2014-10-23
Today from Hiiraan Online:  _
Wararka Maanta- Arbaco, Jan 16, 2013
Xarakada Al-shabaab oo dil Toogasho ah ku xukuntay Sarkaal Faransiis ah oo ay Sannado Afduubka ku haysteen



Arbaco, Jannaayo 16, 2013 (HOL) — Xarakada Al-Shabaab ayaa bayaan ay soo saartay ku sheegtay in go'aan kama dambeys ah ay ku gaareen in dil toogasho ah ay ku fulinayso sarkaalka Faransiiska ee Dennis Allex kaasoo gacanta ay ku hayeen saddexdii sano ee ugu dambeeyay.

Warsaxaafadedka Al-shabaab ayaa lagu sheegay in maamulka Faransiiska uu ku qamaaray noloshii sarkaalkooda afduubka ku jira; isla markaana ay muujinayso in xukuumadda Farancois Holland uusan wac macno ah ugu fadhin dhiigga muwaadinkooda.

"Mujaahidiinta ayaa go'aankan gaaray kaddib saddex sano oo ay gacanta ku hayeen Dennis Allex, iyagoo dadaallo badan ku bixiyay in sii daytniisa lagu dhameeyo wadahadal, balse Faransiiska ayaa laba qaab laba-waji-leyn ah ku dhaqmayay mudadaas, sidaas daraadeed ma aysan qiyaanayn mujaahidiinta balse waxay ku qamaarayeen nolosha Allex," ayaa lagu yiri war-saxaafadeedka ay Al-shabaab soo saartay.

Sidoo kale, warsaxaafadeedka Al-shabaab ayaa meesha ka saaray hadallo saraakiisha Faransiiska ay ku sheegeen in go'aanka weerarka fashilmay ay gaareen kaddib markii wadahadalkii lagu sii dayn lahaa sarkaalkooda, iyadoo lagu sheegay bayaanka in Al-shabaab iyo Faransiiska ay wadahadlladii ugu dambeeyay oo ay yeesheen uu kasoo wareegay hal toddobaad hor weerarkii Buulo-Mareer.

Dowladda Faransiiska ayaa sheegay horay u sheegtay in Allex uu dhintay, balse waxaa taas diidday Al-shabaab; inkastoo Al-shabaab aysan soo bandhigin xilligan wax caddeyn ah oo muujinaya in Denis Allex uu nool yahay.

Ugu dambeyn, qoraalka Al-shabaab kasoo saartay sarkaalka Farnsiiska ah ayaan sheegin qaabka loo fulinayo xukunka dilka ah iyo waqtiga uu dhacayo, balse waxaan shaki ku jirin in sarkaalka Faransiiska ah uu la kulmi doono  ciqaabtii ay ku riday xukuumaddiisa.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-16 1:18 PM EST
Arbaco, Jannaayo 16, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in dowladda Soomaaliya ay soo dhaweynayso wadahadallo walba oo nabadeed, isagoo ugu baaqay dhammaan dhinacyada Soomaalida inay kusoo biiraan qorshaha nabadeed ee dalka.

2013-01-16 11:58 AM EST
Arbaco, Jannaayo 16, 2013 (HOL) — Ururrada bulshada rayidka Somalia ayaa munaasabad ay soo qabanqaabiyeen oo ay ka qaybgaleen waxgarad fara badan oo matalayay qaybaha bulshada Soomaaliyeed iyo qaar ka mid ah fanaaniinta ayaa lagu soo dhaweeyay dhallinyaro dhawaan ku dhawaaqay inay ka tanaasuleen falalka burcadbadeednimada.

2013-01-16 8:33 AM EST
Arbaco, Jannaayo 16, 2013 (HOL) —Ciidamada maamulka KMG ee degmada Kismaayo ayaa xalay toogasho ku dilay mid kamid ah dadka rayidka, waxaana ilaa imika la garanayn sababta ka danbeeysay dilkiisa.

2013-01-16 8:24 AM EST
Arbaco, Jannaayo 16, 2013 (HOL) —Taliyaha ciidamada Booliska Soomaaliyeed Shariif Sheekhunaa Maye ayaa shir jaraa’id oo uu maanta ku qabtay xafiiskiisa magaalada Muqdisho uga warbixiyay sababaha loo xiray wariye C/casiis Cabdinuur Ibraahim Koronto oo maalmihii ugu danbeeyay ay isa soo tareeysay cambaareynta ku aadan xarigiisa.

2013-01-16 7:57 AM EST
Arbaco, Jannaayo 16, 2013 (HOL) — Ciidamada Midowga Afrika ee AMISOM ayaa sheegay inay baaritaanno ku sameyn doonaan dhacdo dad rayid ay ku dhinteen oo shalay ka dhacday deegaanka Leego ee gobolka Shabeellada Hoose.

2013-01-16 7:39 AM EST
Arbaco, Jannaayo 16, 2013 (HOL) — Maxkamadda ciidamada dowladda qalabka sida ee dowladda Soomaaliya ayaa maanta xukunno dil ah ku fulisay laba askari oo ka tirsanaa ciidamada dowladda Soomaaliya kuwaasoo ku kala eedeysnaa dil iyo kufsi.

2013-01-16 7:38 AM EST
Arbaco, Jannaayo 16, 2013 (HOL) — Xarunta hay'adda wadahadalka bulshada ee CCD ayaa maanta lagu soo gaba-gabeeyay kulan wadatashi ahaa oo looga hadlayay qorshe-howleedka hay'adda ee sannadka 2013, kaasoo laga soo saaray qodobbo la xiriira yoolka hay'adda ay hiigsaneyso sannadkan.

2013-01-16 7:14 AM EST
Arbaco, Jannaayo 16, 2013 (HOL) — Wareegto kasoo baxday xafiiska madaxweynaha Soomaaliya, Xasan Sheekh Maxamuud ayaa wuxuu guddoomiyaha bankiga dhexe ee Qaranka u magacaabay, C/salaan Cumar Hadliye.

2013-01-16 6:40 AM EST
Arbaco, Jannaayo 16, 2013 (HOL) — Madaxweynaha Puntland iyo wefdi uu horkacayo oo maanta ka dhoofay garoonka diyaaradaha magaalada Boosaaso ee xarunta gobolka Bari, ayaa u kicitimay dalka Jabuuti.

2013-01-16 6:39 AM EST
Arbaco, Jannaayo 16, 2013 (HOL) — Madaxweyne ku-xigeenka Puntland Gen. C/samed Cali Shire ayaa maanta si rasmi ah u dhagax dhigay dhisme cusub oo ay yeelan doonto wasaaradda duulista hawada iyo garoomada ee Puntland.

2013-01-16 2:41 AM EST
Arbaco, Jannaayo 16, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo booqasho ku jooga dalka Mareykanka ayaa la kulmay 20 xubnood oo ka tirsan Congress-ka dalka Mareykanka oo uu ku jiray mudane keliya ee muslimka ah ee laga soo doorto gobolka Minnesota ee dalka Mareykanka, Keith Ellison.

2013-01-16 2:39 AM EST
Arbaco, Jannaayo 16, 2013 (HOL) — Qaylo-dhaan aad u xooggan ayaa bilihii u danbeeyey kasoo yeereysey kaluumaysatada Puntland, gaar ahaan kuwa gobolka Bari, waxayna la xiriirtaa maraakiibta shisheeyaha ee sida aan sharciga ahayn uga kaluumaysta xeebaha Soomaaliya.