3/18/2024
Today from Hiiraan Online:  _
Wararka Maanta- Arbaco, Jan 16, 2013
Kalluumaysatada Puntland oo ka cabanaya Maraakiibta iyo doonyaha Jiriifka, Sheegayna in wax-soosaarkii Baddu uu yaraaday (Sawiro)

Arbaco, Jannaayo 16, 2013 (HOL) —  Qaylo-dhaan aad u xooggan ayaa bilihii u danbeeyey kasoo yeereysey kaluumaysatada Puntland, gaar ahaan kuwa gobolka Bari, waxayna la xiriirtaa maraakiibta shisheeyaha ee sida aan sharciga ahayn uga kaluumaysta xeebaha Soomaaliya.

Inkasta oo aysan dowladda Puntland si dhab ah uga jawaabin cabashada kaluumaysatada, waxay hadana madaxda wasaaradda kaluumaysiga iyo khayraadka baddu dhowr mar ku celceliyeen in arintaas sida ugu dhaqsaha badan wax looga qaban doono.

Hadaba qaar kamid ah howl-wadeenada shabakadda HOL oo safar shaqo ku tegey degmada Caluula ee gobolka Bari, - oo ah magaalo xeebeed ay bulshada ku dhaqani si toos ah khayraadka badda ugu xiran yihiin- ayaa u kuurgalay heerka ay gaarsiisan tahay saameynta uu Jiriifku (kaluumaysiga sharci darada ah) ku yeeshay wax soo saarka badda.

Waxaana u suurtagashay in ay ka waraystaan dad uu kamid yahay Cawad Bile Saleebaan oo isagu ah bad-dhac (kaluumeyste) muddo 20-sano ka badan ka shaqeynayey xeebta degmada Caluula iyo deegaanada ku dhow dhow.

Cawad Bile ayaa sheegay in sanadkii lasoo dhaafay ee 2012 uu si aad ah wax soo saarka baddu hoos ugu dhacay, kaddib markii ay adkaatay in badda kalluun badan laga soo helo.

"Waayadii hore saxiimaduhu iyaga oo aan wax badan maqneyn ayey soo buuxsan jireen, laakiin in dhoweyd wax fiican badda lagama keeno, waxaa lagu khasban yahay in ugu yaraan 30 Mile berriga laga durko, mararka qaar badda waa lagu dhaxaa" Cawad ayaa sidaas yiri.

Yaasiin Axmed oo isna qayb ka ah ganacsatada dhoofiya kalluunka nooca loo yaqaan (Aargoostada) ayaa tilmaamay in xiliyada qaar ay maraakiibta Jiriifku aad ugu soo dhowaadaan berriga.

"Habeenada qaar aad bay magaalada ugu soo dhowaadaan, waxay sitaan shabaago waaweyn iyo qalab kale oo ay godadka Aargoostadu gasho ku garaacaan si ay banaanka ugu soo baxdo, runtii dhibkoodu ma yara" ganacsade Yaasiin ayaa yiri.

Xeebta dalka Soomaaliya ayaa waxaa si sharci darro ah uga kaluumaysta maraakiib waaweyn oo nooca kaluumaysiga ah, maraakiibtaas oo intooda badan laga leeyahay dalalka Asia waxay qaar kamid ahi ogolaansho ka heystaan maamullada ka jira dalka.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
1/16/2013 1:18 PM EST
Arbaco, Jannaayo 16, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in dowladda Soomaaliya ay soo dhaweynayso wadahadallo walba oo nabadeed, isagoo ugu baaqay dhammaan dhinacyada Soomaalida inay kusoo biiraan qorshaha nabadeed ee dalka.

1/16/2013 11:58 AM EST
Arbaco, Jannaayo 16, 2013 (HOL) — Ururrada bulshada rayidka Somalia ayaa munaasabad ay soo qabanqaabiyeen oo ay ka qaybgaleen waxgarad fara badan oo matalayay qaybaha bulshada Soomaaliyeed iyo qaar ka mid ah fanaaniinta ayaa lagu soo dhaweeyay dhallinyaro dhawaan ku dhawaaqay inay ka tanaasuleen falalka burcadbadeednimada.

