2014-10-25
Today from Hiiraan Online:  _
Wararka Maanta- Isniin, Feb 11, 2013
Ra’iisal Wasaaarihii hore ee Soomaaliya Dr. C/weli Gaas oo la hadlay Soomaalida Minnesota (SAWIRRO)



Isniin, Feberaayo 11, 2013(HOL):— Magaalada Mineapolis ee Gobolka Minnesota waxaa xalay ka dhacay kulan si heer sare loo soo agaasimay, kaasi oo ay ka qeybgalay Soomaalida ku nool Mareykanka, gaar ahaan Gobolkaas, waxaana kulankan uu ahaa mid lagu soo dhaweynayay Ra’iisal Wasaarihii hore ee Soomaaliya Dr. C/weli Maxamed Cali Gaas.

 

Kulanka ayaa la siiyay magaca dib-u-dhalasha Qaranka Soomaaliyeed, guulaha iyo fursadaha la rajeynayo iyo caqabadaha imaan kara, waxaana ra’iisal Wasaarihii hore garbihiisa taagnaa xubno ka tirsanaa Xukuumaddii uu hoggaaminayay, kuwaasi oo ay ka mid ahaayeen Xildhibaan Xuseen Carab Ciise Ra’iisal Wasaare  ku xigeenkii hore, ahaana wasiirka gaashaandhigga, Xildhibaan Max'ed Kaynaan  Wasiir Dowlahii hore ee Wasaaradda Ganacsiga, Xaamud Maasheye wasiir dowlihii arrimaha dibadda ee hore, Fowzia Abdikadir ka tirsan ururka IHASA iyoFaysal Roobl e ka tirsan IHASA.

 

Ra’iisal Wasaarihii hore Dr. C/weli Maxamed Cali oo hadalkii la wada sugayay ka jeediyay kulanka ayaa ugu horreyn wuxuu u mahadceliyay dadkii tirada badnaa eeka soo qeybgalay kulanka, si gaar ahna wuxuu ugu mahadceliyay aqoonyahannadii kulanka soo qaabeeyay, Ra’iisal Wasaarihii hore ee Soomaaliya Prof. Cali Khaliif oo kulanka ka soo qeybgalay iyo fannaaniin heeso waddani ah ka qaaday kulanka, kuwaasi oo ay horkacayeen Hibo Nuura iyo Axmed Cali Cigaal.

 


Intaas kaddib Ra’iisal Wasaaraha waxaa uu guda galay khudbaddiisa, wuxuuna sheegay in Xukuumaddii Badbaado Qaran ee uu hoggaaminayay markii ugu horreysay oo la magacaabayba ay la kowsatay caqabado isugu jiray Bad-xiran, abaar xooggan oo dalka oo dhan ku dhufatay iyo Al-Shabaab oo Madaxtooyada Soomaaliya sida uu yiri u jiray 1 km. Hayeeshee wuxuu sheegay in howlkarnimo ay muujiyeen Wasiirradii la shaqeynayay iyo madaxweynihii hore ee Soomaaliya Shiikh Shariif Shiikh Axmed ay ku guuleysteen in ay dalka xoreeyaan, isla markaana ay dalka gaarsiiyaan in uu nidaamkii federaalka ahaa ka baxay.

 

Waxaa uu ka taariikheeyay geedi socodkii uu soo maray Road Map-kii ay ka dhasheen shirarkii ka dhacay Muqdisho Garowe iyo Gaalkacyo, wuxuuna caddeeyay in guusha shirarkaas ay ku timid dulqaad iyo tanaasulaad ay muujiyeen, iyagoo mararka qaarkoodna la kulmayay xaalado adag oo shirarka aan laga wadi karin.

