2014-09-23
Today from Hiiraan Online:  _
Wararka Maanta- Khamiis, Feb 7 , 2013
Dowladda Jabuuti oo xabsiga u taxaabtay hoggaamiyaha Isbahaysiga MRD oo ka mid ah Axsaabta Mucaaradka Jabuuti


Khamiis, Feberaayo 07, 2013 (HOL) — Xukuumadda Jabuuti ayaa xabsiga dhigtay hoggaamiyaha isbahaysiga MRD ee dalka dalkaas, kaddib markii lagu eedeeyay inuu dowladda Eritrea ka dalbaday inay xoog ku gasho dalka Jabuuti si xukuumadda Geelle loo rido.

Daahir Axmed Faarax (Daaf) oo ah hoggaamiyaha la xiray ayaa iska diiday eedeynta, kaddib markii shalay oo Arbaco ahayd si hoose loo hor-geeyay maxkamad, waxaana isla shalay la loo dhaadhiciyay xabsiga weyn ee Jabuuti.

“Eedeymaha loo haystay Daahir Daaf waxaa lagu sheegay inuu dalka Eritrea warqad u qoray oo uu yiri gala dalka Jabuuti si xukuumadda loo rido, balse isagu waa diiday eedeyntaas, wuxuuna yiri anigu weligey sidaas maan oran,” ayuu yiri Zakariye C/llaahi Cali oo ah garsooraha u doodaya hoggaamiyaha xira oo u warramayay laanta afka Soomaaliga ee VOA-da.

Sidoo kale, garyaqaanku wuxuu sheegay in horay loogu eedeeyay Daahir in lagu leeyahay lacag gaaraysa 3,500,000 oo Faran oo loogu xukumay markii uu dalka ka baxayay, taasna waxaa bixiyay taageerayaashiisa.

Hoggaamiyahan la xiray ayaa dhawaan kusoo laabtay Jabuuti oo lagu wado in 22-ka bishan Feberaayo ay ka billowdaan doorashooyinka baarlamaanka, taasoo loo ogolaaday inay mucaaradku ka qaybgalaan muddo 10-sano ka badan.

Xukuumadda Jabuuti kama aysan hadlin xariga hoggaamiyahan mucaaradka ah, iyadoo aan la ogeyn go’aanka ay qaadan doonaan xisbiyada mucaaradka ah ee ka qaybgalaya doorashooyinka baarlamaanka.

Mar garyaqaanka u doodaya hoggaamiyaha la xiray oo la weydiiyay waxay filayaan maalmaha soo socda ayaa sheegay in siyaasadda dalka Jabuuti ay garanayaan, eedeynta Daahir Daafna ay tahay mid la siyaasadeeyay, balse waxaan qoraynaa warqad aan ku codsanayno in lasii daayo.

Ugu dambeyn, garyaqaanka ayaa sheegay in sababta dhabta ah ee loo xiray hoggaamiyaha ay tahay inuu isku keenay shacabka Jabuuti, xukuumadduna ay diidan tahay in Daahir oo shalay yimid uu kasbado shacabka Jabuuti.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-02-07 12:54 PM EST
Khamiis, Feberaayo 07, 2013 (HOL) — Xaflad ballaaran oo lagu caleemo saarayay guddoon cusub oo uu yeesho golaha salaaddiinta, dib u heshiisiinta iyo wacyi-gelinta Soomaaliyeed oo ay ku mideysan yihiin odayaasha dhaqanka Soomaaliyeed ayaa maanta looga dhawaaqay Hotel City Palace ee magaalada Muqdisho.

2013-02-07 12:25 PM EST
Khamiis, Feberaayo 07, 2013 (HOL) — Madaxweynaha Soomaaliya, Mudane Xasan Sheekh Maxamuud ayaa qudbad ka jeediyay shirka ururka Islaamka (OIC) oo Qaahira maanta lagu soo gaba-gabeeyay.

2013-02-07 12:23 PM EST
Khamiis, Feberaayo 07, 2013 (HOL) — Kooxo hubeysan ayaa siyaabo kala duwan ugu dilay xeryaha Qoxootiga Dhadhaab ee dalka Kenya iyo degmada Gaarisa ee gobolka Waqooyi-bari ee Kenya, iyadoo weerarradaas dhaawacyo loogu geystay dhowr qof oo kale.

