2014-11-01
Today from Hiiraan Online:  _
Wararka Maanta- Khamiis, Feb 7 , 2013
Madaxweynaha Somaliland oo safiirka Maraykanka u fadhiya dalka Kenya kala hadlay Xaaladda Guud ee Somaliland



Khamiis, Feberaayo 07, 2013 (HOL) — Madaxweynaha Somaliland Mudane Axmed Maxamed Maxamuud Siilaanyo iyo wefidigii uu hogaaminayay ayaa la sheegay inuu maanta kulan la yeeshay  Danjiraha Dawlada Maraykanka u fadhiya Dalka Kenya Ambassador Ropert F. Godec iyo masuuliyiin kale oo uu ka mid yahay Brian Phipps,  oo ah madaxa waaxda safaaradda u qaabilsan Soomaliya iyo Marwo Hodan Hassan oo ah agaasimaha hay’ada USAID.

War-saxaafadeed ka soo baxay kulankaasi ayaa lagu sheegay in lagaga hadlay arrimaha Nabadgelyada, Horumarka, Dhaqaalaha, Siyaasada, kobcinta  Dimuqraadiyada, Xaalada guud ee mandaqada iyo xidhiidhka u dhexeeya Somaliland iyo Dalka Maraykanka.

“Madaxweynaha Somaliland Md: Axmed Maxamed Maxamuud Siillanayo waxa uu halkaasi ka jeediyey warbixin ka hadlaysa xaallada guud ee  Somaliland iyo sida  ummada reer Somaliland ay  dalkooda hooyo dib ugu dhisteen, isla markaasna ay uga go'an tahay inay gaadhaan yoolka ay higsanayaan ee ah inay dunida ka helaan Aqoonsi Buuxa”ayaa lagu yidhi war-saxaafadeedkaasi.

Waxaana la sheegay inuu Madaxweynuhu aad ugu  nuux-nuuxsaday in dalka Somaliland ay ka jirto Nabadgelyo buuxda, isla markaasna ay Shacbiga iyo Xukuumada Somaliland iyaga oo gacmaha is haysta ay heeggan buuxa ugu jiraan inay ka hortagaan cid kasta oo Nabadgelyada wax u dhimaysa, waxa kale oo  uu Madaxweynuhu tilmaamay in Somaliland ay kaalin muhiim ah kaga jirto la dagaalanka Budhcad badeeda iyo Argagixisada, isla mar kaasna uu xidhiidh qoto dheer oo dhinaca Amaanka ahi uu ka dhexeeyo dalka Somaliland iyo wadamada deriska ah iyo dalalka reer galbeedka, mar kastana ay Somaliland diyaar u tahay sidii ay uga qayb qaadan lahayd xoojinta amaanka ee Mandaqada.

Madaxweyne Axmed Maxamed Maxamuud Siilaanyo waxa kale oo ka war bixiyay in Somaliland ay sii wadi doonto wada hadaladii ay la yeelanaysay Dalka Soomaaliya ee ku saabsanaa sidii la isula meel dhigi lahaa xidhiidhka mustaqbalka ee Somaliland iyo Soomaaliya, waxaana uu xusay in ay Somaliland diyaar u tahay inay gacan ka geysato wax kasta oo lagu xasilanyo amaanka geeska Afrika.

Danjiraha Maraykanka u fadhiya Dalka  Kenya iyo madaxda kale ee la socotay ayaa waxa ay iyaguna dhinacooda si cad u tilmaameen in Aqoonsigii ay dhawaan siiyeen Dawlada Soomaaliya aanu waxba u dhimayn Xidhiidhkii soo jireenka ahaa ee u dhexeeyay Somaliland iyo Dalka Maraykanka, isla mar kaasna ay sii xoojin doonaan kaalmada uu Maraykanku u fidin jiray Somaliland, waxa kale oo ay sheegeen  inay gacan balaadhan ka geysan doonaan arrimaha Horumarka iyo geedi socodka Dimuqraadiyada Somaliland, isla markaasna  ay taageeri doonaan Doorashooyinka soo socda,  iyaga oo horeba gacan uga geysan jiray doorashooyinkii hore ee dalkeena ka qabsoomay.

Dhinaca kale waxa war-saxaafadeedkaasi ka soo baxday wasaaradda Arrimaha dibadda Somaliland lagu sheegay in Dawlada Maraykanku Martiqaad u fidisay Madaxweynaha Somaliland Mudane Axmed Maxamed Maxamuud Siilaanyo inuu booqosho ku yimaado Dalka Maraykanka, si uu ula kulmo Madaxda kala duwan ee Dalkaasi Maraykanka.

Kulankan Waxa Madaxweynaha ku wehelinayay Wasiirka Wasaarada Arrimaha Debada Dr. Maxamed Cabdilaahi Cumar, Wasiirka Qorshaynta Qaranka Dr. Sacad Cali Shire iyo Danjiraha Somaliland u fadhiya Dalka Kenya Dr. Maxamuud Cabdilaahi Sifir.

Weftiga madaxweynaha oo labaddii cishe u dambeeyey socdaal ku joogay dalka Kenya ayaa sheegay in dawladda Kenya si heer sare u qaabishay oo la mid ah qaabka lagu qaabilo madaxweyneyaasha la aqoonsan yahay, waxaan la siiyay gaadiidka gaarka ah iyo ilaalada gaarka ah ee Madaxweynayaasha loogu talo galay, waxaana ay tani tilmaan cad u tahay xidhiidhka sii xooggaysanaya ee u dhexeeya labada Dal ee Somaliland iyo Kenya ayaa lagu sheegay war- saxaafadeedkaasi ka soo baxay wasaaradda arrimaha dibadda Somaliland.