 

Wuxuu ka soo qaaday nidaamka federaalka ah ee la doonayo in lagu dhaqo dalka Soomaaliya, wuxuuna sheegay in arrintaas fahamkeeda ay waqti u baahan tahay. “Haddii aad soomaalida la shakeysato kuwa ogol  federaalka waxay ku ogol yihiin ma garanayaan, kuwa diidanna waxa  ku diiddan yihiin ma garanayaan”ayuu yiri Prof. C/weli Gaas oo carrabka ku dhuftayin nidaamkan soomaalida uga yimid shirkii kenya 2004, waxayna u baahan tahay ayuu yiri in laga wado hadlo  sida loo qaybsan lahaa waxyaalaha wadanka ka soo baxa & habka fadaraalka oo u haboon dadka soomaaliyeed.

 


‘Anigu waxaan ka mid ahay dadka taageersan fadaraalka waxaana taas u leeyahay dalkaan hadda aan joogno ee Maraykanka waa fadaraal, dowladnimadana waxa ugu muhiimsan waxaa weeye qofka sharaftiisa & cisadiisa in la ilaaliyo. Marka sidee loo ilaalinayaa, waxaa laga ilaaninayaa awoodda xoogga badan ee dowladda in wax lagu yeelo, dowladduna waa cidda kaliya ee xoog isticmaali karta si sharci ah , waase in si siman loo qaybiyo awooddii dowladda”ayuu hadalkiisa ku sii daray C/weli Maxamed Cali Gaas oo sheegay in dad badan ay qabaan in nidaamka federaalka uu sii kordhin karo qabyaaladda, taasina waa dhici kartaa ayuu yiri balse haddii dowladdii dhexe naga burburtay aan tijaabinno.

 

Ugu dambeyntiina, Qurba-joogtii hadalkiisa dhegeysaneysay oo mar kale u mahadceliyay ayuu ugu baaqay in ay dalka ku laabtaan, isla markaana ay aqoonta ay fursadda u heleen ay dalkooda uga faa’iideeyaan.













 

Siyad Salah

siyadsalah@hotmail.com

Minneapolis, Minnesota





Post your comments

2013-02-11 12:41 PM EST
Isniin, Feberaayo 11, 2013 (HOL) — Guddi wadajir ah oo ka kooban AMISOM iyo dowladda Soomaaliya ayaa baaris ay ku sameeyeen kiis ku saabsanaa dil ka dhacay deegaanka Leego ee gobolka Shabeellada hoose, waxay ku heleen ciidamada AMISOM inay geysteen toogashada dadka rayidka ah ee lagu dilay deegaankaas.

2013-02-11 12:05 PM EST
Isniin, Feberaayo 11, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa cambaareeyay weerarkii ismiidaaminta ahaa ee maanta ka dhacay degmada Gaalkacyo ee gobolka Mudug, kaasoo uu ku dhintay ruuxii fuliyay, khasaare dhaawacyo ahna sababay.

2013-02-11 12:03 PM EST
Isniin, Feberaayo 11, 2013 (HOL) — Xildhibaanno ka socda dalka Burundi, ayaa maanta kula kulmay Muqdisho madaxda dowladda Somalia, ciidamada AMISOM ee ku sugan Muqdisho iyo ergayga Midowga Afrika ee Soomaaliya, Maxamed Saalix Anaadiif.

2013-02-11 7:58 AM EST
Isniin, Feberaayo 11, 2013 (HOL) —Magaalada Baydhabo ee gobolka Bay ayaa waxaa maanta gaaray ciidamadii ka tirsan kuwa dowladda Soomaaliya oo afdhigeedu ahaa degmada Bardaale ee gobolka Bay, kuwaasoo tiradooda ahayd 300-kasi, iyadoo shalayna ay degmadaas gaareen ciidammo saldhig ku lahaa deegaanka Gof-gaduud Shabeelow.

2013-02-11 7:44 AM EST
Isniin, Feberaayo 11, 2013 (HOL) — Urur siyaasadeedkii DALSAN ee ka midka ahaaa ururaddii hadhay, ayaa maanta la midoobay xisbiga taladda haya ee KULMIYE, isla markaana kala qortay heshiis wax wada qaybsi.

