2014-10-21
Today from Hiiraan Online:  _
Wararka Maanta- Sabti, Feb 9 , 2013
Hay'adda WFP oo sheegtay in Soomaali tiradoodu ka badan tahay Hal Milyan ay u baahan yihiin Gargaar Bani’aadamnimo



Sabti, Feberaayo 09, 2013 (HOL) — Hay’adda cunnada adduunka ee WFP ayaa warbixin ay soo saartay Jimcihii shalay ku sheegtay inay qorsheynayso in 1.6-milyan qof Soomaaliya ay caawinayso sannadkan cusub, iyadoo intaas ku dartay in dadkaas intooda badan ay ku nool yihiin goobaha ay weli ka taliso Al-shabaab.

WFP ayaa waxay warbixinteeda ku sheegtay in xaaladda bani’aadamnimo ee Soomaaliya ay ka wanaagsan tahay sidii ay ahayd bishii Ogoosto 2011, xilligasa oo Soomaaliya ay dillaaceen abaaro dhaliyay macluul daran.

Sidoo kale, hay’addu waxay warbixinteeda ku sheegtay inay ku faraxsan tahay inay dib howlaheeda caawinaadda ah uga billowdo magaalada Dekedda leh ee Kismaayo. Taasoo ah bay tiri markii ugu horreysay oo muddo afar sano ka badan oo ay fursad u hesho inay dadka magaaladaas ku nool ay gaarsiiso gargaar.

“Waxaan caawinnay qoysas dhibaateysan oo ku nool Kismaayo. 24% ilmaha ku nool magaladaas ee da’doodu ka hoosayso shanta sano waxaa haysa nafaqo-darro,:” ayay tiri afhayeenadda WFP, Elizabeth Byrs. Iyadoo intaas ku dartay in hay’addoodu ay billowday caawinta dadka ku nool magaaladaas.

Byrs waxay hadalkeeda raacisay in mashaariicdooda Soomaaliya ay ka mid tahay in maalin walba ay raashin qalalan siiyaan dadka gargaarka deg-degga ah u baahan ee Kismaayo.

“Howshan waxaan u sameynaynaa sidii aan u caawin lahayn bulshada, sidoo kalena aan ku soo celin lahayn noloshooda caadiga ah. Waxaana wadnaa qorshe aan ku qodayno ceelal, wadooyinka aan ku dhisayno iyo sidii aan ku dhisi lahayn iskuullo iyo goobo lagu quudiyo dadka ay nafaqo-darradu hayso,” ayay tiri Byrs.

Ugu dambeyn, sarkaaladdu waxay sheegtay inay si dhow ula socoto howlaha ay ku caawinayso shacabka. Iyadoo xustay in shacabka Soomaaliyeed ay isku diyaarinayaan sidii ay uga bixi lahayeen colaadihii iyo nabadgalyo inta badan soo jirtay.

Hay’adda WFP waxay codsatay lacag gaaraysa 57-Milyan oo doollar si ay ugu fuliso howlaheeda gargaar ee Soomaaliya lixda bilood ee soo socota.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-02-09 6:46 PM EST
Sabti, Feberaayo 09, 2013(HOL)— Shirar xiriir ah oo in muddo soo socday, isla markaana looga arrinsanayay dhismaha Madasha Dumarka Soomaaliyeed ee Eskilstuna ayaa gunaanadkoodii waxaa maanta lagu guuleystay in la dhameystiro dhismaha madasha, iyadoo shirkii maanta lagu doortay xubno guddi fulin ah oo 9 xubnood ka kooban, kuwaasi oo isugu jira rag iyo dumar.

2013-02-09 2:00 PM EST
Sabti, Feberaayo 09, 2013 (HOL) — Hay’adda isku-duba-ridka gargaarka bani’aadamnimo ee OCHA ayaa sheegtay in 6,300 oo qoxooti Soomaaliyeed ah oo ku noolaa dalka Kenya ay bishii hore ee Jannaayo si iskood ah ugu laabteen gudaha Soomaaliya.

