3/19/2024
Today from Hiiraan Online:  _
Wararka Maanta- Khamiis, Nov 15, 2012
Ururrada Bulshada Rayidka Soomaaliya oo Taageeray Xukuumadda Cusub ee Soomaaliya talooyinna u jeediyay

Khamiis, November 15, 2012 (HOL) — Kulan ay ururrada bulshada rayidka ah ee Soomaaliyeed ku taageerayaan xukuumadda Soomaaliya ayaa Muqdisho lagu qabtay, iyadoo kulankan ay soo qabanqaabiyeen haya'dda horumarinta haweenka ee IIDA iyo hay'adda Somali Women Agenda SWA.

Taageeradan ayaa waxaa looga dalbaday xukuumadda Soomaaliya inay la timaaddo howlkarnimo ay dalka wax uga qabanayso, waxayna xubnihii ka hadlay sheegeen in dowladda Soomaaliya ay ka timid bulshada rayidka ah loogana baahan yahay inay wax u qabto shacabka Soomaaliyeed.

"Waxaan hambalyo u diraynaa ra'iisul wasaaraha Soomaaliya, Cabdi Faarax Shir-doon (Saaci) iyo xukuumaddiisa waxaana ka dalbanaynaa inay dalka kusoo rogto xasillooni iyo kala dambeyn," ayaa laga sheegay kulanka oo ay ka hadleen xubno fara badan.

Sidoo kale, waxaa lagu dardaarmay madaxda dowladda Soomaaliya inay dadaal u galaan sidii ay kusoo nooleyn lahaayeen rajada ummadda Sooamaliyeed oo muddo dheer kusoo jiray dhibaatooyin kala duwan, iyagoo ku boorriyay inay u adeegaan danta guud ee shacabka Soomaaliyeed.

"Dhiirri-galinta madaxweynaha iyo ra'iisul wasaaraha siiyeen haweenka Soomaalida waa mid farxad na gelinsa. Waxaana rajeynaynaa dhiirri-galintaas in la gaarsiiyo heer qancinaayo himilada iyo rajada haweenka Soomaaliyeed," ayaa kulanka laga sheegay.

Xubnihii ka hadlay kulanka ayaa waxaa ka mid ahaa: Sahro Cumar Maalin oo ka socday  ALLAMAGAN / SOMALI WOMEN AGENDA (SWA) Political Task Force, Xaliimo Ismaaciil Ibraahim oo ka socday IIDA WOMEN'S DEVELOPMENT ORGANIZATION, Xaawo Ugaas Faarax oo ka socotay  WAAMO/SWA Peace Task Force, Nuur Maxamed Nuur oo ka socday  PUNSAA/SCSC, Xasan Macallin Black oo ka socday SOCENSA/SCSC iyo Fartuun Axmed oo ka socotay SWA YOUTH.

Ugu dambeyn, haweenka Soomaaliyeed waxay dalbadeen in madaxda dowladdu ay dadaal u galaan sidii ay u dhameystiri lahaayeen kuraasta ay haweenku ku leeyihiin dowladda, kuwaasoo ah 30% inay ka helaan hay'adaha dowladda oo dhan.




Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
11/15/2012 9:08 AM EST
Khamiis, November 15, 2012 (HOL) — Kulanka diimeedkan oo ay soo qabanqaabisay hay'adda Wadahadalka bulshada ayaa waxaa ka qayb-galay illaa 10 culumaa’udiinka Soomaaliyeed ka mid ah iyagoo kulanooda kasoo saaray qodobbo diiini ah, iyagoo shacabka Soomaaliyeed ugu baaqay inay Alle u laabtaan.

11/15/2012 8:48 AM EST
Khamiis, November 15, 2012 (HOL) — Madaxweynaha Soomaaliya, Xasan Sheekh Maxamuud ayaa ku sheegay khudbad uu jeediyay xalay in dowladdu ay si cad ula xisaabtami doonto hay'adaha kala duwan ee maaliyadda, isagoo sheegay in tani ay hordhac inaan lagu takri-falin hantida dowladda soo gasha.

11/15/2012 6:29 AM EST
Khamiis, November 15, 2012 (HOL) — Sagaal wasiir oo ka mid ah golaha wasiirrada xukuumadda Soomaaliya ee dhawaan uu baarlamaanku ansixiyay ayaa maanta lagu dhaariyay xarunta golaha shacabka ee Muqdisho, waxaana dhaarka ka maqnayd wasiiradda arrimaha dibadda ahna ra'iisul wasaare ku xigeenka, Fowziyo Yuusuf Xaaji Aadan oo safar dibadeed ku maqan.

11/15/2012 6:27 AM EST
Khamiis, November 15, 2012 (HOL) — Mas’uuliyiinta maamulka gobolka Hiiraan ayaa soo dhaweeyay talaabadii uu dhawaan baarlamaanka Soomaaliya ku ansixiyay xukuumada cusub ee Soomaaliya, kadib shir jaraa’id oo ay ku qabteen magaalada Baladweyne.

11/15/2012 5:43 AM EST
Khamiis, November 15, 2012 (HOL) — Guddoomiyihii gobolka Banaadir iyo duqii Muqdisho, Maxamed Cumar Xabeeb (Maxamed Dheere) ayaa maanta xanuun awgiis ugu geeriyooday Muqdisho xilli la doonayay in arrimo caafimaad dalka dibaddiisa loogu qaado.

11/15/2012 3:10 AM EST
Khamiis, November 15, 2012 (HOL) —Guddigii farsamo ee ka socday shirka maamul u sameynta Jubooyinka ayaa gudaha magaalada Kismaayo kulamo gooni-gooni ah kula leh odoyaasha dhaqan beelaha dega Jubooyinka.

11/15/2012 3:03 AM EST
Khamiis, November 15, 2012 (HOL) — Xarakada Al-shabaab oo dagaal kula jirta dowaldda Soomaaliya ayaa uga digtay shacabka inay raacaan gaadiidka muraayadaha madow, gaar ahaan kuwa mara deegaannada ay gobolka Shabeellada hoose ee ay ka taliso dowaldda Soomaaliya.

11/15/2012 2:50 AM EST
Khamiis, November 15, 2012 (HOL) — Xukuumadda Uganda ayaa sheegtay inay ka laabatay go'aankii ay ciidamadeeda uga saaraysay Soomaaliya iyo dalal kale oo ku yaalla Afrika, taasoo ka dhalatay caro ay Uganda ka qaaday warbixin ay guddi ka tirsan Qaramada Midoobay ku sheegeen in dalalka Uganad iyo Ruwanda ay taageero siiyaan jabahadda M23 ee ka dagaalanta bariga dalka Jamhuuriyadda Congo.

11/15/2012 2:24 AM EST
Khamiis, November 15, 2012 (HOL) — Madaxweynaha Soomaaliya, Xasan Sheekh Maxamuud oo shir jaraa'id ku qabtay xarunta madaxtooyada Soomaaliya shalay oo Arbaco ahayd ayaa kaga hadlay arrimo badan oo ay ka mid yihiin maamul u sameynta gobollada dalka, wax ka qabashada ammaanka iyo dhoofinta dhuxusha taalla Kismaayo.