3/18/2024
Today from Hiiraan Online:  _
Wararka Maanta- Jimco, Nov 16, 2012
Madaxweynaha Soomaaliya iska fogeeyay Warbixin ku saabsan Dhuxusha oo ay daabacday Wakaaladda Wararka Reuters
Jimco, November 16, 2012 (HOL) — Madaxweynaha Dowladda Soomaaliya, Xasan Sheekh Maxamuud ayaa iska fogeeyay waribxin ay daabacday wakaaladda wararka ee Reutes, taasoo lagu sheegay in madaxweynaha Soomaaliya uu ogolaaday in la dhoofiyo dhuxusha taalla Kismaayo.


Warsaxaafadeed kasoo baxay xafiiska madaxweynaha Soomaaliya ayaa lagu xusay in madaxweynuhu uu shirkiisa jaraa'id ku sheegay in dhuxusha taalla Kismaayo ay u raadinayso dowladdu xal, balse uusan ogolaan dhoofinta dhuxusha Soomaaliya.

"Reuters si khaldan ayay u turjuntay shirkii jaraa'id ee madaxweynaha, mana jirto meel uu madaxweynuhu ku ogolaaday dhoofinta dhuxusha Soomaaliya, balse wuxuu sheegay in dowladdu ay xal u raadinayso dhuxusha taalla Kismaayo," ayaa lagu yiri warbixin kasoo baxday xafiiska madaxweyne Xasan Sheekh.

Qaramada Midoobay ayaa horay u mamnunucday dhoofinta dhuxusha Soomaaliya, iyadoo dowladda Soomaaliya ay ogolaatay arrintaas, balse dhawaanahan waxaa taagnaa muran ku ku saabsan dhoofinta dhuxul taalla magaalada Kismaayo taasoo ay dowladdu sheegtay inay xal u raadinayso.

"Madaxweynuhu wuxuu ku celinayaa mar kale inuu taageersan yahay go'aankii golaha ammaanka ee Qaramada Midoobay ee lagu mamnuucaya dhoofinta dhuxusha Soomaaliya kaasoo ay horay u dalbatay dowladda Soomaaliya, waxaana dhuxushu ay khatar weyn ku tahay dhirta Soomaaliya," ayaa lagu yiri warsaxaafadeed kasoo baxay madaxtooyada.

Ugu dambeyn, madaxweynaha Soomaaliya wuxuu qoraalkiisa kaga dalbaday wakaaladda wararka Reuters inay shabakadooda ka saaraan warka ku saabsan dhuxusha ee sida aan wanaagsanayn loo turjumay.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
11/16/2012 12:55 PM EST
Jimco, November 16, 2012 (HOL) — Waxaa horraantii bishan aynu ku jirno ee Nov, 2012 si rasmi ah usoo gaba gaboobey hawlihii shidaal baarista ahaa ee ay shirkadda Africa Oil ka waddey ceelalka Shabeel-1 iyo Shabeel-2 ee dooxada Dharoor ee gobolka Bari.

11/16/2012 7:57 AM EST
Jimco, November 16, 2012(HOL): Magaalada Muqdisho ayaa waxaa lagu soo gunaanaday tababar la siinayo suxufiyiinta Soomaaliyeed, kaasi oo lagu barayay sidii ay isu badbaadin lahaayeen marka ay ku shaqeynayaan xaaladaha khatarta ah eek a jira dalka gudahiisa.

11/16/2012 7:06 AM EST
Jimco, November, 16, 2012 (HOL) -- Guddoomiyaha maamulka gobollka C/fitaax Xassan Afrax oo wehliyaan xubno ka tirsan ku-xigeenadiisa iyo saraakiisha ciidamada midowgga Africa AMISOM ee ka howlgala gobollka Hiiraan ayaa maanta gaaray magaalada Baladweyne.

11/16/2012 3:01 AM EST
Jimco, November 16, 2012 (HOL) — Taliyeyaasha saldhigyaada degmooyinka Xamar Jajab, Xamar-weyne, Waaberi iyo Wardhiigley ayaa loo xiray qaraxii dhawaan ka dhacay afaafka hore ee xarunta baarlamaanka Soomaaliya, kaasoo khasaare nafeed oo aad u yar dhaliyay.

11/16/2012 2:43 AM EST
Jimco, November 16, 2012 (HOL) — Xoghayaha guud ee Qaramada Midoobay, Ban Ki-Moon ayaa soo dhaweeyay dhaarinta inta badan xubnaha golaha wasiirrada dowladda Soomaaliya ee uu soo dhisay ra'iisul wasaare Cabdi Faarax Shir-doon (Saacid) isagoo ku tilmaamay dhaarinta wasiirrada tallaabo kale oo horay loo qaaday.

11/16/2012 2:29 AM EST
Jimco, November 16, 2012 (HOL) — Madaxweynaha Somaliland Md: Axmed Maxamed Maxamuud (Siilaanyo) iyo weftigii uu hogaaminayey oo labaddii cisho u dambeeyey hawlo shaqo ku joogay magaaladda Boorame ayaa booqday mashaariic kala duwan oo ka socda magaaladda Boorame iyo jaamacadda Camuud.

11/16/2012 2:28 AM EST
Jimco, November 16, 2012 (HOL) — Ugu yaraan afar qof oo beeraley ah ayaa ku dhintay sideed kalena dhaawacyo kala duwan ayaa soo gaaray kaddib dagaal ku dhexmaray deegaanka Warmaxan ee gobolka Shabeellada hoose kooxo beeraley ah oo ku muransan dhul beereed halkaas ku yaalla.