Barkhad-Ladiif M. Cumar, Hiiraan Online
barkhadladiif@hiiraan.com
Hargeysa, Somaliland





Post your comments

2013-02-07 12:54 PM EST
Khamiis, Feberaayo 07, 2013 (HOL) — Xaflad ballaaran oo lagu caleemo saarayay guddoon cusub oo uu yeesho golaha salaaddiinta, dib u heshiisiinta iyo wacyi-gelinta Soomaaliyeed oo ay ku mideysan yihiin odayaasha dhaqanka Soomaaliyeed ayaa maanta looga dhawaaqay Hotel City Palace ee magaalada Muqdisho.

2013-02-07 12:25 PM EST
Khamiis, Feberaayo 07, 2013 (HOL) — Madaxweynaha Soomaaliya, Mudane Xasan Sheekh Maxamuud ayaa qudbad ka jeediyay shirka ururka Islaamka (OIC) oo Qaahira maanta lagu soo gaba-gabeeyay.

2013-02-07 12:23 PM EST
Khamiis, Feberaayo 07, 2013 (HOL) — Kooxo hubeysan ayaa siyaabo kala duwan ugu dilay xeryaha Qoxootiga Dhadhaab ee dalka Kenya iyo degmada Gaarisa ee gobolka Waqooyi-bari ee Kenya, iyadoo weerarradaas dhaawacyo loogu geystay dhowr qof oo kale.

2013-02-07 9:45 AM EST
Khamiis, Feberaayo 07, 2013 (HOL) — Golaha wasiirrada xukuumadda Soomaaliya ayaa shirkoodii maanta uga hadlay qodbo dhowr ah oo ay ka mid ahaayeen warbixin la xariirta safarka ra’iisal wasaaruhu ku shalay ku tagay magaalada Beledweyne ee gobolka Hiiraan, dib u eegis lagu sameeyey guddiga shaqaalaha rayidka iyo erey bixin cusub oo loo sameeyey dhismaha maamulada gobollada dalka.

2013-02-07 9:32 AM EST
Khamiis, Feberaayo 07, 2013 (HOL) — Xukuumadda Ingiriiska ayaa sheegtay in koox yar oo ciidamadeeda ka mid ah ay u dirayso Soomaaliya taasoo billow u ah iskaashi dhinaca milateriga ah oo ay la yeelanayso dalal ay ku jirto Soomaaliya.

2013-02-07 7:49 AM EST
Khamiis, Feberaayo 07, 2013 (HOL) — Guddoomiyaha baarlamaanka dalka isla markaana ah ku simaha madaxweynaha Soomaaliya, Prof. Maxamed Sheekh Cismaan Jawaari ayaa maanta oo Khamiis ah kula kulmay xarunta golaha shacabka boqolaal qof oo ka socday ururrada shaqaalaha dalka. Isagoo ka dhageystay baahida ay qabaan.

2013-02-07 6:52 AM EST
Khamiis, Feberaayo 07, 2013 (HOL) — Ciidammo Itoobiyaan ah oo kasoo baxay magaalada Ceelberde oo sahay u soo waday ciidamadooda ku sugan magaalada Xudur ee gobolka Bakool ayaa waxay dagaal culus kula kulmeen meel u dhaxaysa Ceelbarde iyo Xudur oo layiraahdo Teed, iyadoo khasaare isugu jira dhimasho iyo dhaawac ay soo kala gaareen labada dhinac.

2013-02-07 6:34 AM EST
Khamiis, Feberaayo 07, 2013 (HOL) —Xildhibaanno kasoo jeeda beelaha Digil iyo Mirifle ayaa shir jaraa’id oo ay ku qabteen magaalada Baydhabo ayaa waxay ku sheegeen inay kasoo horjeedaan maamulka cusub loo soo magacaabay gobolka Bay.

2013-02-07 6:16 AM EST
Khamiis, Feberaayo 07, 2013 (HOL) — Qaramada Midoobay ayaa dowladda Soomaaliya ugu baaqday inay dib u furto kiiska wariye C/casiis Koronto iyo haweeneydii la kufsaday ee uu wareystay oo ay maalmo ka hor ay maxkamadda gobolka Banaadir ku xukuntay min hal sano oo xabsi ah.

2013-02-07 12:51 AM EST
Khamiis, Feberaayo 07, 2013 (HOL) — Xukuumadda Jabuuti ayaa xabsiga dhigtay hoggaamiyaha isbahaysiga MRD ee dalka dalkaas, kaddib markii lagu eedeeyay inuu dowladda Eritrea ka dalbaday inay xoog ku gasho dalka Jabuuti si xukuumadda Geelle loo rido.

2013-02-07 12:51 AM EST
Khamiis, Feberaayo 07, 2013 (HOL) — Gaadiidka gurmadka deg-degga ah ee Ambalaasta ah ayaa Muqdisho ka billaabay howlo ay ugu gurmanayaan xilliyada habeenkii ah oo aanu gaadiidka jirin haweenka uurka leh ee ku jira xilliga foosha iyo caruurta xanuunsan.