabgabawdey jewi deganaan ah.


 

Saynab Cabdi Warsame, Hiiraan Online

xidigtiidhiciweydey@hotmail.com

Laascaanood, Gobolka Sool





Post your comments

2013-01-24 3:49 PM EST
Khamiis, January 24, 2013(HOL): Ururka Adal Unity & Development ee Gobolada Awdal/Selel Iyo Gabiley ayaa maanta deeq raashina soo gaadhsiiyay Dhakhtarka dhimirka Boorama, deeqdaas oo ahayd lacag dhan $550 oo Dollarka maraykanka ah, taasoo loogu badaly raashin dhan 34 Kiish oo Bariis ah oo ay kiishkiiba ku jiraan 25Kg.

2013-01-24 12:42 PM EST
Khamiis, Jannaayo 24, 2013 (HOL) — Saraakiisha dalka Kenya ayaa sheegay Khamiista maanta ah inaysan Al-shabaab kala xaajoon doonin la-haystayaal dalkeeda u dhashay oo ay Al-shabaab ku goodisay inay dili doonaan muddo saddex toddobaad gudahood ah, haddii aanay xukuumadda Kenya sii-dayn muslimiin ku eedeysan argagaxisonimo oo ku xir-xiran xabsiyada dalkaas.

2013-01-24 7:52 AM EST
Khamiis, Jannaayo 24, 2013 (HOL) — Ugu yaraan shan qof oo dhinacyadii dagaalamay ka tirsan ayaa ku dhintay dagaal xalay ciidamada dowladda Soomaaliya iyo Al-shabaab ku dhexmaray demada Jowhar ee xarunta gobolka Shabeellada Dhexe.

2013-01-24 7:25 AM EST
Khamiis, Jannaayo 24, 2013 (HOL) — Madaxweynaha Soomaaliya, Xasan Sheekh Maxamuud, ra’iisul wasaare Cabdi Faarax Shirdoon Saacid iyo xubno wasiirro ah ayaa ka qaybgalay maanta Khamiis ah xaflad ballaaran oo lagu soo dhaweynayay aqoonsigii Mareykanku siiyay dowladda Soomaaliya oo lagu qabtay hoteel ku yaalla Muqdisho.

2013-01-24 7:12 AM EST
Khamiis, Jannaayo 24, 2013 (HOL) —Laba askari oo ka mid h ciidamada dowladda Soomaaliya ayaa shalay lagu dilay degmada Afgooye ee gobolka Shabeellada Hoose sida ay saxaafadda u sheegeen saraakiisha ammaanka ee degmadaas, iyadoo mid kalena lagu dhaawacay isla weerarkaas.

2013-01-24 7:04 AM EST
Khamiis, Jannaayo 24, 2013 (HOL) — Saraakiisha ciidamada maamulka degmada Baladweyne iyo kuwa Jabuuti ee howlgalka midowgga Africa AMISOM ayaa tababar uga furay magaalada Baladweyne ilaa 1000 maleeshiyaad ah oo marka danbe la doonayo in ay ka mid noqdaan ciidamada maamulka dowladda ee gobollka Hiiraan.

2013-01-24 7:04 AM EST
Khamiis, Jannaayo 24, 2013 (HOL) — Magaalada Hargeysa ayaa maanta si weyn looga xusay dhalashadii Nebigeenii Maxamed (NNKHA) oo ku began taariikhdda Hijriyadda 12-ka Rabiicul Awal 1434.

2013-01-24 2:25 AM EST
Khamiis, Jannaayo 24, 2013 (HOL) —Xarakada Al-shabaab ayaa war ay soo saartay Arbacadii shalay ku sheegtay inay dilayso la haystayaasha Kenyanka ah ee ay gacanta ku hayso, haddi dowladd Kenya aysan xabsiyadeeda kasii dayn dhammaan dadka u xirxiran eedeymaha argagaxisonimada ee ku jira xabsiyadooda.

2013-01-24 2:24 AM EST
Khamiis, Jannaayo 24, 2013 (HOL) — Dowladda federaalka Soomaaliya ayaa loogu baaqay inay si dhaqso ah kusii dayso wariye Cabdicasiis Cabdinuur Ibraahim iyo saddex qof oo kale kuwaasoo u xiran arrin la xiriirta haweeney sheegtay inay kufsi u geysteen ciidamada dowladda Soomaaliya.