2013-02-11 7:35 AM EST
Isniin, Feberaayo 11, 2013 (HOL) — Qaramada Midoobayayaa shaacisay in dhammaan xafiisyadeeda ku yaala Magaalada Nairobi ay ugu soo rarayso sida ugu dhaqsiyaha badan gudaha Soomaaliya, gaar ahaan xarunta dalka Soomaailya ee Muqdisho oo isbedel ammaan uu ka jiro.

2013-02-11 7:27 AM EST
Isniin, Feberaayo 11, 2013 (HOL) — Warsaxaafadeed ay soo saartay hay’adda ICRC ayaa waxay ku sheegtay in guddiga caalamiga ee Laan-qeyrta cas (ICRC) iyo mas’uuliyiinta xanaanada xoolaha Soomaaliya ay soo gaba-gabeeyay olole ballaaran oo lagu daweeyay 700,000 oo nee foo ku nool waqooyiga Somaaliya.

2013-02-11 6:58 AM EST
Isniin, Feberaayo 11, 2013 (HOL) —Nabadsugidda gobolka Banaadira ayaa maanta kusoo bandhigtay Muqdisho maydka ruux ay sheegeen inuu xalay ku dilay degmada Shibbis ee gobolka Banaadir sarkaal ka tisranaa ciidamada sirta dowladda Soomaaliya.

2013-02-11 6:31 AM EST
Isniin, Feberaayo 11, 2013 (HOL) — Ciidamada dowaldda Soomaaliya iyo kuwa AMIOSM oo isgarabsnaya ayaa howgallo ay ku qab-qabteen boqolaal qof waxay saakay ka sameeyeen xaafado ka tirsan degmooyinka Hodan iyo Dayniile ee gobolka Banaadir.

2013-02-11 6:07 AM EST
Isniin, Feberaayo 11, 2013 (HOL) — Faahfaahin dheeri ah ayaa kasoo baxaysa qaraxii ismiidaaminta ahaa ee saaka magaalada Gaalkacayo lagula beegsaday taliye ku-xigeenka ciidamada Booliska Puntland Gen. Muxiyadiin Axmed Muuse.

2013-02-11 3:38 AM EST
Isniin, Feberaayo 11, 2013 (HOL) —Waxaa saaka magaalada Gaalkacayo ee xarunta gobolka Mudug qarax lagula beegsaday taliye ku-xigeenka ciidamada Booliska Puntland Gen. Muxiyadiin Axmed Muuse.

2013-02-11 2:20 AM EST
Isniin, Feberaayo 11, 2013 (HOL) — Xulka kubadda cagta ee dalka Nigeria ayaa ku guuleysatay koobka Qaramada Afrika oo lagu soo gabgabeeyay xalay magaalada Johannesberg ee dalka Koonfur Afrika, kaddib markii ay ka adkaadeen xulka Burkino Faso oo ay ciyaarta kama dambeysta ah isugu soo baxeen.

2013-02-11 1:48 AM EST
Isniin, Feberaayo 11, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay in dowladdu ay dadaal ugu jirto sidii ay wax uga qayban lahayd safirka lacagta shilling Soomaaliga ah oo hoos u dhacday tododbaadyadii lasoo dhaafay.

2013-02-11 1:21 AM EST
Isniin, Feberaayo 11, 2013 (HOL) — Iyadoo dowladda Mareykanka ay dabada ka riixayso in Soomaaliya laga qaado cunno-qabteynta hubka ee Qaramada Midoobay ay saartay, ayaa guddiga ilaalinta cunno-qabteynta hubka ee saaran Soomaaliya iyo Eritrea waxay sheegayaan in Al-shabaab ay hub ka hesho shakabado ku xiran Yemen iyo Iiraan.

2013-02-11 12:32 AM EST
Isniin, Feberaayo 11, 2013 (HOL) — Ciidamada dowladda Somaaliya iyo kuwa AMISOM ayaa saakay howgallo lagu baarayo hub iyo waxyaabaha qarxa kawada xaafado ku yaalla degmooyinka Dayniile iyo Hodan, kaddib markii kooxo hubeysan ay xalay weerareen saldhig ciidan oo ku yaalla degmada Dayniile.