3/29/2024
Today from Hiiraan Online:  _
Wararka Maanta- Khamiis, Nov 1 , 2012
Xukuumadda Kenya oo sheegtay inaysan ku lug lahayn Maamul u Sameynta Gobollada Jubbooyinka ee Koonfurta Soomaaliya
Khamiis, November 01, 2012 (HOL) — Iyadoo muran weyn uu ka taagnaa maamul u sameynta gobollada Jubbooyinka ayaa dowladda Kenya waxay markii ugu horreysay ku dhawaaqday inaysan lug ku lahayn maamul u sameynta gobolladan Koonfurta Soomaaliya ku yaalla.


Wasiir ku xigeenka arrimaha dibadda Kenya, Richard Onyonka ayaa sheegay inuusan dalkiisu wax lug ah ku lahayn maamul u sameynta gobollada Jubbooyinka, isagoo iska fogeeyay hadallada ku saabsan in Kenya ay doonayso inay qayb ku yeelato maamul u sameynta Jubbooyinka.

"Kenya faragelin kuma hayso maamul u sameynta Jubbooyinka, waayo Soomaaliya waa dal madax-bannaan oo xaq u leh inay maamul u samayso gobollada dalkooda," ayuu yiri Onyonka.

Mas'uulkan Kenyaatiga ah ayaa hadalkan ka sheegay kulan uu ururka Midowga Afrika kusoo bandhigayay waxqabadka ciidamada AMISOM ay ku leeyihiin dib u dhisidda nabadda Soomaaliya.

Hadalkan ayaa wuxuu imaanayaan iyadoo dhawaanahan uu ka socday magaalada Nairobi shir looga arrinsanayay maamul u sameynta gobollada Jubbooyinka taasoo ay soo dhaweeyeen mas'uuliyiinta maamulka Raaskambooni oo qayb ka ah dagaalka lagu qabsaday Kismaayo iyo deegaanno kale oo gobolka Jubbada hoose ka tirsan.

Dhanka kale, wasiir ku xigeenka arrimaha dibadda Kenya wuxuu beesha calaamka ka dalbaday inay kordhiyaan gargaarka bani'aadamnimo ee la siinayo Soomaaliya, isla markaana uu noqdo mid joogto ah.

Kenya ayaa waxaa Soomaaliya kaga sugan in ka badan 4,000 oo askari oo qayb ka ah howgalka Midowga Afrika ee AMISOM, iyagoo dowladda Soomaaliya ka caawinaya dagaalka ay klua jirto xoogagga Al-shabaab.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
11/1/2012 6:16 PM EST
Magaalada London ayaa waxaa lagu qabtay xaflad lagu maamuusayo sannad guuradii ka soo wareegtay qorista afka Soomaalia. Waxaa warbixintaan noo soo diray Baafo

11/1/2012 2:48 PM EST
Khamiis, November 01, 2012(HOL): War aynu ka helnay ilo diblumaasiyadeed oo aad loogu kalsoon yahay ayaa noo xaqiijiyay in Golaha Ammaanka ee Qaramada Midoobay uu muddada u kordhinayo ciidammada nabad-ilaalinta ah ee Midowga Africa ka jooga Soomaaliya.

11/1/2012 1:52 PM EST
Khamiis, November 01, 2012 (HOL) —Howlgallo ballaaran oo ay maanta gudaha magaalada Kismaayo ka fuliyeen ciidamada dowladda iyo kuwa Raaskaambooni ayay kusoo qabqabteen boqollaal qof oo lagu eedeeyay in ay xiriir la leeyihiin Al-shabaab.

11/1/2012 9:08 AM EST
Khamiis, November 01, 2012 (HOL) — Maxkamada ciidammada Dowladda Soomaaliya ayaa maanta xukunno xabsi ah ku ridday sagaal ruux oo la sheegay inay ka tirsan yihiin Xarakada Al-shabaab oo ay soo qabqabteen ciidamada dowladda Soomaaliya.

11/1/2012 7:04 AM EST
Khamiis, November 01, 2012 (HOL) — Golaha ammaanka ee Qaramada Midoobay ayaa kulan ay xalay ku yeesheen meel ka baxsan xaruntooda New York waxay muddo hal todobaad ah ku kordhiyeen howl-galka ciidamada AMISOM ee ka howgalaya Soomaaliya, iyadoo uu jiro muran ku saabsan xilli kordhinta AMISOM oo u dhexeeya 15-ka dal ee golaha ammaanka.

11/1/2012 6:16 AM EST
Khamiis, November 01, 2012 (HOL) — Maamulka dowladda Soomaaliya ee gobolka Bakool ayaa sheegay in xoogagga Al-shabaab ay kala wareegeen deegaano dhowr ah oo ay hore uga arimin jireen kadib dagaal xooggan oo ay la galeen.

11/1/2012 4:16 AM EST
Khamiis, November 01, 2012 (HOL) — Howlgallo ballaaran ayaa saaka ka bilowday xaafadaha kala duwan ee magaalada Kismaayo, iyadoona ay maanta hawada ka maqantahay guud ahaan isgaarsiintii Degmadaasi.

11/1/2012 3:34 AM EST
Khamiis, November 01, 2012 (HOL) — Ururka Midowga Afrika ayaa ka dalbaday golaha ammaanka ee Qaramada Midoobay inay xoojiyaan taageerada ay siiyaan ciidamadooda ku sugan Soomaaliya, sidoo kalena Soomaaliya laga qaado cunno-qabateynta hubka ee saaraan Soomaaliya, lana adkeeyo xayiraadda lagu soo rogay dhoofka dhuxusha Soomaaliya.

11/1/2012 3:05 AM EST
Khamiis, November 01, 2012 (HOL) — Wasiir ku xigeenka wasaaradda arrimaha dibadda ee dalka Kenya, Richard Onyonka ayaa Arbacadii shalay sheegay in 2,700 oo askari oo ka tirsan cidamada Uganda ee qaybta ka ah howgalka Midoga Afrika lagu dilay Soomaaliya tan iyo markii uu howgalkan billowday sannadkii 2007.