2013-02-07 12:21 PM EST
Khamiis, Feberaayo 07, 2013 (HOL) — Madaxweynaha Somaliland Mudane Axmed Maxamed Maxamuud Siilaanyo iyo wefidigii uu hogaaminayay ayaa la sheegay inuu maanta kulan la yeeshay Danjiraha Dawlada Maraykanka u fadhiya Dalka Kenya Ambassador Ropert F. Godec iyo masuuliyiin kale oo uu ka mid yahay Brian Phipps, oo ah madaxa waaxda safaaradda u qaabilsan Soomaliya iyo Marwo Hodan Hassan oo ah agaasimaha hay’ada USAID.

2013-02-07 9:45 AM EST
Khamiis, Feberaayo 07, 2013 (HOL) — Golaha wasiirrada xukuumadda Soomaaliya ayaa shirkoodii maanta uga hadlay qodbo dhowr ah oo ay ka mid ahaayeen warbixin la xariirta safarka ra’iisal wasaaruhu ku shalay ku tagay magaalada Beledweyne ee gobolka Hiiraan, dib u eegis lagu sameeyey guddiga shaqaalaha rayidka iyo erey bixin cusub oo loo sameeyey dhismaha maamulada gobollada dalka.

2013-02-07 9:32 AM EST
Khamiis, Feberaayo 07, 2013 (HOL) — Xukuumadda Ingiriiska ayaa sheegtay in koox yar oo ciidamadeeda ka mid ah ay u dirayso Soomaaliya taasoo billow u ah iskaashi dhinaca milateriga ah oo ay la yeelanayso dalal ay ku jirto Soomaaliya.

2013-02-07 7:49 AM EST
Khamiis, Feberaayo 07, 2013 (HOL) — Guddoomiyaha baarlamaanka dalka isla markaana ah ku simaha madaxweynaha Soomaaliya, Prof. Maxamed Sheekh Cismaan Jawaari ayaa maanta oo Khamiis ah kula kulmay xarunta golaha shacabka boqolaal qof oo ka socday ururrada shaqaalaha dalka. Isagoo ka dhageystay baahida ay qabaan.

2013-02-07 6:52 AM EST
Khamiis, Feberaayo 07, 2013 (HOL) — Ciidammo Itoobiyaan ah oo kasoo baxay magaalada Ceelberde oo sahay u soo waday ciidamadooda ku sugan magaalada Xudur ee gobolka Bakool ayaa waxay dagaal culus kula kulmeen meel u dhaxaysa Ceelbarde iyo Xudur oo layiraahdo Teed, iyadoo khasaare isugu jira dhimasho iyo dhaawac ay soo kala gaareen labada dhinac.

2013-02-07 6:34 AM EST
Khamiis, Feberaayo 07, 2013 (HOL) —Xildhibaanno kasoo jeeda beelaha Digil iyo Mirifle ayaa shir jaraa’id oo ay ku qabteen magaalada Baydhabo ayaa waxay ku sheegeen inay kasoo horjeedaan maamulka cusub loo soo magacaabay gobolka Bay.

2013-02-07 6:16 AM EST
Khamiis, Feberaayo 07, 2013 (HOL) — Qaramada Midoobay ayaa dowladda Soomaaliya ugu baaqday inay dib u furto kiiska wariye C/casiis Koronto iyo haweeneydii la kufsaday ee uu wareystay oo ay maalmo ka hor ay maxkamadda gobolka Banaadir ku xukuntay min hal sano oo xabsi ah.

2013-02-07 12:51 AM EST
Khamiis, Feberaayo 07, 2013 (HOL) — Gaadiidka gurmadka deg-degga ah ee Ambalaasta ah ayaa Muqdisho ka billaabay howlo ay ugu gurmanayaan xilliyada habeenkii ah oo aanu gaadiidka jirin haweenka uurka leh ee ku jira xilliga foosha iyo caruurta xanuunsan.