1/16/2013 8:33 AM EST
Arbaco, Jannaayo 16, 2013 (HOL) —Ciidamada maamulka KMG ee degmada Kismaayo ayaa xalay toogasho ku dilay mid kamid ah dadka rayidka, waxaana ilaa imika la garanayn sababta ka danbeeysay dilkiisa.

1/16/2013 8:24 AM EST
Arbaco, Jannaayo 16, 2013 (HOL) —Taliyaha ciidamada Booliska Soomaaliyeed Shariif Sheekhunaa Maye ayaa shir jaraa’id oo uu maanta ku qabtay xafiiskiisa magaalada Muqdisho uga warbixiyay sababaha loo xiray wariye C/casiis Cabdinuur Ibraahim Koronto oo maalmihii ugu danbeeyay ay isa soo tareeysay cambaareynta ku aadan xarigiisa.

1/16/2013 8:18 AM EST
Arbaco, Jannaayo 16, 2013 (HOL) — Xarakada Al-Shabaab ayaa bayaan ay soo saartay ku sheegtay in go'aan kama dambeys ah ay ku gaareen in dil toogasho ah ay ku fulinayso sarkaalka Faransiiska ee Dennis Allex kaasoo gacanta ay ku hayeen saddexdii sano ee ugu dambeeyay.

1/16/2013 7:57 AM EST
Arbaco, Jannaayo 16, 2013 (HOL) — Ciidamada Midowga Afrika ee AMISOM ayaa sheegay inay baaritaanno ku sameyn doonaan dhacdo dad rayid ay ku dhinteen oo shalay ka dhacday deegaanka Leego ee gobolka Shabeellada Hoose.

1/16/2013 7:39 AM EST
Arbaco, Jannaayo 16, 2013 (HOL) — Maxkamadda ciidamada dowladda qalabka sida ee dowladda Soomaaliya ayaa maanta xukunno dil ah ku fulisay laba askari oo ka tirsanaa ciidamada dowladda Soomaaliya kuwaasoo ku kala eedeysnaa dil iyo kufsi.

1/16/2013 7:38 AM EST
Arbaco, Jannaayo 16, 2013 (HOL) — Xarunta hay'adda wadahadalka bulshada ee CCD ayaa maanta lagu soo gaba-gabeeyay kulan wadatashi ahaa oo looga hadlayay qorshe-howleedka hay'adda ee sannadka 2013, kaasoo laga soo saaray qodobbo la xiriira yoolka hay'adda ay hiigsaneyso sannadkan.

1/16/2013 7:14 AM EST
Arbaco, Jannaayo 16, 2013 (HOL) — Wareegto kasoo baxday xafiiska madaxweynaha Soomaaliya, Xasan Sheekh Maxamuud ayaa wuxuu guddoomiyaha bankiga dhexe ee Qaranka u magacaabay, C/salaan Cumar Hadliye.

1/16/2013 6:40 AM EST
Arbaco, Jannaayo 16, 2013 (HOL) — Madaxweynaha Puntland iyo wefdi uu horkacayo oo maanta ka dhoofay garoonka diyaaradaha magaalada Boosaaso ee xarunta gobolka Bari, ayaa u kicitimay dalka Jabuuti.

1/16/2013 6:39 AM EST
Arbaco, Jannaayo 16, 2013 (HOL) — Madaxweyne ku-xigeenka Puntland Gen. C/samed Cali Shire ayaa maanta si rasmi ah u dhagax dhigay dhisme cusub oo ay yeelan doonto wasaaradda duulista hawada iyo garoomada ee Puntland.

1/16/2013 2:41 AM EST
Arbaco, Jannaayo 16, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo booqasho ku jooga dalka Mareykanka ayaa la kulmay 20 xubnood oo ka tirsan Congress-ka dalka Mareykanka oo uu ku jiray mudane keliya ee muslimka ah ee laga soo doorto gobolka Minnesota ee dalka Mareykanka, Keith Ellison.