2014-04-17
Today from Hiiraan Online:  _
Wararka Maanta- Jimco, Feb 1 , 2013
Saraakiil ka tirsan Booliiska dalka Kenya oo ku dhaawacmay Qaraxyo Xalay ka dhacay Xeryaha Qoxootiga Dhadhaab
Jimco, Feberaayo 01, 2013 (HOL) — Saddex sarkaal oo booliiska Kenya ka tirsan ayaa ku dhaawacmay qaraxyo ka dhacay Xeryaha Dhadhaab-Kenya, kuwaasoo lagu weeraray gaadiid ay booliisku lahaayeen oo marayay meel ku dhow xerada Dhagaxley.

Weerarkan ayaa dhacay fiidnimadii xalay, xilli ay dadku ku jireen tukashada salaadda cishaha, iyadoo weerarka kaddib ay ciidammo fara badan oo Kenyan ah soo gaareen xeryaha Qoxootiga Dhadhaab.

“Qaraxyadan waxaan ku sheegi karnaa dhibaato weyn, balse dadka ku nool xeryaha Qoxootiga waxaan ka dalbanaynaa inay nala shaqeeyaan waayo, kooxaha dhibaatooyinka geysanaya iyaga ayay ku dhex nool yihiin,” ayuu yiri Charlton Mureithi oo ah taliyaha booliiska gobolka Waqooyi-bari ee dalka Kenya.

Booliiska Kenya ayaa dhawaan toogtay hoggaamiyaha burcadda dhibaatada ku haya, iyadoo mid kalena uu goobta ka baxsaday, waxayna ciidamadu gacanta ku dhigeen qoryo fudud iyo rasaas fara badan, kuwaasoo ay ku sheegeen in la doonayay in lagu dhibaateeyo shacabka.

Sidoo kale, booliisku waxay sheegeen inay raadinayaan ruux ay ku sheegeen inuu ka mid yahay burcadda dhibaatooyinka ku haya qoxootiga ku jira xeryaha Dhadhaab oo lagu magacaabo Ibraahim Xasan Cali.

Taliyaha booliiska gobolka Waqooyi-bari ee Kenya ayaa sheegay in weerarku uusan ahayn mid weyn oo dhibaato u geysan kara qoxootiga ku jira xeryaha Dhadhaab oo ah kuwa ugu waaweyn dunida.

Saraakiil badan oo Kenyan ah ayaa lagu dilay kuwo kalena dhaawacay kaddib markii lagu weeraray qaraxyo kala duwan labadii sano ee lasoo dhaafay, iyagoo ku eedeeyay weerarradaas Al-shabaab.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2013-02-01 12:05 PM EST
Jimco, Feberaayo 01, 2013 (HOL) — Heshiisku wuxuu ahaa iskaashi lagu xusay dhinacyo badan, kaasoo ka billaabanaya heer gobol, laguna wado inuu gaaro illaa heer degmo, iyadoo heshiiskan ay garwadeenno ka yihiin hoggaamiyeyaasha golayaasha deegaanka ee dhawaan la doortay.

2013-02-01 9:28 AM EST
Jimco, February, 01-2013(HOL): Isku xirnaanta iyo iska warqabka ka dhaxeeya ardayda soomaaliyeed ee wax ka barta wadanka Malaysia ayaa sanad waliba bilawgiisa waxey doortaan gudoomiye kaasoo ka war haaya dhamaan ardeyda soomaaliyeed ee wax ka barata jaamacadaha Malaysia, sanadkaana waxey u doorteen gudoomiye Cabdulaahi Maxamed Cali “Sultan.

2013-02-01 9:16 AM EST
Jimco, February, 01-2013(HOL): -Guddoomiyaha Xiriirka Soomaaliyeed ee Kubadda Koleyga Ibraahim Xuseen Cali [ Roombe] ayaa xusay in guul taariikhi laga soo hoyay ciyaarihii Zone V ee Koobka Isreebreebka qaramada qaaradda Afrika, kaas oo xulka wiilasha Kubadda Koleyga uu sheegay inay ka keeneen guul iyo sharaf u soo hoyatay guud ahaan bahda isboortiga gaar ahaanna Kubadda Koleyga dalka.

2013-02-01 9:10 AM EST
Jimco, February 01, 2013(HOL): Qarax ismiidaamin ah ayaa maanta ka dhacay afaafka hore ee safaaradda dowladda Mareykanku ku leedahay dalka Turkiga, iyadoona uu sababay dhimashada laba askari oo katirsanaa ilaalada xarunta.

2013-02-01 6:05 AM EST
Jimco, February, 01-2013 (HOL) --Dagaal culus oo leysku adeegsaday hubka noocyadiisa kala duwan ayaa xalay saqdii dhexe ku dhaxmaray magaalada Baladweyne ciidamada maamulka gobollka Hiiraan, AMISOM iyo xoogagga Al-shabaab.

2013-02-01 2:03 AM EST
Jimco, February 01, 2013(HOL): Madaxweynaha Jamhuuriyadda Federaalka Soomaaliya Xasan Sheekh Maxamuud iyo wafdi uu hoggaaminayo ayaa waxay gaareen caasimadda dalka Ingriiska ee London.