2013-02-09 1:59 PM EST
Sabti, Feberaayo 09, 2013 (HOL) — Jaaliyadda Soomaaliyeed ee kaso jeeda gobollada Awdal, Selel iyo Gabiley ee Somaliland ayaa deeq lacaga soo gaadhsiiyay dadkii ku dhintay kuna dhaawacmay bannaanbaxyadii ka dhacay magaalooyinka Boorama iyo Saylac.

2013-02-09 8:30 AM EST
Sabti, Feberaayo 09, 2013 (HOL) — Hay'adda samafalka ee Humanitarian African Relief Organization (HARO) ayaa gargaar ay soo dhiibeen muslimiinta ku nool Waqooyiga Mareykanka u qabisay dad aragga la’ oo ku jira kaamka ku yaalla degamada Wadajir ee gobolka Banaadir.

2013-02-09 8:06 AM EST
Sabti, Feberaayo 09, 2013 (HOL) — Ra’iisul wasaaraha Soomaaliya, Cabdi Faarax Shir-doon (Saacid) ayaa maanta si rasmi ah u furay kulan looga doodayo xeerka isgaarsiinta iyo warbaahinta oo ay soo diyaarisay wasaaradda warfaafinta, isgaarsiinta iyo gadiidka, waxaana kasoo qayb-galay bahda saxaafadda, isgaariisnta iyo khuburo ka socota caalamka.

2013-02-09 8:05 AM EST
Sabti, Feberaayo 09, 2013 (HOL) — laba askari oo ka mid ah booliska Somaliland ayaa ku dhaawacmay rasaas ay ku fureen ciidanka Milatariga Itoobiya gaadhi anbad ah oo u talaabay dhinaca Itoobiya ee koonfurta magaalo xuduudka Wajaale.

2013-02-09 8:05 AM EST
Sabti, Feberaayo 09, 2013 (HOL) —Isku-day lagu doonayo in lagu soo af-jaro xiisad colaadeed oo maalmihii la soo dhaafay ka aloosnayd deegaanka Saax-dheer oo 70K-km Koonur-galbeed Galbeed kaga beegan magaaladda Laascaanood xarunta gobolka Sool.

2013-02-09 6:25 AM EST
Sabti, Feberaayo, 09, 2013 (HOL) – Tan iyo wixii ka danbeeyay markii si rasmi ah hay’adda MSF Swiss bishii December ee sanadkii 2012 u joojisay howlihii ay ka waday isbitaalka guud ee magaalada Baladweyne, waxaa jiray gargaar kala duwan oo la gaarsiinayay isbitaalka si loo suurtagaliyo sii socoshada adeegyada caafimaad ee uu isbitaalku u hayo bulshada ku dhaqan gobollka Hiiraan iyo deegaannada ku dhaw dhaw.

2013-02-09 5:58 AM EST
Sabti, Feberaayo 09, 2013 (HOL) — 13 Caruur Soomaali ah oo ku nool wadanka Uk ayaa helay abaal marinno qaali ah kuwaasi oo shan ka mid ah ay ku mutaysateen xifdinta qur’aanka kariimka, halka sideeda arday oo kale ay iyagana kaalimaha koobaad ay ka galeen iskuulladii ay dhiganayeen isla markaana ku wanaagsanaa dhanka barashada diinta islaamka.

2013-02-09 1:01 AM EST
Sabti, Feberaayo 09, 2013 (HOL) — Dowladda Turkiga ayaa loogu baaqay inay dhexdhexaadiso dowladda Soomaaliya iyo xoogagga Al-shabaab ee dagaalka kula jira, si dalka nabaddiisa ay u soo laabato, iyadoo aysan jirin wax jawaab ah oo uu Turkigu ka bixiyay dalabkaas.

2013-02-09 12:35 AM EST
Sabti, Feberaayo 09, 2013 (HOL) — Kooxo hubeysan ayaa xalay weeraray matoorro kuwa dabka dhaliya ah oo ay leedahay shirkadda isgaarsiinta ee GOLIS, kuwaasoo dabka siiya magaalada Boosaaso, iyadoo aanay jirin wax khasaare ah oo uu geystay weerarkaas.