3/28/2024
Today from Hiiraan Online:  _
Wararka Maanta- Khamiis, Nov 15, 2012
Madaxweynaha Somalia oo sheegay in Dowladdu ay Mas'uul ka tahay Maamul u sameynta Gobollada Jubbooyinka
Khamiis, November 15, 2012 (HOL) — Madaxweynaha Soomaaliya, Xasan Sheekh Maxamuud oo shir jaraa'id ku qabtay xarunta madaxtooyada Soomaaliya shalay oo Arbaco ahayd ayaa kaga hadlay arrimo badan oo ay ka mid yihiin maamul u sameynta gobollada dalka, wax ka qabashada ammaanka iyo dhoofinta dhuxusha taalla Kismaayo.


Shirka jaraa'id ee madaxweynaha oo ahaa midkii ugu dheeraa ee uu qabto tan iyo markii loo doortay xilka madaxnimo ee Soomaaliya ayuu ku sheegay in dowladdu ay mas'uul ka tahay maamul u sameynta gobollada Jubbooyinka iyo gobollada kale ee dalka.

"Maamul u sameynta gobollada Jubbooyinka dowladda ayaa mas'uul ka ah sida ay mas'uulka uga tahay maamul u sameynta gobollada dalka oo dhan. Markaan leeyahay maamul u sameynta Jubbooyinka dowladda ayaa mas'uul ka ah ma ahan macnaheedu Xamar intaan fariisto ayaan dad u magacaabayaa, laakiinse dowladdu waxay mas'uul ka tahay fududeynta habka iyo nidaamka ay dadka deegaannadaas deggen ku sameysanayaan maamullada. Waxayna taageeri doonnaa maamullada ka dhalan doona deegaannadaas inta ay isaga fillaanayaan," ayuu yiri Xasan Sheekh.

Madaxweynuhu wuxuu ku sifeeyay shacabka gobollada Jubbooyinka ku nool kuwo nabadeed, isagoo xusay in colaadaha 20-kii sano ee lasoo dhaafayay ka dhacayay ay ahaayeen kuwo meelo kale laga soo abaabulay, isagoo sheegay in dowladdu ay ka hortagayso in colaadihii horay u soo maray dib loogu celiyo gobolladaas.

Sidoo kale, madaxweynaha Soomaaliya, wuxuu soo hadal qaaday dhuxusha taalla magaalada Kismaayo, isagoo sheegay in guddi qiimeyn kusoo sameeya ay dhawaan u magacaabi doonaan, isagoo xusay in guddi ay horay u magacaabeen balse cillad farsamo awgeed aysan hirgelin howshii guddigaas loo magacaabay.

"Dowladdu waxay doonaysaa inay go'aan ka gaarto dhuxusha taalla Kismaayo oo ay ganacsato Soomaaliyeed xoog iyo maal badan ka galay, go'aankeennuna waa xal laga gaarayo dhuxusha iyo inaan dib dambe loo jarin dhirteenna," ayuu shirkiisa jaraa'id ku sheegay madaxweynuhu.

Ganacsatada dhuxusha ayuu ugu baaqay inay dowladda la shaqeeyaan si xal waara looga gaaro dhuxusha 4-milyan ee loor ah ee taalla Kismaayo, isagoo sheegay inay dowladdu doonayso in xalka ugu wanaagsan laga gaaro dhuxushaas; sidoo kalena la is-waafajiyo in dhuxushaan xal loo helo dib dambena aan dhirta loo jarin.

Dhanka kale, madaxweynaha Soomaaliya wuxuu ka hadlay ammaanka isagoo xusay inuu dareensan yahay inay jiraan habacsanaan dhinaca hay'adaha cadaalada iyo amniga, isagoo shacabka ka dalbaday inay dulqaad yar muujiyaan inta laga saxayo hay'adahaas.

"Shacabka Soomaaliyeed waxaan ugu digayaa inay taageeraan dambiilayaasha ka soo horjeeda nabadda, marka ciidamada ammaanku soo qabtaan dambiilaha yuusan noqon reer hebel. Dhibaato loo geysanayo ma jirto sharciga wuxuu ku xukumo ayaa lagu fulinayaa," ayuu Xasan Sheekh ku yiri shirkiisa jaraa'id.

Ugu dambeyn, madaxweynaha Soomaaliya wuxuu sheegay in dowladda Soomaaliya ay dadaal u galay sidii ay dalka dib ugu celin lahayd mid nabadoon, isagoo sheegay inay xoogga saari doonaan dib u soo celinta ammaanka guud ee dalka.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
11/15/2012 9:08 AM EST
Khamiis, November 15, 2012 (HOL) — Kulanka diimeedkan oo ay soo qabanqaabisay hay'adda Wadahadalka bulshada ayaa waxaa ka qayb-galay illaa 10 culumaa’udiinka Soomaaliyeed ka mid ah iyagoo kulanooda kasoo saaray qodobbo diiini ah, iyagoo shacabka Soomaaliyeed ugu baaqay inay Alle u laabtaan.

11/15/2012 8:48 AM EST
Khamiis, November 15, 2012 (HOL) — Madaxweynaha Soomaaliya, Xasan Sheekh Maxamuud ayaa ku sheegay khudbad uu jeediyay xalay in dowladdu ay si cad ula xisaabtami doonto hay'adaha kala duwan ee maaliyadda, isagoo sheegay in tani ay hordhac inaan lagu takri-falin hantida dowladda soo gasha.

11/15/2012 8:48 AM EST
Khamiis, November 15, 2012 (HOL) — Kulan ay ururrada bulshada rayidka ah ee Soomaaliyeed ku taageerayaan xukuumadda Soomaaliya ayaa Muqdisho lagu qabtay, iyadoo kulankan ay soo qabanqaabiyeen haya'dda horumarinta haweenka ee IIDA iyo hay'adda Somali Women Agenda SWA.

11/15/2012 6:29 AM EST
Khamiis, November 15, 2012 (HOL) — Sagaal wasiir oo ka mid ah golaha wasiirrada xukuumadda Soomaaliya ee dhawaan uu baarlamaanku ansixiyay ayaa maanta lagu dhaariyay xarunta golaha shacabka ee Muqdisho, waxaana dhaarka ka maqnayd wasiiradda arrimaha dibadda ahna ra'iisul wasaare ku xigeenka, Fowziyo Yuusuf Xaaji Aadan oo safar dibadeed ku maqan.

11/15/2012 6:27 AM EST
Khamiis, November 15, 2012 (HOL) — Mas’uuliyiinta maamulka gobolka Hiiraan ayaa soo dhaweeyay talaabadii uu dhawaan baarlamaanka Soomaaliya ku ansixiyay xukuumada cusub ee Soomaaliya, kadib shir jaraa’id oo ay ku qabteen magaalada Baladweyne.

11/15/2012 5:43 AM EST
Khamiis, November 15, 2012 (HOL) — Guddoomiyihii gobolka Banaadir iyo duqii Muqdisho, Maxamed Cumar Xabeeb (Maxamed Dheere) ayaa maanta xanuun awgiis ugu geeriyooday Muqdisho xilli la doonayay in arrimo caafimaad dalka dibaddiisa loogu qaado.

11/15/2012 3:10 AM EST
Khamiis, November 15, 2012 (HOL) —Guddigii farsamo ee ka socday shirka maamul u sameynta Jubooyinka ayaa gudaha magaalada Kismaayo kulamo gooni-gooni ah kula leh odoyaasha dhaqan beelaha dega Jubooyinka.

11/15/2012 3:03 AM EST
Khamiis, November 15, 2012 (HOL) — Xarakada Al-shabaab oo dagaal kula jirta dowaldda Soomaaliya ayaa uga digtay shacabka inay raacaan gaadiidka muraayadaha madow, gaar ahaan kuwa mara deegaannada ay gobolka Shabeellada hoose ee ay ka taliso dowaldda Soomaaliya.

11/15/2012 2:50 AM EST
Khamiis, November 15, 2012 (HOL) — Xukuumadda Uganda ayaa sheegtay inay ka laabatay go'aankii ay ciidamadeeda uga saaraysay Soomaaliya iyo dalal kale oo ku yaalla Afrika, taasoo ka dhalatay caro ay Uganda ka qaaday warbixin ay guddi ka tirsan Qaramada Midoobay ku sheegeen in dalalka Uganad iyo Ruwanda ay taageero siiyaan jabahadda M23 ee ka dagaalanta bariga dalka Jamhuuriyadda Congo.